రంగులు గుర్తించలేకపోతే డ్రైవింగ్ చేయకూడదా?.. కలర్ బ్లైండ్‌నెస్ ఉన్నవారికి కూడా డ్రైవింగ్ లైసెన్స్ వస్తుందా? 

కారు నడుపుతున్నప్పుడు డ్రైవింగ్ లైసెన్స్ చాలా ముఖ్యం. డ్రైవింగ్ లైసెన్స్‌కు సంబంధించి అనేక రూల్స్ కూడా ఉన్నాయి. ఇలాంటి పరిస్థితుల్లో కొందరిలో ఓ ప్రశ్న తలెత్తుతుంది. కలర్ బ్లైండ్‌నెస్ ఉన్నవారికి డ్రైవింగ్ లైసెన్స్ లభిస్తుందా? దీనికి సంబంధించిన నియమాలు ఏమిటో వివరంగా తెలుసుకుందాం.

ముందుగా కలర్ బ్లైండ్‌నెస్ అంటే ఏమిటో చూద్దాం. ఇది ఒక వ్యక్తికి కొన్ని రంగులను, ముఖ్యంగా ఎరుపు, ఆకుపచ్చ రంగుల మధ్య తేడాను గుర్తించడంలో ఇబ్బంది కలిగించే పరిస్థితి. ఇది ఒక వ్యాధి కాదు, కేవలం ఒక రకమైన దృష్టి లోపం.

కలర్ బ్లైండ్‌నెస్ అంటే రంగులను సరిగ్గా గుర్తించలేకపోవడం. ఇది సాధారణంగా జన్యుపరమైన సమస్య. అంటే పుట్టుకతోనే వస్తుంది. ప్రపంచంలోని చాలా మందికి ఎరుపు, ఆకుపచ్చ రంగులను గుర్తించడంలోనే సమస్య ఉంటుంది. ఉదాహరణకు, ఎరుపు రంగును ఆకుపచ్చగా లేదా ఆకుపచ్చ రంగును ఎరుపుగా చూడడం జరుగుతుంది. ఇది దృష్టిలోపమే కానీ, పూర్తిగా అంధత్వం కాదు. అంటే, ఆ వ్యక్తికి రంగులు తప్ప మిగిలినవన్నీ సాధారణంగానే కనిపిస్తాయి.

ఇప్పుడు అసలు ప్రశ్న ఏమిటంటే.. ఈ పరిస్థితిలో ఒక వ్యక్తి డ్రైవింగ్‌కు సరిపోతాడా? భారతదేశంలో డ్రైవింగ్ లైసెన్స్ నియమాలను మోటారు వెహికల్ యాక్ట్, కేంద్ర మోటారు వాహన నియమాలు నిర్ణయిస్తాయి. ఈ నిబంధనల ప్రకారం.. ఒక వ్యక్తి దృష్టి సరిగ్గా ఉండాలి, తద్వారా అతను రోడ్డుపై వచ్చే వాహనాలను సరిగ్గా చూడగలడు.. అర్థం చేసుకోగలడు.

అయితే, కలర్ బ్లైండ్‌నెస్ ఉన్నవారికి సాధారణంగా లెర్నర్ లైసెన్స్, పర్మనెంట్ డ్రైవింగ్ లైసెన్స్ రెండింటికీ అనుమతిస్తారు. అయితే, వారి సాధారణ దృష్టి సరిగ్గా ఉండాలి. సులభంగా చెప్పాలంటే, ఒక వ్యక్తికి రంగులను గుర్తించడంలో సమస్య ఉన్నప్పటికీ, సాధారణంగా రోడ్డు గుర్తులు, కార్లు, పాదచారులు , ట్రాఫిక్‌ను సరిగ్గా చూడగలిగితే, అతన్ని డ్రైవింగ్‌కు అన్‌ఫిట్‌గా పరిగణించరు.

ట్రాఫిక్ లైట్లు, కలర్ బేస్ డ్ సిగ్నల్స్ గుర్తించడానికి కలర్ బ్లైండ్‌నెస్ ఉన్న వ్యక్తికి మరింత జాగ్రత్త అవసరం కావచ్చు. అయితే, ప్రస్తుత ట్రాఫిక్ సిస్టమ్‌లలో రంగులతో పాటు ఆకారం, పొజిషన్, సౌండ్ ఇండికేషన్స్ కూడా ఉంటాయి. ఇవి వాటిని గుర్తించడంలో సహాయపడతాయి.

అయినప్పటికీ, కొన్ని ప్రత్యేక పరిస్థితులలో ఉదాహరణకు హెవీ వెహికల్స్ నడపడానికి లైసెన్స్ కోసం కలర్ బ్లైండ్‌నెస్ ఒక అడ్డంకి కావచ్చు. ఈ సందర్భాలలో మెడికల్ ఫిట్‌నెస్ సర్టిఫికేట్ తప్పనిసరి చేశారు. కాబట్టి భారతదేశంలో లో లెవల్ నుండి మీడియం లెవల్ కలర్ బ్లైండ్‌నెస్ ఉన్న వ్యక్తికి పర్సనల్ వెహికల్ నడపడానికి డ్రైవింగ్ లైసెన్స్ లభించవచ్చు. వారి సాధారణ దృష్టి సరిగ్గా ఉండి, ట్రాఫిక్ సాధారణ సంకేతాలను అర్థం చేసుకోగలిగితే ఇది సాధ్యమవుతుంది.

మీకు కలర్ బ్లైండ్‌నెస్ ఉండి, లైసెన్స్ కోసం దరఖాస్తు చేయాలనుకుంటే మెడికల్ ఫిట్‌నెస్ సమయంలో మీ పరిస్థితిని స్పష్టంగా చెప్పడం చాలా ముఖ్యం. ఇది మీకు లైసెన్స్ పొందడంలో సహాయపడుతుంది. రోడ్డుపై మీ భద్రతను కూడా పెంచుతుంది.

డ్రైవ్‌స్పార్క్ అభిప్రాయం: కలర్ బ్లైండ్‌నెస్ ఉన్నవారికి డ్రైవింగ్ లైసెన్స్ ఇవ్వడం అనేది అడ్వాన్స్డ్ ట్రాఫిక్ సిస్టమ్‌ల ద్వారా సాధ్యమవుతోంది. అయితే, డ్రైవర్లు తమ దృష్టి లోపాలను గురించి అధికారులకు స్పష్టంగా తెలియజేయడం, రోడ్డుపై మరింత అప్రమత్తంగా ఉండటం చాలా ముఖ్యం. సేఫ్టీ ప్రధానం కాబట్టి, డ్రైవింగ్‌కు సంబంధించిన అన్ని నిబంధనలను పాటించడం ఎల్లప్పుడూ అవసరం.