ప్రభుత్వ సంచలన నిర్ణయం.. ఎలక్ట్రిక్ వాహనదారులకు గుడ్ న్యూస్.. ఈవీ అయితే టోల్ కట్టనవసరం లేదు

సుదూర ప్రయాణాలు చేసే చాలామందికి టోల్ ప్లాజాలు తలనొప్పిగా మారాయి. అయితే ఇప్పుడు వార్షిక పాస్ తీసుకుంటే భారతదేశంలో ఎక్కడికైనా ధైర్యంగా, ఎలాంటి టెన్షన్ లేకుండా ప్రయాణించవచ్చు. అయితే, రాష్ట్ర ప్రభుత్వం ఎలక్ట్రిక్ వాహనాల యజమానులకు టోల్ లేకుండా ప్రయాణించే సదుపాయాన్ని కల్పించింది.

ఆగస్టు 22 నుండి అమల్లోకి వచ్చిన సర్క్యులర్ ప్రకారం, మీరు ఈవీ యజమాని అయితే టోల్ ప్లాజాల వద్ద పూర్తిగా ఉచితంగా ప్రయాణించవచ్చు. ఈ నిర్ణయం ప్రజలలో ఎలక్ట్రిక్ వాహనాల పట్ల ఆసక్తి పెంచడం ద్వారా కాలుష్యాన్ని తగ్గించే ప్రణాళికలో ఒక భాగం అని చాలామంది అభిప్రాయపడుతున్నారు.

ఈ టోల్ మినహాయింపు మహారాష్ట్రలోని ముంబై-పూణే ఎక్స్‌ప్రెస్ వే, ముంబై-నాగ్‌పూర్ సమృద్ధి ఎక్స్‌ప్రెస్ వే, అటల్ సేతు లేదా ముంబై ట్రాన్స్ హార్బర్ లింక్ ద్వారా వెళ్లే ఈవీ యజమానులకు మాత్రమే వర్తిస్తుంది. ఏప్రిల్‌లో దీనికి సంబంధించిన ప్రకటన వచ్చినప్పటికీ, ఇప్పటివరకు టోల్ వసూలు చేస్తున్నారు. ఇప్పుడు ఈ నిర్ణయం ఆగస్టు 22 నుండి అధికారికంగా అమల్లోకి వచ్చింది.

ఈ టోల్ మినహాయింపు కొన్ని రకాల ఈవీలకు మాత్రమే వర్తిస్తుంది. ప్యాసెంజర్ ఎలక్ట్రిక్ కార్లు, ఎలక్ట్రిక్ స్టేట్ ట్రాన్స్‌పోర్ట్ బస్సులు, నగర ప్రజా రవాణా కోసం ఉపయోగించే ఎలక్ట్రిక్ వాహనాలన్నింటికీ ఈ మినహాయింపు వర్తిస్తుందని సర్క్యులర్‌లో స్పష్టంగా పేర్కొన్నారు. ఈ టోల్ మినహాయింపుతో ఎలక్ట్రిక్ వాహనాల అమ్మకాలు గణనీయంగా పెరగడం ఖాయమని భావిస్తున్నారు.

దేశవ్యాప్తంగా ఆగస్టు 15 నుండి ఫాస్ట్‌ట్యాగ్ వార్షిక పాస్ కూడా అమల్లోకి వచ్చింది. రూ. 3,000 చెల్లించి ఈ పాస్‌ను పొందితే, ఒక సంవత్సరంలో 200 సార్లు టోల్ ప్లాజాలను దాటవచ్చు. ఇది టోల్ ఖర్చును తగ్గించడమే కాకుండా, టోల్ బూత్‌ల వద్ద క్యూలో వేచి ఉండాల్సిన సమయాన్ని కూడా తగ్గిస్తుందని కేంద్ర రోడ్డు రవాణా, రహదారుల మంత్రిత్వ శాఖ తెలిపింది.

ఆగస్టు 15న సాయంత్రం 7 గంటల వరకు సుమారు 1.4 లక్షల మంది ఫాస్ట్‌ట్యాగ్ వార్షిక పాస్‌ను కొనుగోలు చేసినట్లు ప్రభుత్వం ప్రకటించింది. పాస్ కొనుగోలు చేసిన రాష్ట్రాల్లో తమిళనాడు మొదటి స్థానంలో ఉంది. కర్ణాటక, హర్యానా దాని తర్వాత ఉన్నాయి. ఎక్కువగా ఫాస్ట్‌ట్యాగ్ వార్షిక పాస్ లావాదేవీలు తమిళనాడు, కర్ణాటక, ఆంధ్రప్రదేశ్ రాష్ట్రాల్లోని టోల్ ప్లాజాల్లో నమోదయ్యాయి.

ఫాస్ట్‌ట్యాగ్ వార్షిక పాస్ కొనుగోలు చేయడానికి సహాయపడే రాజ్‌మార్గ్ యాత్ర యాప్‌కు గత కొన్ని రోజుల్లో 15 లక్షలకు పైగా డౌన్‌లోడ్‌లు వచ్చాయని రవాణా మంత్రిత్వ శాఖ వెల్లడించింది. గూగుల్ ప్లే స్టోర్‌లోని ట్రావెల్ విభాగంలో ఈ యాప్ రెండో స్థానానికి చేరుకుంది. ప్రస్తుతం అత్యధిక డౌన్‌లోడ్‌లు ఉన్న ప్రభుత్వ యాప్ ఇదేనని ప్రభుత్వం పేర్కొంది.

జాతీయ రహదారులు, ఎక్స్‌ప్రెస్ వేలలోని సుమారు 1,150 టోల్ ప్లాజాల్లో ఈ వార్షిక పాస్‌ను ఉపయోగించుకోవచ్చు. ఈ వార్షిక పాస్ కేవలం ప్రైవేట్ కార్ యజమానులకు మాత్రమే వర్తిస్తుందని, వాణిజ్య వాహనాలకు కాదని ప్రభుత్వం స్పష్టం చేసింది. టోల్ ఛార్జీలను తగ్గించడానికి కేంద్ర ప్రభుత్వం తీసుకున్న ఈ చర్యలకు దేశవ్యాప్తంగా మరింత ఆదరణ లభిస్తుందని ఆశిస్తున్నారు.