స్నేహం ముందు తలవంచిన కరోనా.. అసలు విషయం ఏంటంటే?

కరోనా కష్ట కాలంలో బయటకు వెళ్లడానికే భయపడుతున్న ఈ కాలంలో ఉత్తరప్రదేశ్ లో ఒక వ్యక్తి మాత్రం తన స్నేహితుడి కోసం చాలా రిస్క్ చేశాడు. అతడు స్నేహితుని కోసం చేసిన సాహసానికి ఎంతోమంది ప్రశంసల వర్షం కురిపిస్తున్నారు.

నివేదికల ప్రకారం దేవేంద్ర అనే వ్యక్తి టీచర్‌గా పని చేస్తూ జార్ఖండ్‌లోని బొకారోలో నివాసం ఉతున్నాడు. దేవేంద్ర స్నేహితుడు రంజన్ అగర్వాల్ ఢిల్లీలోని ఐటీ కంపెనీలో ఉద్యోగం చేస్తున్నాడు. అయితే ఇటీవల రంజన్ అగర్వాల్ కరోనా మహమ్మారి బారిన పడ్డాడు. కుటుంబసభ్యులు అతడిని నోయిడాలోని ఆసుపత్రికి తరలించారు.

రంజన్ అగర్వాల్ కరోనా వైరస్ కారణంగా శ్వాస తీసుకోవడం చాలా కష్టంగా మారింది. ప్రస్తుతం దేశ వ్యాప్తంగా చాలా నగరాల్లో ఆక్సిజన్ కొరత ఉంది. నోయిడా కూడా ఆక్సిజన్ కొరత ఉన్న కారణంగా హాస్పిటల్ సిబ్బంది, రంజన్ అగర్వాల్ కుటుంబసభ్యులకు ఆక్సిజన్ సిలిండర్ లేకుంటే ఏమి చేయలేమని చెప్పేసారు.

రంజన్ అగర్వాల్ కుటంబసభ్యులకు ఏమిచేయాలో దిక్కుతోచలేదు. ఆ సమయంలో రంజన్ అగర్వాల్ కుటుంబసభ్యులకు అతని ఫ్రెండ్ దేవేంద్ర గుర్తుకు వచ్చాడు. వెంటనే దేవేంద్రకు ఫోన్ చేసి జరిగిన విషయం మొత్తం చెప్పారు. విషయం తెలుసుకున్న దేవేంద్ర ఏ మాత్రం ఆలస్యం చేయకుండా వెంటనే స్పందించాడు.

దేవేంద్ర వెంటనే జార్ఖండ్ లోని ఆక్సిజన్ ప్లాంట్‌కు వెళ్లి 10,000 రూపాయలు పెట్టి ఆక్సిజన్ సిలిండర్ కొన్నాడు. దాన్ని తన కారులో పెట్టుకుని స్నేహితుని వద్దకు బయలుదేరాడు. రాష్ట్రాలు దాటుకుంటూ ఏకంగా 1,400 కిలోమీటర్లు ప్రయాణం చేశాడు. చివరికి నోయిడా చేరుకున్నాడు.

దేవేంద్ర తన స్నేహితుడు చికిత్స పొందుతున్న ఆసుపత్రికి వెళ్లి ఆక్సిజన్ సిలిండర్ అందించి అలా తన ఫ్రెండ్ ని కాపాడుకున్నాడు. నిజమైన స్నేహితుడు అంటే ఇలా ఉండాలని చాలామంది దేవేంద్రను పొగడ్తలతో ముంచెత్తారు. మిత్రుడి కోసం దేవేంద్ర చేసిన రిస్క్‌ నిజంగా ప్రశంసనీయం. దేవేంద్ర లాంటి ఫ్రెండ్ ఉన్న రంజన్ అగర్వాల్ నిజంగా అదృష్టవంతుడు చాలామంది కామెంట్స్ పెడుతున్నారు.

Note: Images are representative purpose Only.