ఆ కవర్ ఇంకా కారు సీట్ల మీదే ఉందా? నిజం తెలిస్తే, మీరు దాన్ని చింపి పారవేస్తారు!

కొత్త కారు కొనడం అనేది ప్రతి ఒక్కరి జీవితంలో ఒక ప్రత్యేకమైన సందర్భం. లక్షల రూపాయలు ఖర్చు చేసి తెచ్చుకున్న ఆ కారును ఎంతో జాగ్రత్తగా చూసుకోవాలనుకోవడం సహజమే. ప్రతి చిన్న విషయాన్ని ఎంతో జాగ్రత్తగా పరిగణించడానికి ప్రయత్నిస్తాం. కారును తరచూ కడుగుతూ, లోపలి భాగాన్ని శుభ్రంగా ఉంచుతూ, దానికి ఏ మాత్రం ధూళి అంటకుండా చూసుకుంటాం. ఇలాంటిదే, చాలామందిలో కనిపించే మరో సామాన్య ప్రవర్తన, షోరూమ్ నుంచి కొత్త కారు తీసుకువచ్చిన వెంటనే సీట్లపై ఉండే ప్లాస్టిక్ కవర్లను తొలగించకుండా వదిలేసే అలవాటు. "ఇవీ ఉండడం వల్లే కూర్చోవడానికి మురికి పడదు", "కావాల్సినదాకా అలాగే ఉంచుకుంటే బాగుంటుంది" అన్న భావనతో చాలామంది వాటిని అలాగే ఉంచుతారు. కానీ, నిజానికి ఇది శుభ్రతకంటే కూడా ఆరోగ్యానికి సంబంధించిన సమస్యగా మారే అవకాశం ఉంటుంది.

ప్లాస్టిక్ కవర్లు గాలి ప్రవాహాన్ని అడ్డుకుంటాయి. కూర్చున్నప్పుడు శరీరం నుండి వచ్చే తేమ, ఉష్ణోగ్రత.. ఇవన్నీ కవర్ గుండా బయటకి వెళ్లకుండా అడ్డుకట్ట వేస్తాయి. దీని ఫలితంగా, బాక్టీరియా పెరగడానికి అనువైన వాతావరణం ఏర్పడుతుంది. దీర్ఘకాలంలో ఇది లోపల దుర్వాసనతో పాటు, శ్వాసకోశ సంబంధిత సమస్యలు కలిగించే అవకాశం కూడా ఉంది. నిజానికి, తయారీ సంస్థలు ఈ ప్లాస్టిక్ కవర్లను కేవలం డీలర్‌షిప్ దాకా కారును రక్షించేందుకు మాత్రమే వేస్తారు.

మీరు, కారును స్వాధీనం చేసుకున్నాక వాటిని తొలగించడం అవసరం. నిజానికి, ప్లాస్టిక్ కవర్లు తొలగించకుండా ఉండటం వల్ల డ్రైవింగ్‌లో అనేక ప్రమాదాలు సంభవించవచ్చు. మీరు బ్రేక్ వేసేటపుడు, సీటు మీద ఉన్న ప్లాస్టిక్‌ మీ శరీరాన్ని ముందుకి లేదా పక్కకి జారుకునేలా చేస్తుంది. ఇది సాధారణంగా పట్టించుకోలేని విషయంగా అనిపించినా, ఒక్క క్షణం శ్రద్ధ తగ్గినా అది ఘోరమైన ప్రమాదానికి దారితీయవచ్చు.

డ్రైవర్ స్థిరంగా కూర్చోకుండా, ప్లాస్టిక్ వల్ల కదిలిపోతే, అతని నియంత్రణ పూర్తిగా కోల్పోవచ్చు. ఇంతే కాదు, చాలామంది డ్యాష్‌బోర్డ్, స్టీరింగ్ వీల్ మీద కూడా అదే ప్లాస్టిక్ కవర్లు అలాగే వదిలేస్తారు. అయితే ఇవి చిన్న విషయాలు కావు. ఎందుకంటే డ్యాష్‌బోర్డ్, స్టీరింగ్ వీల్ వంటి భాగాల్లో ముఖ్యమైన సేఫ్టీ వ్యవస్థలు, ముఖ్యంగా ఎయిర్‌బ్యాగ్‌లు ఉండే అవకాశముంది. ఈ కవర్లు ఎయిర్‌బ్యాగ్‌ల వేగంగా బయటకు రావడాన్ని అడ్డుకోవచ్చు.

అనుకోని ప్రమాదం జరిగితే, ఇది మరింత ప్రమాదకరంగా మారుతుంది. ఇంకా ముఖ్యమైన విషయం, ఎండలో నిలిపిన కారులో, సీట్లపై ఉన్న ప్లాస్టిక్ వేడి వల్ల రసాయనాలను విడుదల అవుతాయి. ఇవి మెల్లగా విషపూరితమైన వాయువులుగా మారి, కారు లోపల వ్యాపించగలవు. దీన్ని గమనించకపోయినా, ఈ వాసనలతో పదే పదే మన శ్వాస తీసుకోవడం వల్ల శ్వాస సంబంధిత సమస్యలు, మైగ్రేన్, అలసట వంటి ఆరోగ్య సమస్యలు తలెత్తే ప్రమాదం ఉంది.

అందుకే, కొత్త కారు తీసుకున్నాక అందులో ఉన్న ప్లాస్టిక్ కవర్లను తొలగించడం అనేది ఒక ముఖ్యమైన నిర్ణయం. శుభ్రత పేరుతో వాటిని అలాగే ఉంచడం కన్నా, ఆరోగ్యకరమైన పరిసరాలు కల్పించుకోవడమే ఉత్తమం. మార్కెట్‌లో ఇప్పుడు ఉన్న అధునాతన ఫ్యాబ్రిక్ లేదా కస్టమ్ సీటు కవర్లు దీన్ని తక్కువ ఖర్చులో సమర్థవంతంగా పరిష్కరించగలవు. ఇటీవల కాలంలో కొన్ని బ్రాండ్‌లు ప్లాస్టిక్‌కు బదులుగా రీసైకిల్ చేసిన పత్తి పదార్థాలతో కవర్లు ఉపయోగించడం ప్రారంభించాయి.

అవి మరింత ఆరోగ్యకరమైనవే కాకుండా, పర్యావరణాన్ని కూడా కాపాడేలా ఉంటాయి. కాబట్టి మీ కారు సీట్లపై లేదా క్యాబిన్ లోపల ఇతర ప్రదేశాలపై ప్లాస్టిక్ కవర్లు ఉంటే, వాటిని తీసివేయడం ఉత్తమం. కొత్త కారును కొనుగోలు చేసినప్పుడు దాని సీట్ కవర్లు, క్యాబిన్‌పై ప్లాస్టిక్ కవర్లు ఉంటే, డెలివరీ చేసే ముందు వాటిని తీసివేయమని డీలర్ సిబ్బందిని అడగాలి.