వాహనంపై మితిమీరిన వేగం ప్రమాదానికి కారణం

నిజమే..!! మనం వేగంగా లేకుంటే గమ్యాన్ని త్వరగా చేరుకోలేం. అయితే, వేగం అనేది జీవన ప్రయాణంలో కావాలి కానీ రోడ్డుపై చేసే ప్రయాణంలో కాదు. యువకులు చూపించే అత్యుత్సాహం, ఆత్రుత, అవివేకాల కారణంగా ప్రమాదాల బారిన పడుతుంటారు. ఏదైనా వాహనాన్ని గరిష్ట వేగానికి తీసకువెళ్లడం పెద్ద పనేం కాదు. అయితే, అదే వాహనాన్ని సదరు వేగంలో నియంత్రించడమే క్లిష్టం.

తమని ఎవరో ఓవర్‌టేక్ చేశారనో, స్నేహితులు ప్రోత్సహించారనో వాహనాలను వేగంగా నడిపి వారి ప్రాణాలతో పాటుగా తోటి ప్రయాణికులు, రోడ్డుపై వెళ్లే ఇతరుల ప్రాణాలను కూడా చిక్కుల్లో వారు పెట్టడాన్ని మనం తరచూ గమనిస్తూనే ఉన్నాం. ఈ సందర్భంలో, వారి గురించి, వారిపై ఆధారపడిన వారి గురించి, వారి ఉజ్వల భవిష్యత్తుపై కోటి ఆశలు పెట్టుకున్న తల్లిదండ్రుల గురించి ఒక్క క్షణం ఆలోచించగలిగినట్లయితే, వారు సురక్షితంగా ఉండటమే కాకుండా వారి చుట్టూ ఉన్న వారిని కూడా సురక్షితంగా ఉంచిన వారు అవుతారు.