ఆటో ఎక్స్‌పో 2014: అప్‌గ్రేడెడ్ హ్యుందాయ్ శాంటాఫే విడుదల

By Ravi

Published: Wednesday, February 5, 2014, 10:53 [IST]

గ్రేటర్ నోయిడాలోని ఇండియా ఎక్స్‌పోజిషన్ మార్ట్ లిమిటెడ్‌ వద్ద జరుగుతున్న 12వ ఎడిషన్ ఢిల్లీ ఆటో ఎక్స్‌పోలో హ్యుందాయ్ తమ సరికొత్త శాంటాఫే ఎస్‌యూవీని విడుదల చేసింది. మునపటి వెర్షన్ శాంటాఫే మోడల్‌ను రీప్లేస్ చేస్తూ, పూర్తిగా సరికొత్త ప్లాట్‌ఫామ్‌పై ఈ మోడల్‌ను తయారు చేసినట్లు కంపెనీ పేర్కొంది.

భారత మార్కెట్లో మూడవ తరానికి చెందిన ఈ కొత్త శాంటాఫే ధరను రూ.26.30 లక్షలుగా నిర్ణయించినట్లు కంపెనీ పేర్కొంది. కొత్త హ్యుందాయ్ శాంటాఫే శక్తివంతమైన 2.2 లీటర్ విజిటి (వేరియబల్ జియోమెట్రీ టర్బో) డీజిల్ ఇంజన్‌ను ఉపయోగించారు. ఈ ఇంజన్ గరిష్టంగా 194 బిహెచ్‌పిల శక్తిని, 44.55 కెజిఎమ్‌ల టార్క్‌ను ఉత్పత్తి చేస్తుంది.

ఈ డీజిల్ ఇండన్ 6-స్పీడ్ మ్యాన్యువల్ లేదా ఆటోమేటిక్ ట్రాన్సిమిషన్ ఆప్షన్లతో అందుబాటులో ఉంటుంది. ఎక్కువ మైలేజ్, తక్కువ కర్బణ వ్యర్థాలను విడుదల చేసేలా ఈ ఇంజన్‌ను రీట్యూన్ చేశారు. ఇది ఈ సెగ్మెంట్లోని నిస్సాన్ ఎక్స్-ట్రైల్, మారుతి సుజకి గ్రాండ్ విటారా, షెవర్లే కాప్టివా, టొయోటా ఫార్చ్యూనర్, హోండా సిఆర్-వి వంటి మోడళ్లతో పోటీ పడనుంది.

అప్‌గ్రేడెడ్ హ్యుందాయ్ శాంటాఫే ఎస్‌యూవీకి సంబంధించిన మరింత సమాచారాన్ని క్రింది ఫొటో ఫీచర్‌లో పరిశీలించండి.

ఇదివరకటి తరం శాంటాఫేతో పోల్చుకుంటే, ఈ నెక్స్ట్ జనరేషన్ 2014 శాంటాఫే ఎస్‌యూవీ పొడువును 40 మి.మీ. మేర మరిు వెడల్పును 5 మి.మీ. మేర పెంచారు. అయితే దీని రూఫ్‌లైన్‌ను మాత్రం 45 మి.మీ. మేర తగ్గించారు. కాగా.. వీల్‌‌బేస్‌ను మాత్రం యధావిధిగా 2700 మి.మీ. గానే ఉంచారు.

ఈ కొలతలను బట్టి చూస్తుంటే, కొత్త హ్యుందాయ్ శాంటాఫే మునుపటి వెర్షన్ కన్నా మరింత ఎక్కువ ఇంటీరియర్ స్పేస్‌ను ఆఫర్ చేయనుందని తెలుస్తోంది. కొత్త శాంటాఫేలో 7-సీటర్ ఆప్షన్ కూడా అందుబాటులో ఉండనుంది.

పాత మోడల్ కన్నా కొత్త శాంటాఫే మోడల్ మరింత మోడ్రన్ డిజైన్‌ను కలిగి ఉండనుంది. హ్యుందాయ్ తమ కొత్త శాంటాఫే ఎస్‌యూవీని స్థానికంగా భారతదేశంలోనే అసెబ్లింగ్ చేయాలని యోచిస్తోంది. చెన్నైలో ఉన్న కంపెనీ ప్లాంటులో ఈ ఎస్‌యూవీని తయారు చేసే అవకాశం ఉంది.

కొత్త శాంటాఫేలో రీడిజైన్ చేయబడిన ఎక్స్టీరియర్లతో పాటుగా, మెరుగైన నాణ్యత, కొత్త ఎక్విప్‌మెటంట్స్ మరియు సేఫ్టీ ఫీచర్లను ఆఫర్ చేస్తున్నారు. తాజా అప్‌డేట్స్ కోసం తెలుగు డ్రైవ్‌స్పార్క్‌ను గమనిస్తూనే ఉండండి.