కొత్త కారు కొంటున్నారా ? ధర చూసి మోసపోవద్దు.. కొనే ముందు ఈ విషయాలు అస్సలు మర్చిపోవద్దు

కారు కొనుగోలు అనేది చాలా మందికి ఒక కల. కానీ ఆ కలను నిజం చేసుకునే క్రమంలో చాలా మంది కొన్ని ముఖ్యమైన విషయాలను పట్టించుకోరు. ముఖ్యంగా మీరు మొదటిసారి కారు కొంటున్నట్లయితే, మొత్తం ఖర్చును అర్థం చేసుకోవడం చాలా అవసరం. టీవీల్లో, వార్తల్లో తరచుగా కారు ఎక్స్-షోరూమ్ ధరల గురించి మాత్రమే చెబుతారు. కానీ కారు కొనడం అనేది కేవలం ఎక్స్-షోరూమ్ ధరతో ముడిపడి ఉండదు.

మీరు బీమా, మెయింటెనెన్స్, ఇంధనం, వివిధ రకాల పన్నులను కూడా పరిగణనలోకి తీసుకోవాలి. ఏదైనా కారు ఆన్-రోడ్ ధర మనం అనుకున్న ఎక్స్-షోరూమ్ ధర కంటే కొన్ని లక్షలు ఎక్కువగా ఉంటుంది. ఈ అదనపు ఖర్చుల గురించి తెలుసుకోవడం వల్ల మీ కారు కొనుగోలును మరింత సమర్థవంతంగా ప్లాన్ చేసుకోవచ్చు.

ప్రారంభ ఖర్చులు: కారు కొనుగోలులో ముందుగా వచ్చే ఖర్చులలో డౌన్ పేమెంట్, ఆర్టీఓ (RTO) రిజిస్ట్రేషన్ ఫీజులు ఉంటాయి. మీరు చెల్లించే డౌన్ పేమెంట్ మీ లోన్ మొత్తాన్ని, దాని వడ్డీని నిర్ణయిస్తుంది. రిజిస్ట్రేషన్ ఫీజులు రాష్ట్రం నుండి రాష్ట్రానికి మారుతూ ఉంటాయి. కచ్చితమైన వివరాల కోసం మీరు మీ దగ్గర ఉన్న ఆర్టీఓ కార్యాలయాన్ని సంప్రదించవచ్చు.

ఇన్సూరెన్స్ ఖర్చులు: భారతదేశంలో కారు ఇన్సూరెన్స్ తప్పనిసరి. మీరు ఏ రకం కారు కొంటున్నారు. అది ఎప్పుడు తయారు చేశారు. మీరు ఎక్కడ నివసిస్తున్నారు అనే దానిపై ఆధారపడి ఇన్సూరెన్స్ ప్రీమియం మొత్తం మారుతుంది. మంచి ఇన్సూరెన్స్ ప్లాన్ కోసం వివిధ కంపెనీల ప్లాన్‌లను పోల్చి చూసుకోవడం మంచిది. దీనివల్ల ప్రతి సంవత్సరం కొంత డబ్బు ఆదా చేసుకోవచ్చు.

మెయింటెనెన్స్, రిపేర్లు : మీ కారును సక్రమంగా నడపడానికి క్రమం తప్పకుండా మెయింటెనెన్స్ అవసరం. ఏ బ్రాండ్ కారు అయినా, కాలానుగుణంగా ఆయిల్, టైర్లు మార్చడం, బ్రేక్‌లను సరిచూసుకోవడం వంటివి చేయాల్సి ఉంటుంది. ఊహించని రిపేర్లు కూడా రావచ్చు. కాబట్టి ఈ ఖర్చులను మీరు భరించగలరా లేదా అనేది కారు కొనేముందే నిర్ధారించుకోవాలి.

ఇంధన ఖర్చులు: పెట్రోల్/డీజిల్ ధరలు తరచుగా మారుతుంటాయి. మీ కారు మైలేజ్, ఫ్యూయెల్ కెపాసిటీని బట్టి మీ నెలవారీ ఇంధన ఖర్చును లెక్కించుకోవాలి. ఇది మీ నెలవారీ బడ్జెట్‌ను సమర్థవంతంగా నిర్వహించడానికి సహాయపడుతుంది. మీరు ఎలక్ట్రిక్ కారు కొనడం గురించి కూడా ఆలోచించవచ్చు.

ట్యాక్సులు, ఇతర ఫీజులు: భారతదేశంలో రోడ్డు పన్ను అనేది వాహనం కొనేటప్పుడు ఒకసారి చెల్లించే ఫీజు. ఇది కాకుండా, కారు విడుదల చేసే కాలుష్య స్థాయిలను తెలుసుకోవడానికి కొన్ని నెలలకోసారి చేయించే కాలుష్య నియంత్రణ పరీక్ష ఖర్చు, పార్కింగ్ ఫీజులు వంటి ఇతర ఖర్చులు కూడా ఉంటాయి. ఇవన్నీ కారును చట్టబద్ధంగా ఉపయోగించడానికి అవసరం.

ఈ ఖర్చులన్నింటినీ అర్థం చేసుకోవడం ద్వారా, కారును నడపడానికి మీరు ఆర్థికంగా సిద్ధంగా ఉన్నారని నిర్ధారించుకోవచ్చు. టెన్షన్ లేకుండా డ్రైవింగ్ చేయాలంటే మీ బడ్జెట్‌ను జాగ్రత్తగా ప్లాన్ చేసుకోవడం చాలా ముఖ్యం. రాబోయే సెప్టెంబర్ 22 తర్వాత భారతదేశంలో చాలా కార్ల ధరలు తగ్గే అవకాశం ఉంది. కాబట్టి ఆ తర్వాత కారు కొనడం సరైన నిర్ణయం కావచ్చు. అలాగే, దసరా, దీపావళి వంటి పండుగలు రాబోతున్నాయి కాబట్టి, కారు కంపెనీలు ఇచ్చే ఆఫర్‌లను ఉపయోగించుకోవచ్చు. కానీ, పాత స్టాక్ కార్లను ఆఫర్లలో కొనేటప్పుడు చాలా జాగ్రత్తగా ఉండాలి.