వెదురు బొంగులతో సైకిల్‌ను రూపొందించిన ఔత్సాహిక డిజైనర్

బెంగుళూరుకు చెందిన విజయ శర్మ అనే ఓ ఔత్సాహిక ఫర్నిచర్ డిజైనర్ వినూత్నంగా వెదురు బొంగులతో ఓ సైకిల్‌ను రూపొందించాడు. పర్యావరణానికి ఏ మాత్రం హాని కలగకుండా ఉండేలా బైస్కిల్ బాడీ ఫ్రేమ్‌ను వెదురు బొంగులతో రూపొందించాడు. ముందు ఫోర్క్, హ్యాండిల్స్‌కు మాత్రం మెటల్‌ను ఉపయోగించి తయారు చేసిన ఈ సైకిల్‌ను సిటీ రోడ్లపై రయ్.. రయ్.. మంటూ పరుగులు పెట్టిస్తూ చూపరులను ఆశ్చర్యాని గురిచేస్తున్నాడు.

పూర్తిగా చేతుల్తో బ్యాంబూ(వెదురు బొగుల)లను ఉపయోగించి డిజైన్ చేసిన ఈ 'బ్యామ్‌బైక్'ను తయారు చేయడానికి శర్మకు దాదాపు 10 రోజుల సమయం పట్టిందట. నాణ్యమైన, దృఢమైన వెదురు బొంగులను సేకరించి ఈ బైక్‌ను రూపొందించాడు. దీన్ని తయారు చేయడానికి ఆయనకు దాదాపు రూ. 30,000 ఖర్చయిందట. బొంగుల్తో చేసినదానికి ఇంత ఖర్చా..? అని శర్మను అడిగితే.. ఆయన చెప్పే సమాధానమేంటో తెల్సా... సైకిల్‌ను రూపొందించడమంటే ఎంతో శ్రమతో కూడుకున్న పని అని, ఇందుకు ఎక్కువ సమయాన్ని, శక్తిని వెచ్చించాల్సి వస్తుందని ఆయన చెబుతున్నాడు. మరి వెదురు బొంగులతో చేసిన ఈ బ్యామ్‌బైక్ గట్టిందా ఉంటుందా అనే కదా మీ అనుమానం. భద్రత విషయంలో ఎలాంటి ఢోకా లేదని, ఏప్రిల్ 2009 నుంచి తాను బైక్‌ని ఉపయోగిస్తున్నానని శర్మ చెబుతున్నాడు. అంతా బాగానే ఉంది కాని.. ధరే కాస్తంత ఎక్కువగా అనిపిస్తుంది కదూ..!