రోల్స్ రాయిస్ ఘోస్ట్ చెంగ్డు గోల్డెన్ సన్‌ బర్డ్ ఎడిషన్

గోల్డెన్ సన్‌ బర్డ్ (సువర్ణ సౌర పక్షి) థీమ్‌తో ఈ రోల్స్ రాయిస్ ఘోస్ట్ సెడాన్‌ను రూపొందించారు. ఇదొక పురాతన చైనీస్ కళాఖండం, దీనిని చెంగ్డు నగరంలో 2001లో గుర్తించారు.

ఈ కళాఖండాన్ని పూర్తిగా స్వచ్ఛమైనం బంగారంతో తయారు చేశారు. ఇది వృత్తాకారంలో (ఫొటోలో చూడండి) ఉంటుంది. ఇందులో సూర్యుడు, సూర్యూని చుట్టూ అపసవ్య దిశలో (యాంటీ-క్లాక్‌వైస్ డైరెక్షన్) ఎగిరే సన్ బర్డ్స్ (పక్షులు) ఉంటాయి. వాస్తవానికి ఈ కళాఖండం 12.5 సెంటీమీటర్ల వ్యాసాన్ని కలిగి ఉండి, 20 గ్రాముల బరువును కలిగి ఉంటుంది.

రోల్స్ రాయిస్ తమ ఘోస్ట్ గోల్డెన్ సన్‌ బర్డ్ డిజైన్‌ను ఈ కళాఖండం ఆధారంగా చేసుకొని తయారు చేశారు. ఈ కారు ఎక్స్టీరియర్‌ను గమనిస్తే, మధ్య భాగంలో పూర్తిగా బంగారు వర్ణంతో పెయింట్ చేయబడి ఉంటుంది. బానెట్ నుంచి బూట్ వరకు, గ్రిల్ చుట్టూ కూడా ఈ గోల్డెన్ పెయింట్ ఉంటుంది. అయితే, ఇది గోల్డ్ పెయింట్ మాత్రమేనా లేకా స్వచ్ఛమైన బంగారమా అనేది మాత్రం తెలియరాలేదు. చక్రాలపై గోల్డ్ రింగ్స్, బాడీపై పక్క భాగాల్లో కనిపించే గోల్డెన్ లైన్స్, లైన్స్ మధ్యలో అక్కడక్కడా కనిపించే సన్‌ బర్డ్స్ ప్రత్యేక ఆకర్షణగా నిలుస్తాయి.

ఇదిగో ఈ ఫొటోలో బాడీ లైన్స్ మధ్యలో డిజైన్ చేసిన సన్ బర్డ్ (సౌర పక్షి)ని దగ్గరగా చూడండి.

ఈ కారులోని డోర్ సిల్ ప్లేట్స్‌పై చెంగ్డు గోల్డెన్ సన్ బర్డ్ అనే స్పెషల్ బ్యాడ్జ్ ఉంటుంది. ఈ కారును పూర్తిగా చేతుల్తో తయారు చేశారు.

ఇక ఈ కారు ఇంటీరియర్స్ విషయానికి వస్తే, వీటిని మరింత విలాసవంతంగా తీర్చిదిద్దారు. లైట్ బ్రౌన్ కలర్‌లో ఉండే రిచ్ లెథర్, హెడ్‌రెస్ట్ లపై గోల్డ్ కలర్‌లో ఉండే గోల్డెన్ సన్ బర్డ్ లోగో లను చూడొచ్చు.

ఈ స్పెషల్ కారు డ్యాష్‌‌బోర్డుపై కూడా గోల్డెన్ సన్ బర్డ్ లోగో కనిపిస్తుంది.

ఇదిలా ఉండగా, భారతదేశం కోసం కూడా ఇలాంటి ఓ ప్రత్యేకమైన రోల్స్ రాయిస్ కారును రూపొందించేందుకు కంపెనీ సన్నాహాలు చేస్తున్న సంగతి తెలిసినదే.