రేంజ్ రోవర్ ఎవోక్ కన్వర్టిబల్ విడుదల ఖరారు!

బ్రిటీష్ లగ్జరీ ఎస్‌యూవీ మేకర్ ల్యాండ్ రోవర్ అందిస్తున్న పాపులర్ ఎస్‍యూవీ రేంజ్ రోవర్ ఎవోక్‌లో ఓ కన్వర్టిబల్ వెర్షన్ రానున్నట్లు మనం ఇదివరకటి కథనాల్లో తెలుసుకున్నాం. కాగా.. కంపెనీ ఇప్పుడు తమ కన్వర్టిబల్ వెర్షన్ రేంజ్ రోవర్ ఎవోక్ విడుదలను ఖరారు చేసింది. వచ్చే ఏడాదిలో ఈ మోడల్‍‌ను మార్కెట్లో విడుదల చేయనున్నట్లు కంపెనీ పేర్కొంది.

జాగ్వార్ ల్యాండ్ రోవర్ (జేఎల్ఆర్) తమ రేంజ్ రోవర్ ఎవోక్ కన్వర్టిబిల్ కాన్సెప్ట్‌ను తొలిసారిగా 2012లో జరిగిన జెనీవా అంతర్జాతీయ మోటార్ షోలో ప్రదర్శనకు ఉంచింది. ఈ కారులో మెకానికల్ సాఫ్ట్ రూఫ్ ఉంటుంది. డ్యాష్‌బోర్డులో ఉండే ఓ బటన్‌ను ప్రెస్ చేయగాన్ టాప్ తొలగిపోయి వెనక బూట్ స్పేస్‌లోకి మడుచుకుంటుంది. తిరిగి అదే బటన్‌ను ప్రెస్ చేయగాని రూఫ్ యధా స్థానంలోకి వచ్చి చేరుతుంది.

కన్వర్టబిల్ రేంజ్ రోవర్ ఎవోక్ ఎస్‌యూవీలో యాంత్రికంగా నియంత్రించబడే ఈ రూఫ్ బరువు సుమారు 80 కిలోలు ఉంటుంది. ఈ బరువు స్టాండర్డ్ 3-డోర్ ఎవోక్‌లో ఉపయోగించే రూఫ్ కన్నా అధికం.రేంజ్ రోవర్ ఎవోక్ కన్వర్టిబల్ పెట్రోల్, డీజిల్ ఇంజన్ ఆప్షన్లలో లభ్యం కావచ్చని అంచనా.

డీజిల్ వెర్షన్‌లో 2179సీసీ, టర్బోడీజిల్ ఇంజన్‌ను ఉపయోగించవచ్చు. ఈ ఇంజన్ గరిష్టంగా 188 బిహెచ్‌పిల శక్తిని, 420 ఎన్ఎమ్‌ల టార్క్‌ని ఉత్పత్తి చేస్తుంది. ఈ ఇంజన్ 9-స్పీడ్ ఆటోమేటిక్ గేర్‌బాక్స్‌తో కనెక్ట్ చేయబడి ఉంటుంది. ఇది ఆల్-వీల్ డ్రైవ్ ఆప్షన్‌తో లభిస్తుంది.

పెట్రోల్ వెర్షన్‌లో 1999సీసీ, 4-సిలిండర్, టర్బోచార్జ్డ్ ఇంజన్‌ను ఉపయోగించవచ్చు. ఈ ఇంజన్ గరిష్టంగా 237 బిహెచ్‌పిల శక్తిని, 340 ఎన్ఎమ్‌ల టార్క్‌ని ఉత్పత్తి చేస్తుంది. ఈ ఇంజన్ కూడా 9-స్పీడ్ ఆటోమేటిక్ గేర్‌బాక్స్‌తో కనెక్ట్ చేయబడి ఉంటుంది. ఇది ఆల్-వీల్ డ్రైవ్ ఆప్షన్‌తో లభిస్తుంది.