ఆసియా కప్ హీరో అభిషేక్ శర్మకు బంపర్ గిఫ్ట్.. దాని ధర, స్పెషాలిటీ తెలిస్తే షాక్ అవుతారు

ఆసియా కప్ 2025 ఫైనల్‌లో భారత్, పాకిస్థాన్‌పై అద్భుత విజయం సాధించగా ఈ టోర్నమెంట్‌లో భారత యువ బ్యాట్స్‌మెన్ అభిషేక్ శర్మ తన మెరుపు బ్యాటింగ్‌తో అందరి దృష్టిని ఆకర్షించాడు. నిలకడగా అద్భుతమైన ఇన్నింగ్స్‌లు ఆడిన అభిషేక్‌ను ప్లేయర్ ఆఫ్ ది టోర్నమెంట్‎గా ఎంపిక చేశారు. ఈ పురస్కారం కింద అతనికి బహుమతిగా ఒక లగ్జరీ HAVAL H9 SUV లభించింది. టయోటా ఫార్చ్యూనర్ వంటి కార్లకు గట్టి పోటీనిచ్చే ఈ SUV ధర, ప్రత్యేకతలు ఏంటి? అసలు ఈ కారు విశేషాలు తెలుసుకుంటే ఆశ్చర్యపోవడం ఖాయం.

ఆసియా కప్ 2025లో తన అద్భుత ప్రదర్శనతో భారత్‌కు విజయాన్ని అందించిన యువ క్రికెటర్ అభిషేక్ శర్మ ప్లేయర్ ఆఫ్ ది టోర్నమెంట్ అవార్డును గెలుచుకున్నారు. ఈ అసాధారణ విజయానికి గుర్తింపుగా, అతనికి ఒక అత్యంత విలాసవంతమైన, పవర్ఫుల్ HAVAL H9 SUV బహుమతిగా లభించింది. ఇది కేవలం అతని జీవనశైలిని మెరుగుపరచడమే కాకుండా, అతని అద్భుతమైన ప్రతిభకు ప్రతీకగా నిలుస్తుంది.

HAVAL H9 SUV భారత మార్కెట్‌లో ప్రస్తుతం విక్రయించబడటం లేదు. అయితే, అంతర్జాతీయ మార్కెట్‌లో దీని ధర సుమారు 1,42,200 సౌదీ రియాల్‌లు, ఇది భారత కరెన్సీలో దాదాపు 33.60 లక్షల రూపాయలు అవుతుంది. మీడియా నివేదికల ప్రకారం.. ఇది భారతదేశంలో లాంచ్ అయితే, ఎక్స్-షోరూమ్ ధర 25 నుండి 30 లక్షల రూపాయల మధ్య ఉండే అవకాశం ఉంది. ఈ SUV భారత మార్కెట్‌లో టయోటా ఫార్చ్యూనర్ వంటి పెద్ద SUVలకు గట్టి పోటీనిస్తుందని భావిస్తున్నారు.

ఈ పవర్ఫుల్ SUVలో 2.0-లీటర్ టర్బోచార్జ్డ్ పెట్రోల్ ఇంజిన్ ఉంది. ఇది దాదాపు 215 bhp పవర్, 324 Nm టార్క్‌ను ఉత్పత్తి చేస్తుంది. ఇందులో 8-స్పీడ్ ఆటోమేటిక్ గేర్‌బాక్స్ అమర్చబడింది. అంతేకాకుండా, ఇది 4-వీల్ డ్రైవ్ సిస్టమ్‌తో వస్తుంది, ఇది ఆఫ్-రోడింగ్‌కు అద్భుతమైన ఎంపికగా మారుతుంది. ఇది గ్యాసోలిన్ 91 ఫ్యూయల్ టైప్‌తో పనిచేస్తుంది. ఈ SUV ఇంజిన్ 380 Nm టార్క్‌ను కూడా అందిస్తుంది.

HAVAL H9 లగ్జరీ, అడ్వాన్సుడ్ ఫీచర్లతో నిండి ఉంది. సేఫ్టీ, సౌకర్యం రెండింటికీ ఇందులో ప్రత్యేక శ్రద్ధ తీసుకున్నారు. ఇది 7-సీటర్ లేఅవుట్‌తో కుటుంబ ప్రయాణాలకు అనుకూలంగా ఉంటుంది. ఇందులో 6 ఎయిర్‌బ్యాగ్‌లు, ABS, EBD, బ్లైండ్ స్పాట్ డిటెక్షన్, అడాప్టివ్ క్రూయిజ్ కంట్రోల్ సిస్టమ్ వంటి ఫీచర్లు ఉన్నాయి. ట్రాఫిక్ జామ్‌లలో కూడా ఒత్తిడి లేకుండా డ్రైవింగ్ చేయడానికి సహాయపడుతుంది. 360-డిగ్రీ కెమెరా, పార్కింగ్ అసిస్ట్ ఫీచర్ ఉంది.

మల్టీ-డ్రైవ్ మోడ్‌లు ఉన్నాయి. ఆటో, ఎకో, స్పోర్ట్, సాండ్, స్నో, మడ్, 4L మోడ్ వంటివి ఏ వాతావరణంలోనైనా అద్భుతమైన పనితీరును అందిస్తాయి. ఇంటీరియర్లో ఆండ్రాయిడ్ ఆటో, ఆపిల్ కార్‌ప్లే సపోర్ట్‌తో 14.6 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్ ఉంది. డ్రైవర్ కోసం ప్రత్యేకంగా డిజైన్ చేయబడిన లెదర్ మెమరీ సీట్లు, సౌకర్యానికి అనుగుణంగా సర్దుబాటు చేసుకునే సదుపాయం ఉంటుంది.

వేసవిలో కూడా సీట్లు చల్లగా, సౌకర్యవంతంగా ఉంటాయి. మసాజ్ ఫీచర్ డ్రైవింగ్‌ను మరింత రిఫ్రెషింగ్‌గా చేస్తుంది. పనోరమిక్ సన్‌రూఫ్,10 స్పీకర్ల సౌండ్ సిస్టమ్, వైర్‌లెస్ ఛార్జర్ వంటివి కూడా ఇందులో ఉన్నాయి.

HAVAL అనేది చైనీస్ ఆటోమొబైల్ కంపెనీ గ్రేట్ వాల్ మోటార్ (GWM) కి చెందిన బ్రాండ్. ఇది క్రాసోవర్, ఎస్యూవీ విభాగంలో ప్రపంచవ్యాప్తంగా మంచి పేరు సంపాదించుకుంది. 2013 మార్చిలో GWM ఉత్పత్తి శ్రేణి నుండి HAVAL ఒక స్వతంత్ర బ్రాండ్‌గా అవతరించింది. అభిషేక్ శర్మకు లభించిన ఈ SUV, అతని కెరీర్‌లో ఒక ముఖ్యమైన మైలురాయిగా నిలుస్తుంది. ఇది కేవలం ఒక కారు మాత్రమే కాదు, అతని అంకితభావం, ప్రతిభకు లభించిన గుర్తింపు.