పండుగ సీజన్‌లో మారుతి సుజుకి సియాజ్ విడుదల!

మారుతి సుజుకి సియాజ్ నిజానికి ఎస్ఎక్స్‌4 సెడాన్ రీప్లేస్‌మెంట్ మోడల్ అయినప్పటికీ, పాత ఎస్ఎక్స్4 సెడాన్‌కు ఈ కొత్త సియాజ్ సెడాన్‌కు మధ్య ఎలాంటి పోలిక ఉండదు. సియాజ్‌ను పూర్తిగా సరికొత్త ప్లాట్‌ఫామ్‌పై తయారు చేశారు. కొత్త క్రోమ్-ఫినిష్ గ్రిల్, రీ-ప్రొఫైల్ చేయబడిన బంపర్స్, కొత్త హెడ్‌ల్యాంప్స్, సరికొత్త రియర్ డిజైన్ వంటి డిజైన్ మార్పులను ఈ మారుతి సుజుకి సియాజ్ సెడాన్‌లో చూడొచ్చు.

అలాగే, ఇంటీరియర్లలో కూడా అనేక మార్పులు చేర్పులు ఉండనున్నాయి. నాణ్యమైన ఇంటీరియర్స్, సుపీరియర్ ఫిట్ అండ్ ఫినిష్‌లను ఇందులో గమనించవచ్చు. అలాగే, టాప్-ఎండ్ వేరియంట్‌లో నావిగేషన్ సిస్టమ్ స్టాండర్డ్ ఫీచర్‌గా లభించే అవకాశం ఉంది.

మారుతి సియాజ్‌లో ఆటోమేటిక్ క్లైమేట్ కంట్రోల్, శాటిలైట్ నావిగేషన్, రియర్ ఎయిర్ కండిషనింగ్, హై-ఎండ్ ఇన్ఫోటైన్‌మెంట్ సిస్టమ్ వంటి అధునాత సాంకేతిక పరిజ్ఞానంతో కూడుకున్న ఫీచర్లను ఆఫర్ చేయవచ్చని అంచనా.

మారుతి సియాజ్‌లో కంపెనీ ఆఫర్ చేయనున్న ఇంజన్ ఆప్షన్ల గురించి ప్రస్తుతానికి స్పష్టమైన అవగాహన లేనప్పటికీ, ఇందులో 1.4 లీటర్ కె-సిరీస్ పెట్రోల్ ఇంజన్ మరియు 1.3 లీటర్ ఫియట్ మల్టీజెట్ డీజిల్ ఇంజన్లతో పాటుగా సుజుకి స్వతహాగా అభివృద్ధి చేస్తున్న కొత్త ఇంజన్‌ను కూడా ఉపయోగించవచ్చని సమాచారం.

మారుతి సుజుకి సియాజ్ సెడాన్ పెట్రోల్ వెర్షన్‌లో రెగ్యులర్ మ్యాన్యువల్ ట్రాన్సిమిషన్‌తో పాటుగా ఆటోమేటిక్ ట్రాన్సిమిషన్ ఆప్షన్‌లో కూడా లభ్యమయ్యే ఆస్కారం ఉంది. అయితే, ఈ మోడల్ ప్రీమియం బ్రాండ్ ఇమేజ్ కారణంగా, ఇందులో కంపెనీ ఇటీవలే సెలెరియోలో పరిచయం చేసిన ఆటోమేటెడ్ మ్యాన్యువల్ ట్రాన్సిమిషన్ (ఏఎమ్‌టి)ని ఉపయోగించపోవచ్చని తెలుస్తోంది.

లేటెస్ట్ అప్‌డేట్స్ కోసం తెలుగు డ్రైవ్‌స్పార్క్‌ను గమనిస్తూ ఉండండి.