నీటితో నడిచే కారులో తిరగనున్న జపాన్ ప్రధానమంత్రి!

ఈనెల 15వ తేదీన టొయోటా ఓ బ్లూ కలర్ మిరాయ్ హైడ్రోజెన్ ఫ్యూయెల్-సెల్ కారును జపాన్ ప్రధానమంత్రి షింజో అబేకి అందజేసింది. ఈ సందర్భంగా ప్రధానమంత్రి మాట్లాడుతూ.. 'మొత్తానికి హైడ్రోజన్ శకం ప్రారంభమైందని' అన్నారు.

కేవలం జపాన్ ప్రధాన మంత్రికే కాకుండా ఆ దేశ ఆర్థిక, రవాణా మరియు పర్యావరణ మంత్రులకు కూడా టొయోటా తమ ఫ్యూయెల్-సెల్ వాహనాలను అందజేసింది.

టొయోటా గడచిన డిసెంబర్ 2014 నెలలోనే తమ హైడ్రోజెన్ ఫ్యూయెల్-సెల్ మిరాయ్ కోసం బుకింగ్‌లను స్వీకరించడం ప్రారంభించిది. ఇప్పటి వరకూ సుమారు 1500 యూనిట్లకు పైగా ఆర్డర్లు వచ్చినట్లు కంపెనీ తెలిపింది.

నీటితో నడిచే వాహనాలను మొట్టమొదటి సారిగా కస్టమర్లకు అందుబాటులోకి తీసుకువస్తున్న తొలి ఆటోమొబైల్ కంపెనీ టొయోటానే కావటం విశేషం. కాగా.. ఇప్పటికే హోండా, మెర్సిడెస్ బెంజ్ వంటి పలు కంపెనీలు తమ కార్లతో ఈ టెక్నాలజీపై పరిశోధనలు చేస్తున్నాయి.

గాలిలోని ఆక్సిజెన్ మరియు హైడ్రోజెన్ మధ్య జరిగే రసాయన చర్యలో భాగంగా జనించే విద్యుత్‌ని ఆధారంగా చేసుకొని ఈ కారు పనిచేస్తుంది. ఇది నీటితో నడుస్తుంది కాబట్టి ఈ కారు వలన పర్యావరణానికి ఎలాంటి హాని జరగదు.

హైడ్రోజెన్ ఫ్యూయెల్-సెల్ వాహనాల కోసం సాధారణ నీటిని ఉపయోగించకూడదు, ఇందుకోసం ప్రత్యేకంగా తయారు చేసిన హైడ్రోజన్ ఫ్యూయెల్‌ను ఉపయోగించాల్సి ఉంటుంది. జపాన్‌లో ఈ ఏడాది చివరి నాటికి 100 స్థానిక హైడ్రోజెన్ ఫ్యూయెల్-సెల్ స్టేషన్లను ఏర్పాటు చేయాలని ప్రభుత్వం భావిస్తోంది.

వాస్తవానికి టొయోటా తొలుత తమ ఫ్యూయెల్-సెల్ మిరాయ్ కోసం 2015 చివరి నాటికి 400 ఆర్డర్లు రావచ్చని అంచనా వేసింది. కానీ వాటి సంఖ్య 1500 లకు మించిపోయింది.

టొయోటా మిరాయ్ హైడ్రోజెన్ ఫ్యూయెల్-సెల్ కోసం వచ్చిన ఆర్డర్లలో 60 శాతం ప్రభుత్వ రంగ సంస్థలు, కార్పోరేట్ కస్టమర్ల నుంచి రాగా మిగిలిన 40 శాతం సాధారణ కస్టమర్ల నుంచి వచ్చాయి.