ఎన్‌సిఏపి క్రాష్ టెస్టులో జీరో స్కోర్ పొందిన మారుతి ఆల్టో కె10

ఇండిపెండెంట్ కార్ సేఫ్టీ రేటింగ్ ఏజెన్సీ లాటిన్ ఎన్‌సిఏపి కార్లను క్రాష్ టెస్ట్ చేసే సమయంలో అందులో మనుషులకు బదులుగా డమ్మీలను ఉంచి, డమ్మీలకు కలిగే ప్రమాదాన్ని బట్టి ప్రమాద తీవ్రతను అంచనా వేసి, సేఫ్టీ రేటింగ్‌ను ఇస్తుంది.

ఈ సేఫ్టీ రేటింగ్‌లో మొత్తం ఐదు స్టార్స్ (నక్షత్రాలు) ఉంటాయి. ఇందులో 4 లేదా ఐదు స్టార్లను దక్కించునే కార్లు అత్యంత సురక్షితంగా ఉన్నట్లు, అంతకన్నా తక్కువ స్టార్లను దక్కించుకునే కార్లు తక్కువ సేఫ్టీ కలిగిన కార్లుగా పరిగణిస్తారు.

ఈ సేఫ్టీ క్రాష్ టెస్ట్ రేటింగ్‌లో మారుతి సుజుకి ఆల్టో కె10 జీరో (సున్న రేటింగ్)ను దక్కించుకుంది. ఫ్రంట్ సీట్లలో కూర్చునే ప్రయాణికులకు జీరో సేఫ్టీ రేటింగ్ లభించగా, వెనుక సీట్లలో కూర్చునే పిల్లల సేఫ్టీ రేటింగ్ 3 స్టార్లను దక్కించుకుంది.

లాటిన్ ఎన్‌సిఏపి రిపోర్టు ప్రకారం, సుజుకి ఆల్టో కె10 అడల్ట్ ఆక్యుపెంట్ (ఫ్రంట్ సీట్లలో కూర్చునే పెద్దవాళ్ల) సేఫ్టీ రేటింగ్‌లో జీరో స్కోర్ సాధించింది. ఇందుకు ప్రధాన కారణం, ఈ వాహన అస్థిర నిర్మాణమేని తెలిపింది.

ప్రమాదాల్లో ఆల్టో కె10 కారులో ఫ్రంట్ ప్రయాణించే వారికి మరణం లేదా గాయాల రిస్క్ ఎక్కువగా ఉంటుందని ఈ రిపోర్టులో పేర్కొన్నారు. అయితే, చైల్డ్ ఆక్యుపెంట్ (చిన్న పిల్లల) సేఫ్టీ రేటింగ్ విషయంలో మాత్రం ఇది ఐదు స్టార్లకు గాను మూడు స్టార్లను దక్కించుకుంది.

లాటిన్ అమెరికా దేశాల్లో అమ్ముడుపోతున్న అనేక రకాల బడ్జెట్ కార్లను లాటిన్ ఎన్‌సిఏపి టెస్ట్ చేసింది. ఇందులో భాగంగా సుజుకి సెలెరియో (మన మార్కెట్లో మారుతి ఏ-స్టార్)ను కూడా టెస్ట్ చేశారు. సెలెరియో (వాస్తవానికి నెక్స్ట్ జనరేషన్ ఆల్టో) ఐదు స్టార్లకు గాను నాలుగు స్టార్లను దక్కించుకుంది.

క్రాష్ టెస్ట్‌ వీడియో

మారుతి సుజుకి ఆల్టో కె10 లాటిన్ ఎన్‌సిఏపి క్రాష్ టెస్ట్‌ను ఈ వీడియోలో వీక్షించవచ్చు.