మీ కారులో ఎయిర్‌బ్యాగ్‌ వార్నింగ్‌ లైట్‌ ఆన్‌ అవ్వడం ఎప్పుడైనా గమనించారా.. దానికి కారణాలివే.!!

టెక్నాలజీ పెరుగుతున్న కొద్దీ ఆటోమొబైల్‌ రంగంలో విస్తృతమైన మార్పులు చోటుచేసుకుంటున్నాయి. ముఖ్యంగా ప్రయాణికులకు సంబంధించి సేఫ్టీ ఫీచర్ల విషయంలో. కార్లలో డ్రైవర్‌, ప్రయాణికుల భద్రతను దృష్టిలో ఉంచుకుని ప్రధానంగా ఏర్పాటు చేసిన ఫీచర్‌ ఎయిర్‌ బ్యాగులు(Air Bags). అయితే దాని గురించి చాలా మందికి కొన్ని ముఖ్యమైన విషయాలు తెలియవు. అవేంటంటే..

చాలావరకు కార్లలో, ఎయిర్‌బ్యాగ్ ఆఫ్‌లో ఉన్నప్పుడు డ్యాష్‌బోర్డ్‌(Car Dashboard)లో దానికి సంబంధించి ప్రత్యేకమైన లైట్ ఉంటుంది. అయితే కొంతమంది వాహనదారులు కారు డ్యాష్‌బోర్డ్‌లోని వార్నింగ్‌ లైట్లను పట్టించుకోరు. ఇవి ప్రయాణికుల సేఫ్టీ ఫీచర్లకు సంబంధించినవి. మీ కారు డ్యాష్‌బోర్డ్‌లో ఎయిర్‌బ్యాగ్ వార్నింగ్‌ లైట్‌(Air Bag Warning Light) ఆఫ్‌ అవ్వడానికి సంబంధించి కొన్ని విషయాలు తెలుసుకోవాలి.

డెడ్ బ్యాకప్ బ్యాటరీ: చాలా కార్లలో ఎయిర్‌బ్యాగ్‌ల వంటి ఎలక్ట్రానిక్ ఫంక్షన్‌లకు పవర్‌ని ఇచ్చే బ్యాకప్ బ్యాటరీలను కలిగి ఉంటాయి. డాష్‌బోర్డ్‌లో బ్యాకప్ బ్యాటరీ లైట్‌లు చూపిస్తుంది. బ్యాటరీ రీఛార్జ్ అవసరమైనప్పుడు ఇది ఆఫ్ అవుతుంది. సెన్సార్ రీసెట్‌తో బ్యాకప్ బ్యాటరీని తక్షణమే మార్చాల్సిన అవసరం ఉంటుంది.

సెన్సార్ ఫెయిల్యూర్‌: ఎయిర్‌బ్యాగ్‌లు సక్రమంగా పనిచేయడానికి అనేక సెన్సార్లు కలిసి పనిచేస్తాయి. వీటిలో సీట్లు, సీట్ బెల్ట్‌లు, కారు బాడీపై సెన్సార్లు మొదలైనవి ఉన్నాయి. ఈ సెన్సార్‌లలో ఏదైనా ఒకటి పనిచేయకపోతే, ఎయిర్‌బ్యాగ్ లైట్ ఆన్ అవుతుంది. డ్యాష్‌బోర్డ్‌లో లైట్‌ కనిపించడానికి ఇది కూడా ముఖ్యమైన కారణం.

కొన్నిసార్లు ఎయిర్‌బ్యాగ్‌లు ఉంచిన భాగాలకు నీరు చేరే అవకాశం ఉంటుంది. దీని ద్వారా ఎయిర్‌ బ్యాగ్‌ మాడ్యూల్‌ షార్ట్ సర్క్యూట్ లేదా తుప్పునకు దారితీసే అవకాశం ఉంటుంది. ఆ సమయంలో కారు డ్యాష్‌బోర్డ్‌లో ఎయిర్‌బ్యాగ్ లైట్ ఆన్‌ అవుతుంది. దీని ద్వారా మీరు ఎయిర్‌ బ్యాగ్‌ మాడ్యూల్‌ను సరిచేయాల్సి ఉంటుంది.

యాక్సిడెంట్: చాలా సార్లు, పార్కింగ్ చేసినప్పుడు లేదా ట్రాఫిక్‌ సమయంలో కొన్ని సార్లు బంపర్‌కి మరో వాహనం ఢీకొనే అవకాశం ఉంది. అప్పుడు ఎయిర్‌బ్యాగ్ తెరుచుకోకపోయినా, సెన్సార్‌లు తాకిడిని గుర్తించేంత సున్నితంగా ఉంటాయి. దీని ద్వారా కూడా వార్నింగ్‌ లైట్‌ కనిపిస్తుంది. తద్వారా మీరు సర్వీస్‌ సెంటర్స్‌కు వెళ్లి సరిచేసుకోవచ్చు. సెన్సార్‌ను రీసెట్ చేయడమనేది దీనికి సింపుల్‌ సొల్యూషన్‌.

సీటు బెల్ట్: కారులో ప్రయాణిస్తున్నప్పుడు సీటు బెల్ట్ సరిగ్గా పెట్టుకోకపోతే కూడా ఎయిర్ బ్యాగ్ లైట్ ఆన్ అవుతుంది. మీరు సీట్ బెల్ట్‌ను పెట్టుకున్నప్పటికీ.. వార్నింగ్‌ లైట్ ఇంకా వెలుగుతూ ఉన్నట్లయితే మీరు సరిగా సీట్‌ బెల్ట్‌ పెట్టుకోలేదని అర్థం. ఎయిర్‌బ్యాగ్‌లకు కనెక్ట్ చేయబడిన సీట్ బెల్ట్‌లోని సెన్సార్‌తో కూడా సమస్య ఉండే అవకాశం ఉంది.

ఎయిర్‌బ్యాగ్‌లు యాక్సిలరోమీటర్ నుంచి సమాచారం ఆధారంగా పనిచేస్తాయి. వాహనం యొక్క ఎలక్ట్రానిక్ నియంత్రణ యూనిట్ (ECU) ప్రమాదాన్ని సూచిస్తూ త్వరణంలో ఆకస్మిక మార్పును గుర్తించినప్పుడు ఒక సిగ్నల్‌ను పంపిస్తుంది. యాక్సిలరేటర్ మార్పు నిర్దిష్ట థ్రెషోల్డ్‌కు చేరుకున్నప్పుడు మాత్రమే ఈ సిగ్నల్ పనిచేస్తుంది.

అయితే తక్కువ-స్పీడ్ క్రాష్‌లలో ఎయిర్‌బ్యాగ్‌లు తెరుచుకునే అవకాశం ఉండదు. కొన్ని సందర్భాల్లో, మైనర్, లో-ఇంపాక్ట్ తాకిడికి ఎయిర్‌బ్యాగ్ తెరుచుకోవాల్సిన అవసరం లేదు. ఎందుకంటే ఆ సమయంలో సీటు బెల్ట్‌లు మాత్రమే ప్రయాణికులను రక్షించడానికి సరిపోతాయి. ప్రమాద తీవ్రత ఎక్కువగా ఉండే సందర్భాల్లో మాత్రమే ఎయిర్‌బ్యాగ్‌లు తెరుచుకుంటాయని గుర్తించాలి.