నాలుగేళ్ల కష్టానికి ఫలితం.. ఒకప్పుడు షోరూమ్‌లో ఉద్యోగి.. ఈరోజు అదే షోరూమ్‌లో బైక్ యజమాని

ప్రతి ఒక్కరికీ తమ కలలను సాధించాలనే తపన ఉంటుంది. కానీ ఆ కలలు కొన్నిసార్లు దూరంగా కనిపించినప్పుడు చాలామంది వెనుదిరిగి వదిలేస్తారు. అయితే, కృషి చేయాలనే సంకల్పం, అంకితభావం ఉంటే ఏదైనా సాధ్యమే అని ఒక యువకుడు తన జీవితంతోనే నిరూపించాడు. తాజాగా అతను సోషల్ మీడియాలో పంచుకున్న కథనం ఇప్పుడు అందరికీ ప్రేరణగా మారుతోంది. ఒకప్పుడు హోండా షోరూమ్‌లో ఉద్యోగిగా పనిచేసిన ఈ యువకుడు, అదే షోరూమ్‌కు ఈసారి కస్టమర్‌గా తిరిగి వచ్చాడు. కారణం ఏమిటంటే, చాలా కాలంగా కలగా పెట్టుకున్న తనకు ఇష్టమైన హోండా CBR 650Rను తన సొంత డబ్బులతో కొనుగోలు చేయడం. తన కలల బైక్ ముందు నిలబడి తీసుకున్న ఆ ఫోటోలను అతను ఆనందంతో పంచుకున్నాడు. కష్టపడితే కలలు ఎంత పెద్దవైనా నిజమవుతాయనే సందేశాన్ని ఈ కథ అందరికీ గుర్తు చేస్తోంది.

2021లో హోండా బిగ్ వింగ్ షోరూమ్‌లో సేల్స్ విభాగంలో రిలేషన్‌షిప్ మేనేజర్‌గా పనిచేసిన యువకుడు, అప్పట్లో ఇతరులకు బైక్ ఎంచుకోవడంలో సహాయం చేస్తూ నాలుగేళ్లు గడిపాడు. కానీ తన మనసులో మాత్రం ఎప్పటినుంచో ఒక చిన్న కలను దాచుకున్నాడు, అదే, తన సొంతంగా హోండా CBR 650R బైక్ కొనుగోలు చేయడం. ఆ కల నిజం కావడానికి నాలుగేళ్లు పట్టినా, ఈ సంవత్సరం అతని కృషి ఫలించింది.

ఇటీవల, అదే షోరూమ్‌లో ఈసారి ఉద్యోగిగా కాకుండా కస్టమర్‌గా అడుగుపెట్టి, కొత్త హోండా CBR 650R కోసం చివరి వాయిదా చెల్లించాడు. ఈ అద్భుతమైన మైలురాయిని అతను రెడ్డిట్‌లో పోస్ట్ చేస్తూ, 2021లో నేను హోండా బిగ్ వింగ్ షోరూమ్‌లో పనిచేశాను. ఈరోజు అదే షోరూమ్ నుండి కొత్త CBR 650R కోసం ఫైనల్ ఇన్‌స్టాల్‌మెంట్ చెల్లించాను అని రాశాడు. అదే పోస్ట్‌లో అతను రెండు ఫోటోలు కూడా పంచుకున్నాడు.

మొదటి ఫోటోలో, ఉద్యోగిగా ఉన్నప్పుడు షోరూమ్‌లో CBR 650Rపై కూర్చున్న అతని పాత జ్ఞాపకం కనిపిస్తుంది. రెండో ఫోటోలో, నాలుగేళ్ల తరువాత అదే బైక్ కొత్త వేరియంట్ యజమానిగా గర్వంగా పోజిచ్చాడు. అవును, ఇది నా బైక్. ఇది వచ్చే బుధవారం(సెప్టెంబర్ 24న) డెలివరీ అవుతుంది. నాలుగేళ్ల తరువాత అదే షోరూమ్‌లో తీసుకున్న ఫోటో ఇది అని అతను రాశాడు. హోండా CBR 650R బైక్ గురించి కింద చూద్దాం.

హోండా CBR 650R దేశీయ మార్కెట్లోకి వచ్చినప్పటి నుంచే యువతకు ప్రత్యేక క్రేజ్ సంపాదించుకున్న సూపర్‌బైక్. ముఖ్యంగా ఇన్‌లైన్ ఫోర్-సిలిండర్ ఇంజిన్ సౌండ్, పెర్ఫార్మెన్స్ కారణంగా ఈ బైక్‌కు ఓ ప్రత్యేకమైన ఫ్యాన్ బేస్ ఉంది. తాజాగా, హోండా ఈ బైక్‌కు కొత్తగా 2025 CBR 650R E-Clutch వేరియంట్‌ను పరిచయం చేసింది. దీన్ని ఈ సంవత్సరం మేలో మార్కెట్లోకి తీసుకురాగా, ధరను రూ. 10.40 లక్షల ఎక్స్-షోరూమ్గా నిర్ణయించింది.

ఈ వేరియంట్ ప్రధానంగా టెక్నాలజీ పరంగా ఒక పెద్ద అప్‌డేట్‌ను కలిగి ఉంది. దీని 649 సిసి ఇన్‌లైన్ ఫోర్-సిలిండర్ ఇంజిన్, 94 bhp పవర్, 63 Nm టార్క్ ఉత్పత్తి చేస్తుంది. పెర్ఫార్మెన్స్‌తో పాటు స్టైల్‌పై కూడా దృష్టి పెట్టిన హోండా, ఈ కొత్త వేరియంట్‌లో డ్యూయల్ LED హెడ్‌లైట్లు, కొత్తగా డిజైన్ చేసిన సైడ్ ప్యానెల్స్, వాలుగా ఉండే ఎత్తైన టెయిల్ సెక్షన్ వంటి ఫీచర్లను ఇచ్చింది.

ఇందులో అత్యంత ఆకర్షణీయమైన ఫీచర్ Honda E-Clutch సిస్టమ్. దీని వలన నగర రోడ్లపై రైడింగ్ అనుభవం మరింత సులభంగా, కంఫర్టబుల్‌గా మారుతుంది. మాన్యువల్ క్లచ్ ఆపరేషన్ అవసరం లేకుండా స్మూత్ గేర్‌షిఫ్ట్ సాధ్యమవుతుంది. అంటే, ఈ బైక్ సిటీ రైడింగ్‌కు కూడా, హైవే స్పోర్ట్స్ రైడింగ్‌కు కూడా పర్ఫెక్ట్ ఆప్షన్ అవుతుంది.