ఈవీ ఓనర్లకు Google Maps గుడ్‌ న్యూస్‌.. ఇకపై మీకు ఈ టెన్షన్‌ ఉండదు.!!

ఈ రోజుల్లో గూగుల్‌ మ్యాప్స్‌(Google Maps) లేకుండా కొత్త రూట్లలో ప్రయాణించడం చాలా కష్టం. ఎవరినీ అడగకుండా గూగుల్‌ మ్యాప్స్‌ నావిగేషన్‌తో ఏ చిక్కూ లేకుండా సులభంగా గమ్యస్థానానికి చేరుకోవచ్చు. అందుకే మెట్రో సిటీల్లో ఎక్కువగా దీనిపై ఆధారపడుతుంటారు. ఈ క్రమంలో గూగుల్‌ మ్యాప్స్‌కు సంబంధించి ఆసక్తికర అప్‌డేట్‌ ఇక్కడుంది.

వివిధ రకాల ఫీచర్లతో ఎప్పటికప్పుడు అప్‌డేట్‌ అవుతున్న గూగుల్ మ్యాప్స్.. ఇప్పుడు మరో ఇంట్రెస్టింగ్‌ అప్‌డేట్‌ను తీసుకువచ్చింది. ఇది ఈవీ వినియోగదారులకు ఉపయోగకరంగా ఉంటుంది. ఇకపై గూగుల్‌ మ్యాప్స్‌ ద్వారా ఈవీ కస్టమర్లు.. సమీపంలో ఛార్జింగ్‌ స్టేషన్ల(EV Charging Stations) గురించి మరింత సమాచారాన్ని తెలుసుకోవచ్చు.

భారత్‌లో ఎలక్ట్రిక్‌ వాహనాలకు క్రమంగా ఆదరణ పెరుగుతోంది. పెరుగుతున్న పెట్రోల్‌, డీజిల్‌ ఖర్చుల నుంచి తప్పించుకునేందుకు ప్రజలకు ఎక్కువగా ఈవీలపైనే మొగ్గు చూపుతున్నారు. ఈ క్రమంలో ఎలక్ట్రిక్‌ వాహనాల సంఖ్య దేశంలో పెరుగుతుండటంతో.. అందుకు తగినట్లుగా ఛార్జింగ్‌ స్టేషన్లను కూడా అందుబాటులోకి తెస్తున్నారు. కాగా పెట్రోల్‌ బంక్‌లను కనుగొన్నంత సులభంగా ప్రజలు ఈవీ ఛార్జింగ్‌ స్టేషన్లను గుర్తించలేకపోతున్నారు.

ఈ క్రమంలో ఈ సమస్యను పరిష్కరించేందుకు Google Maps సరికొత్త ఫీచర్‌ను తీసుకువచ్చింది. ఇప్పటికే Google Maps ఈ ఫీచర్‌ని కలిగి ఉన్నప్పటికీ, ఇది మీరు సెలెక్ట్‌ చేసుకున్న స్థానాల్లోని స్టేషన్‌లను మాత్రమే గుర్తిస్తుంది. మరోవైపు, కొన్ని స్కూటర్ బ్రాండ్‌లు తమ సొంత సాఫ్ట్‌వేర్‌లో ఛార్జింగ్ స్టేషన్‌ల గురించి సమాచారాన్ని అందించడానికి తగినంతగా తమ సాఫ్ట్‌వేర్‌ను అప్‌డేట్ చేశాయి. అయితే ఇవి పరిమితంగా ఉన్నాయి.

ఈ నేపథ్యంలో ఇవి సంబంధిత బ్రాండ్‌లచే నిర్మించబడిన మరియు భాగస్వామ్యం చేయబడిన ఛార్జింగ్ స్టేషన్‌లను మాత్రమే ఈ యాప్‌(Google Maps EV Charging Stations)లు గుర్తిస్తాయి. అయితే.. ఇటువంటి సాఫ్ట్‌వేర్ అప్‌డేట్ అన్ని ఎలక్ట్రిక్ స్కూటర్లలో అందుబాటులో ఉండదు. కాబట్టి సమీపంలోని ఛార్జింగ్ స్టేషన్‌లను గుర్తించడం కష్టం. ఇందుకోసం గూగుల్‌ మ్యాప్స్‌ ఇప్పుడు కొత్త అప్‌డేట్‌ను విడుదల చేసింది. అది ఈవీ యజమానులందరికీ ఉపయోగకరంగా ఉంటుంది.

గూగుల్‌ మ్యాప్స్‌ తీసుకువచ్చిన ఈ కొత్త అప్‌డేటెడ్‌ ఫీచర్‌.. త్వరలో అందుబాటులోకి రానుంది. ఈ అప్‌డేట్‌లు Google బిల్ట్-ఇన్ సాఫ్ట్‌వేర్‌తో వచ్చే వాహనాలపై దృష్టి సారిస్తాయి. కస్టమర్‌ రివ్యూల నుంచి సేకరించిన సమాచారం ఆధారంగా EV ఛార్జింగ్‌ స్టేషన్‌ లొకేషన్‌ వివరించే కృత్రిమ మేధస్సు (AI) ఆధారిత సారాంశాలను చూపిస్తుందని Google Maps పేర్కొంది.

ఈ సరికొత్త ఫీచర్ వినియోగదారులకు టర్న్-బై-టర్న్ నావిగేషన్ ప్రాంప్ట్‌లతో EV ఛార్జింగ్‌ స్టేషన్‌కు మీకు దారిని చూపిస్తుంది. EV ఛార్జర్‌లను కనుగొనడంలో వినియోగదారులకు సహాయం చేయడంతో పాటు, వినియోగదారులకు మరింత సులభతరం చేయడానికి Google వాటి గురించి మరింత సమాచారాన్ని కూడా మీకు తెలియజేస్తుంది.

దీనర్థం.. ఎలక్ట్రిక్ వాహనాల ఓనర్లు.. EV ఛార్జింగ్‌ స్టేషన్ల గురించి వెతికినప్పుడల్లా.. ఛార్జింగ్ ప్లగ్‌లు, ఛార్జింగ్ కోసం వేచి ఉండే సమయం మొదలైన అదనపు సమాచారాన్ని కూడా అడుగుతుంది. తద్వారా ఆ EV ఛార్జింగ్‌ స్టేషన్‌లో మీ వెహికల్‌ను ఛార్జ్‌ చేసుకోవాలా వద్దా అనేది మీరు నిర్ణయించుకోవచ్చు.

కాగా ప్రారంభంలో, ఈ ఫీచర్లు Google ఇన్‌బిల్ట్‌ వాహనాలకు మాత్రమే అందుబాటులో ఉంటాయి. బ్యాటరీ ఛార్జ్ నిర్దిష్ట స్థాయికి పడిపోయినప్పుడల్లా EV ఛార్జింగ్ స్టేషన్‌ల గురించిన సమాచారం ఆటోమేటిక్‌గా ప్రదర్శిస్తుంది. ఈ ఫీచర్ ప్రధానంగా అమెరికాలోని వినియోగదారులకు అందుబాటులోకి తీసుకురావడానికి ప్లాన్ చేయబడింది. ఆ తర్వాత ఇది ఇతర ప్రాంతాల్లో కూడా త్వరలో అందుబాటులోకి రానుంది.