లాజీ ఎమ్‌పివిని భారత్‌లో విడుదల చేయనున్న రెనో

రెనో లాజీ ఒక 7-సీటర్ ఎమ్‌పివి. ఇది 2014 చివరి నాటికి దేశీయ విపణిలో విడుదల కావచ్చని అంచనా. దేశీయ విపణిలో దీని ధర రూ.7 లక్షల నుంచి రూ.10 లక్షలు మధ్యలో ఉండొచ్చని అంచనా.

చెన్నైకి సమీపంలో ఓరగడం వద్ద ఉన్న రెనో-నిస్సాన్ ఉత్పత్తి కేంద్రంలో లాజీ ఎమ్‌పివిని తయారు చేయనున్నారు. ఇండియన్ మార్కెట్‌కు అనుగుణంగా ఈ మోడల్‌లో మార్పులు చేయనున్నారు. ఈ మార్పులను భారత్‌‍లోని రెనో ఆర్ అండ్ డి చేపట్టనుంది.

ఇండియన్ మార్కెట్లో విడుదల కానున్న రెనో లాజీ ఎమ్‌పివిలో పాపులర్ 1.5 లీటర్ కె9కె ఇంజన్‌ను ఉపయోగించవచ్చని తెలుస్తోంది. ఇది గరిష్టంగా 84 బిహెచ్‌పిల శక్తిని విడుదల చేస్తుంది. అలాగే, పెట్రోల్ వెర్షన్ రెనో లాజీ ఎమ్‌పివిలో 1.6 లీటర్, 84 బిహెచ్‌పి ఇంజన్‌ను ఉపయోగించవచ్చని సమాచారం.

గ్లోబల్ మార్కెట్లలో మంచి సక్సెస్ సాధించిన రెనో లాజీ ఈ సెగ్మెంట్లో కెల్లా విశిష్టమైన ఫీచర్లను కలిగి ఉండి, భారత మార్కెట్లో ఈ సెగ్మెంట్లోని మారుతి సుజుకి ఎర్టిగా, నిస్సాన్ ఇవాలియా, టొయోటా ఇన్నోవా, మహీంద్రా జైలో వంటి మోడళ్లతో పోటీ పడనుంది.

ప్రస్తుతం భారత మార్కెట్లో యుటిలిటీ వాహనాలకు డిమాండ్ పెరుగుతున్న నేపథ్యంలో, డస్టర్ ఎస్‌యూవీని ఇక్కడి మార్కెట్లో విడుదల చేసి భారీ సక్సెస్‌ను సొంతం చేసుకున్న రెనో ఇండియా ఎమ్‌పివి విభాగంలో కూడా లాజీ విడుదలతో సక్సెస్‌ను సాధించాలని భావిస్తోంది.