88,000 మార్కును తాకిన హోండా అమేజ్ సేల్స్

హోండా కార్స్ ఇండియా లిమిటెడ్ ఏప్రిల్ 2013లో భారత మార్కెట్లో విడుదల చేసిన తమ సరికొత్త కాంపాక్ట్ సెడాన్ హోండా అమేజ్, కస్టమర్లను అయస్కాంతంలా ఆకర్షిస్తోంది. భారత్‌లో హోండా విడుదల చేసిన మొట్టమొదటి డీజిల్ కారు కావటంతో, ఈ మోడల్‌కు మార్కెట్ నుంచి మంచి స్పందన లభిస్తోంది. హోండా ఇప్పటి వరకు 88,000 అమేజ్ సెడాన్లను విక్రయించింది.

హోండా గడచిన ఏప్రిల్ 2014 నాటికి 80,000 అమేజ్ కార్లను విక్రయించింది. ఈ మోడల్‌ను ప్రవేశపెట్టి సంవత్సరం పూర్తయి సందర్భంగా కంపెనీ ఇందులో ఓ లిమిటెడ్ ఎడిషన్ మోడల్‌ను కూడా విడుదల చేసింది. ఈ లిమిటెడ్ ఎడిషన్ కారులో ముందు వైపు బంపర్ క్రింద ప్రత్యేక స్పాయిలర్స్‌ను అలాగే సైడ్స్ మరియు వెనుక వైపున కూడా క్రింది భాగంలో ప్రత్యేక స్పాయిలర్స్‌ను ఆఫర్ చేస్తున్నారు.

ఒక్క మే 2014 నెలలో హోండా మొత్తం 7218 అమేజ్ కార్లను విక్రయించింది. హోండా కార్స్ ఇండియా మొత్తం అమ్మకాలలో అమేజ్ సెడాన్‌దే మెజారిటీ వాటాగా ఉంది. మే 2013లో హోండా మొత్తం 11,342 కార్లను విక్రయిస్తే, మే 2014లో 13,362 కార్లను విక్రయించింది. ఇందులో ఎక్కువ భాగం అమ్మకాలు హోండా అమేజ్‌వే కావటం విశేషం.