రైల్వే ప్రయాణికులకు గుడ్‌ న్యూస్‌.. టికెట్‌ రద్దు చేసుకున్న 24 గంటల్లో మనీ రీఫండ్‌.. పూర్తి వివరాలివే.!!

రైల్వే ప్రయాణికులకు గుడ్‌ న్యూస్‌. ఇకపై మీరు ట్రైన్‌ టికెట్‌ బుక్‌ చేసుకున్న తర్వాత.. కొన్ని కారణాల వల్ల టికెట్‌ రద్దు చేయాల్సి వస్తే రీఫండ్ కోసం మూడు, నాలుగు రోజులు ఎదురుచూడాల్సి వస్తుంది. ఇప్పుడు ఆ సమస్య లేదు. కేవలం 24 గంటల్లో ఆ నగదు మీకు రీఫండ్‌ అవుతుంది. అదెలా అంటే..

త్వరలో పార్లమెంట్‌ ఎన్నికలు రాబోతున్నాయి. మొత్తం ఏడు దశల్లో పోలింగ్‌ జరగనుంది. ఈ క్రమంలో ఎన్నికల నేపథ్యంలో ఆయా రాజకీయ పార్టీలు మేనిఫెస్టోలను విడుదల చేస్తున్నాయి. ఈ నేపథ్యంలో ప్రస్తుతం అధికారంలో ఉన్న నరేంద్ర మోదీ ప్రభుత్వం మేనిఫెస్టోలో రైల్వే ప్రయాణికులకు సంబంధించి ఆసక్తికర విషయాలు పంచుకుంది.

మూడోసారి అధికారంలోకి వస్తే.. మొదటి 100 రోజుల్లో రైల్వే శాఖలో తీసుకువచ్చే మార్పుల గురించి నరేంద్ర మోదీ ప్రభుత్వం వెల్లడించింది. ప్రధాన మంత్రి రైలు యాత్రి భీమా యోజన బీమా పథకాన్ని భారతీయ రైల్వేలో ఒక ప్రధాన పథకంగా మొదటి 100 రైళ్లలో ప్రవేశపెట్టాలని కేంద్రం యోచిస్తోంది. దీని ప్రకారం రైలులో ప్రయాణించే ప్రయాణికులందరికీ ప్రభుత్వ ఖర్చుతో బీమా సౌకర్యం కల్పించనున్నట్లు తెలుస్తోంది.

పూర్తి సమాచారంపై త్వరలో పూర్తి వివరాలు వెల్లడయ్యే అవకాశాలు ఉన్నాయి. ఆ తర్వాత భారతదేశంలోని మూడు ప్రాంతాలను ఆర్థిక కారిడార్లుగా ప్రకటించి ఆయా ప్రాంతాల అభివృద్ధికి రూ. 11 లక్షల కోట్లను కేటాయించనున్నట్లు తెలుస్తోంది. దీని ద్వారా ఆయా ప్రాంతాల్లో ట్రాక్‌లను మెరుగుపరచడం, కొత్త ట్రాక్‌లు వేయడం, వాటిని పటిష్ఠం చేయడం, భద్రతా ఏర్పాట్లు చేయడం వంటి అభివృద్ధి పనులు చేయనుంది.

ఆ తర్వాత కొత్త ప్రభుత్వం అధికారం చేపట్టిన 100 రోజులలోపు ఇండియన్‌ రైల్వే ద్వారా రిజర్వేషన్ టిక్కెట్‌లను బుక్ చేసి, రద్దు చేసిన వారికి 24 గంటల్లోపు వాపసు పొందే కొత్త పథకాన్ని ప్రకటించాలని భావిస్తున్నారు. రద్దయిన టిక్కెట్ల వాపసు రావడానికి చాలా సమయం పడుతుండటంతో ప్రస్తుతం ప్రయాణికులు ఇబ్బంది పడుతున్నారు. దీంతో ఈ సమస్యను పరిష్కరించే యోచనలో ప్రభుత్వం ఉంది.

ఇది మాత్రమే కాదు, భారతీయ రైల్వే రంగంలో ఒక పెద్ద మార్పుగా 'సూపర్' యాప్ అనే కొత్త అప్లికేషన్‌ను కూడా పరిచయం చేయడానికి కేంద్రం యోచిస్తోంది. ప్రస్తుతం రైలు టికెట్ బుకింగ్, రైలు రన్నింగ్ స్టేటస్ వంటి పలు పనులు ప్రత్యేక యాప్ ద్వారా జరుగుతున్నాయి. ప్రయాణికులు ఒకే యాప్‌లో మొత్తం సమాచారాన్ని పొందగలిగేలా వీటన్నింటిని ఏకతాటిపైకి తీసుకురావాలని మంత్రిత్వ శాఖ భావిస్తోంది.

జమ్మూకశ్మీర్‌ను కలుపుతూ ప్రపంచంలోనే అత్యంత ఎత్తైన రైల్వే వంతెనను తొలి 100 రోజుల్లో ప్రారంభించేందుకు సన్నాహాలు జరుగుతున్నాయి. ఈ వంతెన చాలా వరకు పూర్తయి ప్రారంభానికి సిద్ధంగా ఉండగా, కొత్త ప్రభుత్వం అధికారంలోకి వచ్చిన 100 రోజుల తర్వాత ప్రారంభోత్సవాన్ని నిర్వహించాలని భారతీయ రైల్వే నిర్ణయించింది. ఇందుకు సంబంధించి పనులు ప్రారంభమయ్యాయి.

భారతదేశంలోని మొట్టమొదటి సస్పెన్షన్ రైల్వే వంతెన, రామేశ్వరం మరియు కొత్త పాంబన్ వంతెన కొత్త ప్రభుత్వం అధికారంలోకి వచ్చిన 100 రోజుల్లో ప్రారంభోత్సవానికి సిద్ధంగా ఉన్నట్లు తెలుస్తోంది. డిసెంబర్ 2022 నుంచి, ఈ వంతెన మీదుగా వెళ్లే రైలు పూర్తిగా నిలిచిపోయింది. అయితే, కొత్త వంతెన నిర్మాణం పూర్తయినందున, త్వరలో ప్రారంభానికి సిద్ధంగా ఉన్నట్లు అంచనా వేయవచ్చు.

ఇంకా 100 రోజుల్లో స్లీపర్ సౌకర్యాలతో వందే భారత్ రైళ్లను ప్రవేశపెట్టాలని కేంద్రం భావిస్తోంది. ఈ రైళ్లు ఆరు నెలల్లో పూర్తయ్యే అవకాశాలు ఉన్నాయి. వంద రోజుల్లోగా ఈ ప్రాజెక్టు ప్రవేశపెడుతుందా లేదా అన్నది అనుమానంగానే ఉన్నా.. ప్రస్తుతం రైల్వే యంత్రాంగం ఆ దిశగా ప్రయత్నాలు చేస్తోంది.

భారత్‌లో ముంబయి-అహ్మదాబాద్‌ను అనుసంధానిస్తూ బుల్లెట్ రైలు నిర్మాణ పనులు జరుగుతున్నాయి. కొత్త ప్రభుత్వం ఏర్పాటైన 100 రోజుల్లో ఈ పనిని వేగవంతం చేయడానికి కొత్త పథకాలు మరియు నిధులు కేటాయించాలని భావిస్తున్నారు. మొత్తం 508 కిలోమీటర్లలో 320 కిలోమీటర్ల మేర బుల్లెట్ రైలును ప్రారంభించి 2029 సంవత్సరంలో వినియోగంలోకి తీసుకువచ్చే యోచనలో ప్రభుత్వం ఉంది.