రెండేళ్లలో 5 కొత్త మోడళ్లను విడుదల చేయనున్న మిత్సుబిషి

హ్యాచ్‌బ్యాక్ సెగ్మెంట్లో హ్యుందాయ్ ఐ10, మారుతి సెలెరియో వంటి మోడళ్లకు ధీటుగా మిత్సుబిషి తమ మిరాజ్ హ్యాచ్‌బ్యాక్‌ను భారత మార్కెట్లో విడుదల చేసే అవకాశం ఉంది. మిరాజ్ ఇప్పటికే ఇండోనేషియా వంటి పొరుగు దేశాలలో విడుదలై, విజయవంతంగా అమ్ముడుపోతోంది.

మిత్సుబిషి మిరాజ్ హ్యాచ్‌బ్యాక్‌లో 1.2 లీటర్, 3-సిలిండర్ పెట్రోల్ ఇంజన్‌ను ఉపయోగిస్తున్నారు. ఈ ఇంజన్ గరిష్టంగా 77 హెచ్‌పిల శక్తిని ఉత్పత్తి చేస్తుంది. గ్లోబల్ మార్కెట్లలో లభిస్తున్న మిరాజ్ మ్యాన్యువల్ ట్రాన్సిమిషన్‌తో పాటుగా, సివిటి ఆటోమేటిక్ ట్రాన్సిమిషన్‌తో పాటుగా లభ్యమవుతుంది.

ఇక కాంపాక్ట్ సెడాన్ విషయానికి వస్తే.. మిత్సుబిషి మిరాజ్ ప్లాట్‌ఫామ్‌ను ఆధారంగా చేసుకొని కంపెనీ మిత్సుబిష్ అట్రాజ్ పేరిట ఓ సెడాన్‌ను తయారు చేసింది. అయితే, గ్లోబల్ మార్కెట్లలో లభిస్తున్న అట్రాజ్ సెడాన్ 4.2 మీటర్ల పొడవును కలిగి ఉంటుంది. ఇండియాలో ఇది కాంపాక్ట్ సెడాన్ క్రిందకు రాదు కాబట్టి, భారత మార్కెట్‌కు అనుగుణంగా దీనిని మోడిఫై చేసే అవకాశం ఉంది.

మిత్సుబిషి మిరాజ్ హ్యాచ్‌బ్యాక్‌లో ఉపయోగించిన ఇంజన్‌నే ఈ మిత్సుబిషి అట్రాజ్ సెడాన్‌లోను ఉపయోగిస్తున్నారు.

మిత్సుబిషి విడుదల చేయనున్న ఐదు ఉత్పత్తులలో మిరాజ్ హ్యాచ్‌బ్యాక్, అట్రాజ్ సెడాన్‌లతో పాటుగా ఓ సరికొత్త నెక్స్ట్ జనరేషన్ అవుట్‌లాండర్ ఎస్‌యూవీతో మరో రెండు యుటిలిటీ వాహనాలు ఉండనున్నట్లు సమాచారం.