రెనో డస్టర్, నిస్సాన్ టెర్రానోలపై అమేజింగ్ ఆఫర్స్

జపనీస్ కార్ కంపెనీ నిస్సాన్ తమ టెర్రానో ఎస్‌యూవీని భారత మార్కెట్లో విడుదల చేయటానికంటే ముందే దాని ఫ్రెంచ్ భాగస్వామి రెనో తమ డస్టర్ ఎస్‌యూవీని మార్కెట్లో విడుదల చేసింది. దీంతో రెనో డస్టర్ బాగానే లబ్ధి పొందింది. టెర్రానో రాక ఆలస్యం కావటంతో కొనుగోలుదారులంతా డస్టర్ వైపే మొగ్గు చూపారు. టెర్రానో అమ్మకాలు మాత్రం అంతంత మాత్రంగానే సాగుతున్నాయి.

ప్రస్తుత మార్కెట్ పరిస్థితులు కార్ కంపెనీల అమ్మకాలకు సజావుగా లేవు. దీంతో దాదాపు అన్ని కార్ కంపెనీలు తమ ఉత్పత్తులపై వివిధ ప్రోత్సాహకాలను ఆఫర్ చేయటం ద్వారా అమ్మకాలను పెంచుకోవాలని చూస్తున్నాయి. తాజాగా.. నిస్సాన్, రెనో కంపెనీలు కూడా తమ పాపులర్ టెర్రానో, డస్టర్ మోడళ్లపై ఆకర్షనీయమైన ఆఫర్లను ప్రకటించాయి.

ఇందులో భాగంగానే, ఈ మోడళ్లపై ఎక్సేంజ్ ఆఫర్స్, ఇన్సూరెన్స్ ఆఫర్లను ఇరు కంపెనీలు ఆఫర్ చేస్తున్నాయి. ఈ ఆఫర్లను కేవలం ఎస్‌యూవీ మోడళ్లకే పరిమితం చేయకుండా ఈ కంపెనీలు అందిస్తున్న ఇతర హ్యాచ్‌బ్యాక్‌లు, సెడాన్లపై కూడా అందిస్తున్నారు.