ఫోన్ మాట్లాడుతూ డ్రైవింగ్ చేసే వారి ఆటకట్టు: ఆపిల్ ఐఒఎస్‌లో కొత్త ఫీచర్

కాలిఫోర్నియాలోని శాన్ జోస్‌లో జరుగుతున్న ప్రపంచవ్యాప్తంగా ఉన్న టెక్ డెవలపర్ల సదస్సులో ప్రఖ్యాత టెక్ దిగ్గజ ఆపిల్ తమ డివైజ్‌ల కోసం అభివృద్ది చేసిన నూతన శ్రేణి ఉత్పత్తులను మరియు ఫీచర్లను ఆవిష్కరించింది.

ఈ ఆవిష్కరణల్లో తమ భవిష్యత్ ఐఒఎస్ 11 కోసం 'డ్రైవింగ్ చేస్తున్నపుడు డిస్టర్బ్ చేయవద్దు' అనే ఫీచర్‌ (Do not disturb while driving)ను కూడా అభివృద్ది చేసి, ఆవిష్కరించింది.

ఫోన్ మాట్లాడుతూ డ్రైవింగ్ చేస్తున్నపుడు జరిగే రోడ్డు ప్రమాదాలు రేటు అధికంగా ఉన్న సంగతి అందరికీ తెలిసిందే. జాతీయ భద్రతా మండలి తెలిపిన గణాంకాల మేరకు ఏడాదికి 16 లక్షల రోడ్డు ప్రమాదాలు ఫోన్ వివియోగించడం ద్వారా జరుగుతున్నాయి మరియు మొత్తం రోడ్డు ప్రమాదాల్లో ప్రతి నాలుగింటిలో ఒకటి ఫోన్ వినియోగించడం ద్వారా సంభవిస్తున్నట్లు వెల్లడించింది.

సాంకేతికంగా 'డ్రైవింగ్ చేస్తున్నపుడు డిస్టర్బ్ చేయవద్దు' అనే ఫీచర్‌ (Do not disturb while driving) పనితీరు గురించి తెలుసుకుంటే డ్రైవింగ్‌లో ఫోన్ మాట్లాడటాన్ని మరియు అలా జరిగే ప్రమాదాలను శాస్వతంగా అరికట్టవచ్చు.

ఈ ఫీచర్ గల ఆపిల్ ఫోన్‌లలో Do not disturb while driving మోడ్ ఆక్టివేట్ అయితే ఇది ఆటోమేటిక్‌గా అన్ని నోటిఫికేషన్లను సైలెంట్ మోడ్‌లోకి నెట్టేస్తుంది. స్క్రీన్‌ను కూడా ఆఫ్ చేస్తుంది. తద్వారా డ్రైవింగ్‌లో ఉన్నపుడు డ్రైవర్ దృష్టి ఫోన్ మీదకు కాకుండా రోడ్డు మీదే ఉంటుంది.

ఆపిల్ మరో ఆప్షన్‌ కూడా కల్పించింది. Do not disturb while driving మోడ్‌లో ఉన్నపుడు మీరు డ్రైవింగ్ చేస్తున్నారనే విషయాన్ని మీ కాంటాక్ట్ లిస్ట్‌లో ఉన్న ఫేవరెట్ ఫోన్ నెంబర్లకు మెసేజ్ రూపంలో పంపిస్తుంది. రైడర్ గమ్యస్థానానికి చేరే వరకు స్పందించడు అనే సమాచారాన్ని కూడా చేరవేస్తుంది.

డ్రైవింగ్ చేయకుండా కారులో ఎక్కువ సమయం పాటు ఉన్నట్లయితే ఐఫోన్ లోని సెన్సార్లు మీరు డ్రైవ్ చేయలేదని గుర్తిస్తాయి. ఆ సమయంలో మీరు కల్పించింది. Do not disturb while driving నోటిఫికేషన్ పొందుతారు. కావాలనిపిస్తే ఆక్టివేట్ చేసుకోవచ్చు. లేదంటే నేను డ్రైవింగ్ చేయలేదు (‘I'm not driving') అనే ఆప్షన్‌ను ఆక్టివేట్ చేయవచ్చు.

ఐఫోన్ 5ఎస్ మరియు దీనికన్నా పై స్థానంలో ఉన్న ఫోన్‌లకు, ఆరవ జనరేషన్ ఐపోడ్ టచ్ మరియు ఈ మధ్యనే అందుబాటులోకి వచ్చిన ఐప్యాడ్ మోడళ్లలో ఈ సరికొత్త ఐఒఎస్ 11 అప్‌డేట్స్ పొందవచ్చు. ఇక్కడ తెలిపిన డివైజ్‌లలో ఐఒఎస్ 11 అప్‌డేట్ చేసుకుంటే Do not disturb while driving ఆప్షన్‌ పొందుతారు.

ప్రపంచ వ్యాప్తంగా ఆపిల్ ఉత్పత్తులను విరివిగా ఎంచుకుంటున్నారు కాబట్టి డ్రైవర్లకు ఇక మీదట డ్రైవింగ్ సమయంలో ఫోన్ మాట్లాడే అవకాశాన్ని ఆపిల్ ఏ మాత్రం ఇవ్వదని తెలుస్తోంది దీంతో ఈ కారణం చేత జరిగే రోడ్డు ప్రమాదాలను దాదాపుగా అరికట్టే అవకాశం ఉంది.