ఫాస్టాగ్ యూజర్లకు పండగే.. రేపటి నుంచి టోల్ ప్లాజాలో రూ.15తోనే దూసుకెళ్లొచ్చు

వాహనదారులకు కేంద్ర ప్రభుత్వం ఒక శుభవార్త చెప్పింది. ఆగస్టు 15 నుంచి దేశవ్యాప్తంగా ఫాస్టాగ్ యాన్యువల్ పాస్ పథకం ప్రారంభం కాబోతోంది. ఈ పాస్ తీసుకున్నవారు సంవత్సరమంతా టోల్ ప్లాజాల వద్ద ఎక్కువ డబ్బులు చెల్లించాల్సిన అవసరం ఉండదు. కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ ఈ పాస్‌ గురించి ప్రకటన చేశారు.

ఈ కొత్త యాన్యువల్ పాస్‌తో కేవలం రూ.15కే టోల్ ప్లాజాను దాటవచ్చని ఆయన తెలిపారు. ఈ పాస్ ధర రూ.3000 కాగా, ఇందులో 200 ట్రిప్‌లు ఉంటాయి. ఒక ట్రిప్ అంటే ఒకసారి టోల్ ప్లాజాను దాటడం. అంటే, ఒక్కో ట్రిప్‌కు కేవలం రూ.15 మాత్రమే ఖర్చవుతుంది. ఈ పాస్‌ను ఎక్కడ నుంచి పొందాలి, అది ఎలా పనిచేస్తుంది వంటి వివరాలు తెలుసుకుందాం.

ఫాస్టాగ్ యాన్యువల్ పాస్ అనేది ఒక రకమైన ప్రీపెయిడ్ టోల్ పథకం. దీన్ని ముఖ్యంగా కార్లు, జీపులు, వ్యాన్ల వంటి నాన్ కమర్షియల్ ప్రైవేట్ వాహనాల కోసం రూపొందించారు. 60 కిలోమీటర్ల పరిధిలోని టోల్ ప్లాజాల వద్ద ప్రయాణించే వారికి సులభమైన, సరసమైన టోల్ చెల్లింపులను అందించడమే ఈ పాస్ ముఖ్య ఉద్దేశ్యం అని నితిన్ గడ్కరీ తెలిపారు.

ఈ వార్షిక పాస్ లక్ష్యం టోల్ ప్లాజాల వద్ద ఎక్కువసేపు వేచి ఉండడాన్ని రద్దీని, వివాదాలను తగ్గించి, ప్రైవేట్ వాహన యజమానులకు వేగవంతమైన, సులభమైన ప్రయాణ అనుభవాన్ని ఇవ్వడం. ఈ పాస్ కోసం కొత్త ట్యాగ్ కొనుగోలు చేయాల్సిన అవసరం లేదు. ఇది మీ ప్రస్తుత ఫాస్టాగ్‎కు లింక్ అవుతుంది. కానీ దీనికి ఒక షరతు ఉంది. మీ ప్రస్తుత ఫాస్టాగ్ యాక్టివ్‌గా ఉండాలి. మీ వాహన రిజిస్ట్రేషన్ నంబర్‌తో అనుసంధానమై ఉండాలి.

ఈ పథకం NHAI, రోడ్డు రవాణా, రహదారుల మంత్రిత్వ శాఖ (MoRTH) కింద ఉన్న జాతీయ రహదారులు, ఎక్స్‌ప్రెస్‌వేలపై మాత్రమే వర్తిస్తుంది. ఈ పాస్ నాన్-ట్రాన్స్‌ఫరబుల్. దీన్ని కేవలం రిజిస్టర్డ్ వాహనంతో మాత్రమే ఉపయోగించగలరు. ఈ పాస్ ఉన్నవారు తరచుగా రీఛార్జ్ చేయాల్సిన అవసరం ఉండదు. ఇది నిత్యం ప్రయాణించే వారికి చాలా ఉపయోగపడుతుంది.

ఈ యాన్యువల్ పాస్ కేవలం NHAI ద్వారా నిర్వహించబడే జాతీయ రహదారులు, జాతీయ ఎక్స్‌ప్రెస్‌వేలు (NE)పై ఉన్న టోల్ ప్లాజాల వద్ద మాత్రమే పనిచేస్తుంది. ఉదాహరణకు, ఢిల్లీ-ముంబై ఎక్స్‌ప్రెస్‌వే, ముంబై-నాసిక్, ముంబై-సూరత్, ముంబై-రత్నగిరి మార్గాలపై ఇది వర్తిస్తుంది. రాష్ట్ర రహదారులు లేదా మున్సిపల్ టోల్ రోడ్లపై మీ FASTag యధావిధిగా పనిచేస్తుంది.

టోల్ సాధారణంగా వసూలు చేయబడుతుంది. ఉదాహరణకు, ముంబై-పూణే ఎక్స్‌ప్రెస్‌వే, ముంబై-నాగ్‌పూర్ ఎక్స్‌ప్రెస్‌వే (సమృద్ధి మహామార్గం), అటల్ సేతు, ఆగ్రా-లక్నో ఎక్స్‌ప్రెస్‌వే, బెంగళూరు-మైసూరు ఎక్స్‌ప్రెస్‌వే, అహ్మదాబాద్-వడోదర ఎక్స్‌ప్రెస్‌వే వంటివి రాష్ట్ర ప్రభుత్వాల ఆధ్వర్యంలో ఉంటాయి.

ఇండియన్ హైవే మేనేజ్‌మెంట్ కంపెనీ లిమిటెడ్ (IHMCL) ప్రకారం.. ఈ పాస్‌ను యాక్టివేట్ చేయడానికి ముందు మీ వాహనం, దానిపై ఉన్న FASTag అర్హతను ఆన్‌లైన్‌లో సరిచూసుకోవాలి. ఈ పాస్‌ను రాజ్ మార్గ్ యాత్ర మొబైల్ యాప్ లేదా NHAI పోర్టల్‌లో మాత్రమే యాక్టివేట్ చేసుకోగలరు. ఒకసారి వెరిఫికేషన్ పూర్తయిన తర్వాత రూ.3000 చెల్లించాలి. పేమెంట్ పూర్తయిన 2 గంటల్లోపు ఫాస్టాగ్ యాన్యువల్ పాస్ యాక్టివేట్ అవుతుంది.

ఈ పాస్ ధర రూ.3000, ఇందులో 200 ట్రిప్‌లు ఉంటాయి. ప్రస్తుతం 200 సార్లు టోల్ దాటడానికి సుమారు రూ.10,000 వరకు ఖర్చవుతుంది. కానీ ఈ కొత్త పథకంలో కేవలం రూ.3000 మాత్రమే ఖర్చవుతుంది. అంటే ప్రైవేట్ వాహన యజమానులకు సుమారు రూ.7000 ఆదా అవుతుంది. ఈ పాస్ ఒక సంవత్సరం వరకు చెల్లుబాటు అవుతుంది. ఒకవేళ మీరు సంవత్సరంలో 200 ట్రిప్‌లు పూర్తి చేస్తే, పాస్ గడువు ముగుస్తుంది. ఆ తర్వాత మీరు మళ్ళీ రీఛార్జ్ చేయించుకోవాలి.