ఒక హీరో సాధారణ మారుతి కారు కొనగలడా? సోషల్ మీడియాలో వైరల్ అవుతున్న ఫొటోలు

సెలబ్రిటీలు ఎప్పుడూ లగ్జరీ కార్లు, ప్రీమియం బైక్‌లు, ఖరీదైన ఆస్తులు వంటివి కొనుగోలు చేస్తారని మనం ఊహించుకుంటాం. కానీ అందరికీ అది వర్తించదు. కొందరు నటులు చాలా సాధారణమైన జీవనశైలిని అనుసరిస్తారు. అలాంటి వారిలో హర్షవర్ధన్ రాణే ఒకరు. హిందీ, తెలుగు సినిమాల్లో నటిస్తూ భారత్ వ్యాప్తంగా అభిమానులను సంపాదించుకున్న ఈ యంగ్ హీరో, ఎప్పుడూ ప్రత్యేకంగా నిలుస్తాడు. తెలుగులో తకిట తకిట, బ్రదర్ ఆఫ్ బొమ్మాళి, బెంగాల్ టైగర్, ఫిదా వంటి సినిమాల్లో నటించాడు. ఇదిలా ఉంటే ఇటీవల హర్షవర్ధన్ రాణే ఒక కొత్త కారు కొనుగోలు చేశాడు. అయితే అది మరే లగ్జరీ బ్రాండ్ కాదు, మన అందరికీ సుపరిచితమైన మారుతి సుజుకి నుంచి వచ్చిన జిమ్నీ ఎస్‌యూవీ (Jimny SUV). జిమ్నీ అనేది ఆఫ్-రోడ్ సాహసాలకు ప్రసిద్ధి చెందిన వాహనం.

దీన్నీ అడవులు, కొండలు, కష్టమైన రోడ్లు.. ఎక్కడైనా సులభంగా నడిపేయవచ్చు. కాంపాక్ట్ సైజులో ఉన్నప్పటికీ, దీని రగ్డ్ డిజైన్, శక్తివంతమైన ఇంజిన్ దీనిని ఒక ప్రత్యేక ఆఫ్-రోడర్‌గా నిలబెడతాయి. మారుతి జిమ్నీని ఎంచుకోవడం ద్వారా హర్షవర్ధన్ రాణే తనకు లగ్జరీ కంటే ప్రయోజనం, వినియోగం ముఖ్యమని మరోసారి నిరూపించాడు. విలాసవంతమైన కారుకు బదులుగా సాధారణ ఆఫ్‌రోడ్ మోడల్‌ను ఎంచుకోవడం గమనార్హం.

మారుతి సుజుకి జిమ్నీ గురించి మాట్లాడితే, ఇది ఎప్పటినుంచో ఆఫ్‌రోడ్ SUV సెగ్మెంట్‌లో ప్రత్యేక గుర్తింపు తెచ్చుకున్న మోడల్. ప్రస్తుతానికి ప్రారంభ ధర రూ. 12.76 లక్షలు, టాప్ వేరియంట్ ధర కూడా రూ. 14.96 లక్షలు మాత్రమే. ఈ ధరలు మారుతి సుజుకి అధికారిక వెబ్‌సైట్‌లో ఎక్స్-షోరూమ్ ప్రైస్‌లుగా నమోదు అయ్యాయి. భారత మార్కెట్లో జిమ్నీకి మహీంద్రా థార్ వంటి శక్తివంతమైన SUV లతో నేరుగా పోటీ ఉంది.

అయితే, సాధారణంగా చాలా మంది కస్టమర్లు జిమ్నీని కొంచెం ఖరీదైనదిగా భావిస్తారు. కాంపాక్ట్ SUV అయినా, దీని ధరలు ప్రజల్లో కొంచెం ఎక్కువేనా? అనే ప్రశ్నను లేవనెత్తాయి. అయితే, ఈ మధ్య హిందీ, తెలుగు చిత్ర పరిశ్రమలో ప్రసిద్ధి చెందిన నటుడు హర్షవర్ధన్ రాణే జిమ్నీని ఎంచుకోవడం నెటిజన్లలో మంచి చర్చకు దారితీసింది. విలాసవంతమైన బ్రాండ్లను కాకుండా, సింపుల్ SUVని కొనుగోలు చేయడం అతని నిర్ణయాన్ని మరింత ప్రత్యేకంగా చూపించింది.

ఒక హీరో కూడా జిమ్నీ లాంటి SUVనే ఇష్టపడుతున్నాడు అంటే దానిలో ఏదో ప్రత్యేకత ఉంటుందని అభిమానులు కామెంట్లు చేస్తున్నారు. హర్షవర్ధన్ రాణే తన కొత్త మారుతి సుజుకి జిమ్నీని కొనుగోలు చేసిన తర్వాత, తన ఆనందాన్ని సోషల్ మీడియాలో పంచుకున్నారు. తన అధికారిక ఇన్‌స్టాగ్రామ్ అకౌంట్‌లో జిమ్నీతో కలిసి ఉన్న ఫొటోలు పోస్ట్ చేయగా, అవి క్షణాల్లోనే వైరల్ అయ్యాయి. అభిమానులు, నెటిజన్లు ఈ ఫొటోలపై విపరీతంగా స్పందిస్తున్నారు.

ముఖ్యంగా, రాణే తన వ్యక్తిగత అభిరుచికి అనుగుణంగా జిమ్నీపై కొన్ని ప్రత్యేకమైన మార్పులు చేయడం మరింత హైలైట్‌గా మారింది. ఇంతకుముందు బాలీవుడ్ నటుడు ఫర్దీన్ ఖాన్ కూడా ఇదే మోడల్‌ను తన గ్యారేజ్‌లోకి తీసుకొచ్చాడు. తరచూ జిమ్నీని నడిపే ఫర్దీన్ స్టైలిష్ లుక్‌లో కనిపించేవాడు. దీనివల్ల, స్టార్ హీరోలు కూడా జిమ్నీ లాంటి ఆఫ్-రోడ్ SUVకి ఫిదా అవుతున్నారని చెప్పుకోవచ్చు.

మారుతి సుజుకి జిమ్నీ ఇంజిన్ పరంగా కూడా ప్రత్యేకతను కలిగి ఉంది. ఇందులో ఇచ్చిన 1.5-లీటర్ నేచురల్లీ ఆస్పిరేటెడ్ పెట్రోల్ ఇంజిన్ గరిష్టంగా 103 bhp శక్తిను, 134 Nm పీక్ టార్క్‌ను ఉత్పత్తి చేస్తుంది. కస్టమర్ల కోసం 5-స్పీడ్ మాన్యువల్ గేర్‌బాక్స్‌తో పాటు, 4-స్పీడ్ ఆటోమేటిక్ వేరియంట్ కూడా అందుబాటులో ఉంది. అదనంగా, అడ్వెంచర్ ప్రేమికులను దృష్టిలో పెట్టుకుని, 4-వీల్ డ్రైవ్ సిస్టమ్‌ను ఇందులో ప్రామాణికంగా అందిస్తున్నారు.