కోట్లు విలువ చేసే లగ్జరీ బస్సులో ఒబామా 'బస్సు యాత్ర'

ప్రస్తుతం బరాక్ ఒబామా ఉపయోగిస్తున్న పొడవాటి అధ్యక్ష కారు (క్యాడిలాక్) మాదిరగానే ఈ బస్సును కూడా అత్యాధునిక సాంకేతిక పరిజ్ఞానంతో అత్యంత సురక్షితంగా ఉండేలా డిజైన్ చేశారు. ఈ బస్సులో ఓ మీటింగ్ రూమ్, ఒక రెస్ట్ రూమ్, బ్లడ్ బ్యాంక్, ఆహారాన్ని అందించేందుకు చిన్న పాటి ప్యాంట్రీ వంటి ఎన్నో వసతులు ఉన్నాయి. ఇందులో శాటిలైట్ కమ్యూనికేషన్ సిస్టమ్ కూడా ఉంది. చెప్పడం అవసరం లేకపోయినా ఈ బస్సు కూడా ది బీస్ట్ (ఒబామా వాడే కారు ముద్దు పేరు) మాదిరిగానే బాంబ్ ప్రూఫ్, బుల్లెట్ ప్రూఫ్, కెమికల్ అటాక్ ప్రూఫ్, పంక్చర్ ప్రూఫ్ టైర్లతో అధ్యక్షుడిని అత్యంత భధ్రంగా రక్షిస్తుంది.

ఈ బస్సును కెనడాకు చెందిన మోటార్ కోచ్ బిల్డర్ ప్రెవోస్ట్ కంపెనీ రూపొందించగా, ఇందులోని ఇంటీరియర్లను నాష్‌విల్లేకు చెందిన హెమ్‌ఫిల్ బ్రదర్స్ కో డిజైన్ చేసింది. మరి ఈ బస్సు ధర ఎంతో తెలుసా కేవలం 1.1 మిలియన్ (11 లక్షలు) అమెరికన్ డాలర్లు మాత్రమే. అంటే మన దేశ కరెన్సీలో సుమారు ఐదు కోట్ల రూపాయాలు అన్నమాట. ఇలాంటిదే మరొక బస్సు అమెరికా సీక్రెట్ సర్వీస్ వద్ద ఉన్నట్లు సమాచారం. దీనిని 2012లో రిపబ్లికన్ అధ్యక్ష పదవికి ఎన్నికయ్యే వారికి కేటాయించనున్నట్లు తెలుస్తోంది. ఒబామా ఈ బస్సులో వెళ్తున్నప్పుడు అతని కాన్వాయ్‌లో దాదాపు రెండు డజన్లకు పైగా వాహానాలు ఈ బస్సుకు ముందు మరియు వెనుక ఫాలో అవుతుంటాయి. మరి ఒబామానా మజాకా..!!