బ్యాటరీ పవర్‌తో నడిచే మెర్సిడెస్ బెంజ్ బి-క్లాస్ ఎలక్ట్రిక్ డ్రైవ్

డైమ్లర్ ఆర్ అండ్ డి హెడ్ థామస్ వెబర్ ఈ ఎలక్ట్రిక్ కారు గురించి వివరిస్తూ, ఇది 5-డోర్ హ్యాచ్‌బ్యాక్ మాదిరిగా కాకుండా, ఓ కాంపాక్ట్ ఎస్‌యూవీ మాదిరిగా కనిపిస్తుందని, బ్యాటరీని నిక్షిప్తం చేయటం వలన అలాగే 18 ఇంచ్ అల్లాయ్ వీల్స్‌ను జోడించడం వలన ఇలా అనిపిస్తుందని అన్నారు.

బిఎమ్‌డబ్ల్యూ ఐ3 ఎలక్ట్రిక్ కారులో కేవలం నాలుగు సీట్లు మాత్రమే ఉంటే, తమ బి-క్లాస్ ఎలక్ట్రిక్ డ్రైవ్‌లో ఐదు సీట్లు ఉంటాయని, అలాగే రియల్ వరల్డ్‌లో ఇది సింగిల్ చార్జ్‌పై 200 కిలోమీటర్ల రేంజ్‌ను అందిస్తుందని ఆయన చెప్పారు. (బిఎమ్‌డబ్ల్యూ ఐ3 190 కిలోమీటర్ల రేంజ్‌ను అందిస్తుంది).

దీని గరిష్ట వేగం కూడా బిఎమ్‌డబ్ల్యూ ఐ3 ఎలక్ట్రిక్ కారు గరిష్టం వేగం కన్నా ఎక్కువగా ఉంటుంది. బిఎమ్‌డబ్ల్యూ ఐ3 గంటకు 150 కి.మీ. వేగంతో ప్రయాణిస్తే, బి-క్లాస్ ఎలక్ట్రిక్ డ్రైవ్ గంటకు 160 కి.మీ. వేగంతో పరుగులు తీస్తుంది. ఇది కేవలం 7.9 సెకండ్ల వ్యవధిలోనే 0-100 కి.మీ. వేగాన్ని అందుకుంటుంది.

బి-క్లాస్ ఎలక్ట్రిక్ డ్రైవ్‌లో ఉపయోగించిన ఎలక్ట్రిక్ మోటార్లు గరిష్టంగా 300 ఎన్ఎమ్‌ల టార్క్‌ను ఉత్పత్తి చేస్తాయి. బిఎమ్‌డబ్ల్యూ ఐ3లోని ఎలక్ట్రిక్ మోటార్లు 250 ఎన్ఎమ్‌ల టార్క్‌ను మాత్రమే ఉత్పత్తి చేస్తాయి. దీని ధరను ఇంకా నిర్ణయించలేదని, అయితే ధరను మాత్రం పోటీతత్వంగానే ఉంచుతామని వెబర్ అన్నారు.

మెర్సిడెస్ బెంజ్ బి-క్లాస్ ఎలక్ట్రిక్ డ్రైవ్ 2014లో అమెరికా, యూరప్ మార్కెట్లలో అందుబాటులోకి రానుంది. అయితే, భారత్ వంటి దేశాల్లో ఎలక్ట్రిక్ కార్ల వినియోగానికి సరైన మౌళిక వసతులు లేని నేపథ్యంలో, ఇవి ఇప్పట్లో మన దేశ మార్కెట్లలోకి వచ్చే అవకాశాలు కనిపించడం లేదు.