రియల్ కారు కన్నా డజను రెడ్లు ఖరీదైన బొమ్మ కారు

మీ దగ్గర దాచుకోలేనంత డబ్బుంటే ఏం చేస్తారు..? ఆ ఏం చేస్తాం మహా అయితే రాజకీయాల్లోకి వస్తాం అంటారా..? మన సంగతేమో కానీ దుబాయ్‌లో మాత్రం దాచుకోలేనంత డబ్బుంటే, ఇక వాళ్లు చేసే దుబారాలకు అడ్డూ అదుపు అస్సలు ఉండదు. ఆయిల్ రిచ్ కంట్రీగా పేరుగాంచిన దుబాయ్‌లో డబ్బుకు కొదవే లేదు. వారి సంపందకు తగినట్లుగా వారి విలాసాలు కూడా ఉంటాయి.

రియల్ కారు కన్నా డజను రెట్లు ఖరీదు చేసే బొమ్మ కారును ఎవరైనా కొంటారా..? కానీ దుబాయ్‌లో అలాంటి దుబారా రాయుళ్లు ఎక్కడ చూసినా కనిపిస్తారు. జర్మనీకి చెందిన రాబర్ట్ గల్పిన్ తయారు చేసిన ఓ లాంబోర్గినీ అవెంటేడర్ స్కేల్ మోడల్ (షో పీస్ మాదిరిగా ఉండే చిన్నపాటి బొమ్మ కారు)ను ఇప్పుడు దుబాయ్‌లో వేలానికి ఉంచారు. దీని ప్రారంభ బిడ్డింగ్ 75 లక్షల డాలర్లు మాత్రమే.

ఈ స్కేల్ మోడల్ అమ్మకం ద్వారా వచ్చిన మొత్తం 6.50 లక్షల డాలర్లు ఛారిటీకి వెళ్తాయి. మరి బుల్లికారు అంత ఖరీదు పలకడానికి కారణం ఏంటో తెలుసా..? రండి అదేంటో తెలుసుకుందాం..!

ఈ ఫొటోలో మీరు చూస్తున్నది రియల్ కారులా కనిపించే స్కేల్ మోడల్. ఈ కారును పూర్తిగా బంగారంతో తయారు చేశారు. ఈ స్కేల్ మోడల్ తుది తయారీకి 25 కేజీల బంగారం పట్టింది (ఇది మార్కెట్లో సుమారు 12 లక్షల డాలర్ల విలువకు సమానం).

ఇందులోని చక్రాలను, ఇంటీరియర్లను నల్లగా ఉండేలా ప్లాటినం, గోల్డ్ మిక్స్‌ను ఉపయోగించారు. అంతేకాకుండా, లోపలి వైపు విలువైన రాళ్లను పొదగారు (బహుశా వజ్రాలు అయి ఉండొచ్చు).

దీని తయారీకి ఉపయోగించిన అన్ని వస్తువులు, పదార్థాల వెలే సుమారు 26 లక్షల డాలర్లు ఉండొచ్చని అంచనా. మరి ఈ బంగారు బాతు గుడ్డును సొంతం చేసుకునే ఆ రిచ్ మ్యాన్ ఎవరో తెలియాలంటే, వేలం ముగిసే వరకు వేచి ఉండక తప్పదు.

గల్పెన్ సృష్టించిన వాటిలో ఇదే మొదటి అత్యంత ఖరీదైన స్కేల్ మోడల్ కాదు. 2011లో ఈయన సృష్టించిన ఓ అవెంటేడర్ కూడా అత్యంత వెల పలికింది. కార్బన్ ఫైబర్, వజ్రాలు, విలువైన రాళ్లతో రూపొందించిన ఈ కారు 47 లక్షల డాలర్లు పలికింది. ఆ వీడియోను వీక్షించండి.