ఫైవ్ స్టార్ సేఫ్టీ కావాలంటే కంపెనీలు ఇకపై చమటోడ్చాల్సిందే..భవిష్యత్ కార్ల సేఫ్టీ కోసం ప్రభుత్వం సంచలన మార్పులు

ఈ రోజుల్లో కొత్త వాహనం కొనుగోలు చేయాలనుకునే ప్రతి ఒక్కరూ సేఫ్టీకి అధిక ప్రాధాన్యత ఇస్తున్నారు. ముఖ్యంగా ఫైవ్ స్టార్ సేఫ్టీ రేటింగ్ ఉన్న కార్లకు షోరూమ్‌లలో విపరీతమైన డిమాండ్ ఉంది. భారతదేశం సొంత క్రాష్ టెస్ట్ అయిన భారత్ NCAP (New Car Assessment Program) వచ్చిన తర్వాత, అనేక వాహనాలు పరీక్షలు చేయించుకుని ఫైవ్ స్టార్ రేటింగ్‌ను పొందాయి.

అయితే, ఇప్పుడు ఈ రేటింగ్ పరిధిని విస్తృతం చేయడానికి భారత ప్రభుత్వం (రోడ్డు రవాణా,రహదారుల మంత్రిత్వ శాఖ) ప్రస్తుతం ఉన్న భద్రతా ప్రమాణాలలో కీలక మార్పులు చేయాలని ప్రతిపాదించింది. మంత్రిత్వ శాఖ విడుదల చేసిన కొత్త ముసాయిదా ప్రకారం పాత పద్ధతులకు మించి, మోడ్రన్ కార్లలోని యాక్టివ్, పాసివ్ సేఫ్టీ సిస్టమ్‎లను అంచనా వేయడానికి BNCAP చట్రంలో మార్పులు తీసుకురానున్నారు.

ఇకపై కార్లు కేవలం ప్రమాదాల నుంచి ప్రయాణికులను కాపాడటమే కాకుండా, ప్రమాదాలు జరగకుండా నివారించడానికి, ప్రమాదం తర్వాత ప్రయాణికులకు తగిన సహాయం అందించడానికి కూడా వీలుగా ఉండాలి.

ఒక వెహికల్ మొత్తం సేఫ్టీ రేటింగును ఐదు ప్రధాన పరీక్షల ద్వారా నిర్ణయించాలని ప్రతిపాదించారు. అవి: 1. సురక్షిత డ్రైవింగ్ (Safe Driving), 2. ప్రమాదం నివారణ (Accident Avoidance), 3. క్రాష్ రక్షణ (Crash Protection), 4. దుర్బల రోడ్డు నుంచి వినియోగదారుల రక్షణ (Vulnerable Road User Protection), 5. ప్రమాదం అనంతర భద్రత (Post-Crash Safety).

ఈ ఏడాది ప్రారంభంలోనే ADAS (Advanced Driver Assistance Systems) టెక్నాలజీలో కొన్ని మార్పులు చేశారు. డ్రైవర్లకు సహాయపడే లేన్-కీప్ అసిస్ట్, అడాప్టివ్ క్రూయిజ్ కంట్రోల్, ఆటోమేటిక్ ఎమర్జెన్సీ బ్రేకింగ్ వంటి ఇంటెలిజెంట్ ఫీచర్లు ADASలో ఉంటాయి. ప్రస్తుతం భారతదేశంలో లెవెల్ 2 ADAS టెక్నాలజీ అందుబాటులో ఉన్నప్పటికీ, వినియోగదారుల అంచనాలకు అనుగుణంగా మార్పులు అవసరం.

కొత్త నివేదికల ప్రకారం, కార్ల తయారీదారులు తమ వాహనాలకు 5-స్టార్ రేటింగ్ పొందాలంటే మెరుగైన ADAS టెక్నాలజీతో పాటు పైన చెప్పిన కొత్త 5 సూచనలను కూడా తప్పనిసరిగా పాటించాల్సి ఉంటుంది. ఈ పరిణామం భారతీయ కార్లు అంతర్జాతీయ స్థాయిలో ఉన్నత భద్రతా ప్రమాణాలకు అనుగుణంగా ఉండేలా చేస్తుంది.

ఈ కొత్త నిబంధనల నేపథ్యంలో టాటా మోటార్స్ ఎంట్రీ-లెవల్ ఎలక్ట్రిక్ మోడల్ అయిన టాటా పంచ్ ఈవీ గురించి చర్చించుకోవాలి. ఈ కారు భారత్ NCAPలో ప్రయాణీకుల రక్షణలో 32కి 31.46 పాయింట్లు సాధించింది, అలాగే పిల్లల రక్షణలో 49కి 45.00 పాయింట్లు సాధించింది.

అన్ని వేరియంట్లలో ఆరు ఎయిర్‌బ్యాగ్‌లు, యాంటీ-లాక్ బ్రేకింగ్ సిస్టమ్ (ABS), ఎలక్ట్రానిక్ స్టెబిలిటీ కంట్రోల్ (ESC) వంటి సేఫ్టీ ఫీచర్లను పంచ్ EV అందిస్తోంది. జెన్ 2 ఈవీ ఆర్కిటెక్చర్ (లేదా యాక్టి.ఈవీ ప్లాట్‌ఫామ్) ఆధారంగా వచ్చిన ఈ కారు, భవిష్యత్తులో రాబోయే కఠినమైన ప్రమాణాలకు కార్లు ఎంతవరకు సిద్ధంగా ఉండాలో సూచిస్తోంది. పంచ్ ఈవీ ఐదు వేరియంట్లలో, ఐదు రంగులలో, మిడ్ రేంజ్, లాంగ్ రేంజ్ రెండు వెర్షన్లలో అందుబాటులో ఉంది.