మీ కారును ప్రకృతి సాన్నిహిత్యంగా ఉంచేందుకు ఐదు చిట్కాలు

వాహన కాలుష్యాన్ని తగ్గించే చిట్కాలను తర్వాతి స్లైడ్‌లలో తెలుసుకోండి.

1. కారును సరిగ్గా మెయింటైన్ చేయండి

కారును ఎప్పుడూ చక్కగా వర్కింగ్ కండిషన్‌లో ఉంచుకోవటం ఎంతో ముఖ్యం, అలా చేయటం వలన కారు ఎక్కువ కాలం ప్రకృతి సాన్నిహిత్యంగా (ఈకో-ఫ్రెండ్లీ) ఉండగలదు. కారును ఎప్పటికప్పుడు సర్వీస్ చేయించుకుంటూ, తరచూ ట్యాన్ చేయించుకోవటం వలన అది మరింత సమర్థవంతంగా పనిచేయటమే కాకుండా, తక్కువ కర్భన వ్యర్థాలను విడదల చేస్తుంది. కారును ట్యూన్ఆప్ చేయటం వలన దాని సామర్థ్యం 4 శాతం పెరుగుతుంది, అలాగే ఎయిర్ ఫిల్టర్‌ను రీప్లేస్ చేయటం వలన ఎఫీషియెన్సీ 10 శాతం పెరుగుతుంది. ఫాల్టీ ఆక్సిజెన్ సెన్సార్ వలన కారు మైలేజ్ 40 శాతం తగ్గిపోతుంది. అందుకే కారును ఎప్పుడూ కండిషన్‌లో ఉంచుకోవాలి.

2. టైరులో గాలి చెక్ చేసుకోండి

కారు టైర్లలో గాలి సరైన మోతాదులో లేకపోయినట్లయితే, వాటి రోలింగ్ రెసిస్టెన్స్ పెరుగుతుంది. ఫలితంగా, కారును ముందుకు నడిపిందేంకు ఇంజన్‌పై మరింత అధిక భారం పడుతుంది, దాని వల్ల అధిక ఇంధనం ఖర్చు అవుతుంది. సరైన మోతాదులో గాలి నిండిన టైర్లు ఎక్కువ కాలం మన్నడమే కాకుండా, పర్యావరణంపై కూడా తక్కువ ప్రభావాన్ని చూపుతాయి. టైర్లను సరిగ్గా మెయింటైన్ చేసుకుంటే, మీ విలువైన నగదు కూడా ఆదా అవుతుంది.

3. మైలేజ్ కోసం డ్రైవ్ చేయటం నేర్చుకోండి

మైలేజ్ అనేది డ్రైవింగ్ చేసే వారి డ్రైవింగ్ తీరునుబట్టి కూడా ఆధారపడుతుంది. హఠాత్తుగా కారును స్టాప్ చేయటం, స్టార్ట్ చేయటం, కారును జర్కీగా డ్రైవ్ చేయటం, అనవసరమైన చోట్ల బ్రేక్స్ అప్లయ్ చేయటం, అవసరం లేని చోట వేగంగా వెళ్లటం, లాంగ్ సిగ్నల్స్ వద్ద ఇంజన్ ఐడిల్‌గా ఉంచటం, గేర్ షిఫ్టింగ్ వంటి అనేక అంశాలు మైలేజ్‌పై ప్రభావం చూపుతాయి. వీటన్నింటినీ దృష్టిలో ఉంచుకొని డ్రైవ్ చేయటం వలన కారు మైలేజ్ పెరగటంతో పాటుగా, తక్కువ ఇంధనం ఖర్చయ్యి పర్యావరణానికి కొంత మేర మేలు జరుగుతుంది.

4. మీ కారును తేలికగా ఉంచడం

అధిక భారం కలిగిన కారు అధిక ఇంధనాన్ని గ్రహిస్తుందని గుర్తుంచుకోండి. కాబట్టి, ఎల్లప్పుడూ మీ కారును వీలైనంత వరకు తేలికగా ఉంచుకునేందుకు ప్రయత్నించండి. కారులో అనవసరమైన లగేజ్ ఏదైనా ఉంటే, దానిని తొలగించండి. అవసరం లేనప్పుడు రూఫ్ మౌంటెడ్ లగేజ్ ర్యాక్‌లను, బూట్ స్పేస్‌లోని ఎక్స్‌ట్రా లగేజ్‌ని తొలగించండి. ఇలా చేయటం వలన కారు తేలికగా మారి, ఇంజన్‌పై అధనపు భారం పడకుండా, తక్కువ ఇంధనాన్ని గ్రహిస్తుంది. ఫలితంగా పర్యావరణానికి కొంత మేరైనా మేలు జరుగుతుంది.

5. మీ కారును జాగ్రత్తగా వాష్ చేయండి

ఇంటి వద్ద మీ కారును వాష్ చేసేటప్పుడు అత్యంత అమూల్యమైన నీటిని వృధా చేయకండి. కారును శుభ్రం చేయటం తగినంత నీటిని మాత్రమే వాడండి. వీలైనంత వరకు మీ కారును పొడిబట్టతో శుభ్రం (డ్రై వైప్) చేయటానికి ప్రయత్నించండి. మరీ ఎక్కువ మురికి పట్టి ఉంటే నీటిని జాగ్రత్తగా వినియోగిస్తూ క్లీన్ చేయండి. పర్యావరణానికి హాని కలిగించని ఈకో ఫ్రెండ్లీ క్లీనర్లు ప్రస్తుతం అందుబాటులో ఉన్నాయి, వాటి సాయంతో కారును శుభ్రం చేసి, పర్యావరణ పరిరక్షణకు పాటుపడండి.

చివరిమాట

నేడు ప్రపంచ పర్యావరణ దినోత్సవం. పర్యావరణ పరిరక్షణలో మన వంతు కృషిగా ఈ చిన్ని చిట్కాలను పాటించి, కొంత మేరకైనా పర్యావరణ కాలుష్యాన్ని తగ్గించే ప్రయత్నం చేద్దాం.

ఈ కథనంలో పేర్కొన్నవి కాకుండా, పర్యావరణాన్ని రక్షించేందుకు మీకు తెలిసిన మరిన్ని చిట్కాలు ఏవైనా ఉంటే, వాటిని మా పాఠకులతో పంచుకోండి.