మరోసారి టెస్లా మోడల్ ఎస్ కారులో మంటలు..

అక్టోబర్ 1, 2013న సీటెల్‌లో తొలి టెస్లా మోడల్ ఎస్ కారు అగ్నికి ఆహుతైంది. ఆ సమయంలో ఇది అందరి దృష్టిని ఆకర్షించింది. అధిక వేగాల వద్ద బ్యాటరీ కంపార్ట్‌మెంట్‌కు ఓ మెటాలిక్ వస్తువును తగలటం వలన మంటలు చలరేగటమే ఈ ప్రమాదానికి కారణమని తేలింది.

ఈ ప్రమాదంలో డ్రైవర్‌కు ఎలాంటి గాయాలు కాలేదు, ఆయన సురక్షితంగా బయటపడ్డాడు. కారులో మంటలు చెలరేగినప్పటికీ, దాని సేఫ్టీ విషయంలో తనకు ఇప్పటికీ నమ్మకం ఉందని డ్రైవర్ తెలిపాడు. ఈ సంఘటనతో తర్వాతి రోజున స్టాక్ మార్కెట్లో టెస్లా స్టాక్స్ ఒక్కసారిగా 6.2 శాతానికి పడిపోయాయి.

అక్టోబర్ 18, 2013న మెక్సికోలో రెండవ టెస్లా మోడల్ ఎస్ కారు అగ్ని కీలల్లో చిక్కుకుపోయింది. అయితే, ఈ సంఘటనలో డ్రైవర్ మద్యం సేవించి ఉన్నట్లు సమాచారం. ఆ సమయంలో కారు అధిక వేగంతో ప్రయాణిస్తోంది. కారు చెట్టును గుద్దటం వలన ప్రమాదం జరిగింది.

అదృష్టవశాత్తు, ఈ ప్రమాదంలో కూడా డ్రైవర్ క్షేమంగా బయటపడ్డాడు. కానీ కారు మాత్రం పూర్తిగా కాలిపోయింది. అయితే, ఈ సంఘటనలో కారు నడుపుతున్న డ్రైవర్, కారు సేఫ్టీ గురించి అంత ధీమాగా లేడు.

నంబర్ 6, 2013న అమెరికాలోని టెన్నెస్సేలో మూడువ టెస్లా మోడల్ ఎస్ కారు అగ్నికి ఆహుతైంది. ఇది మొదటి ప్రమాదం లాంటిదే. కారులో చిన్నపాటి ఎలక్ట్రిక్ ఫైర్ కారణంగా, బ్యాటరీ దగ్గర మంటలు వ్యాపించి, కారు మంటల్లో కాలిపోయింది.

ఇదివరకటి ప్రమాదాల్లో మాదిరిగానే, ఈ మూడవ ప్రమాదంలో కూడా డ్రైవర్ సురక్షితంగా బయటపడ్డాడు. కానీ కారు ముందు భాగం మాత్రం పూర్తిగా కాలిపోయింది. ప్రమాదానికి గల కారణం గురించి విచారణ జరుగుతోంది.

ప్రపంచంలో కెల్లా అత్యంత సురక్షితమైన కారుగా పేరు దక్కించుకున్న టెస్లా మోడల్ ఎస్ ఒక్క నెల వ్యవధిలోనే 3 కార్లు అగ్నికి ఆహుతి కావటంతో ఈ కారు సేఫ్టీపై అనుమానాలు తలెత్తుతున్నాయి.

వాస్తవానికి ఇంటర్నల్ కంబస్టిన్ ఇంజన్ కలిగిన కార్లు హై స్పీడ్స్ వద్ద క్రాష్ అయినప్పుడు అగ్ని పుట్టడటం సహజమే. ఇలాంటి సంఘటనలు పెద్దగా ప్రజల దృష్టిని ఆకర్షించవు. కానీ టెస్లా మోడల్ ఎస్ కారును ఇదే విభాగంలో పరిగణించడం గమనార్హం.

బ్యాటరీ ప్యాక్ అంటుకోవటం అనేది అసాధారమైన విషయమేమీ కాదు, సాధారణంగా బ్యాటరీకి ఏదైనా మెటల్ భాగం గుచ్చుకుంటే అది భగ్గుమంటుంది. అదే విధంగా పెట్రోల్, డీజిల్ కార్లలో ఇంధన ట్యాంక్‌కు ఏదైనా డ్యామేజ్ వాటిళ్లితేనే ప్రమాదం జరుగుతుంది. అంటే, దీని అర్థం టెస్లా మోడల్ ఎస్‌లో ఎలాంటి తయారీ లోపాలు లేవని.