గుడ్ న్యూస్.. త్వరలో జీఎస్టీ సంస్కరణలు? తగ్గనున్న ప్యాసింజర్ కార్లు, టూ-వీలర్ల ధరలు

కొత్త వాహనాలు కొనుగోలు చేయాలని అనుకుంటున్నారా ? అయితే ఇది మీకు శుభవార్తే. రాబోయే దీపావళి నాటికి ప్యాసింజర్ కార్లు, టూ-వీలర్ల ధరలు గణనీయంగా తగ్గే అవకాశం ఉంది. ప్రభుత్వం కొత్త తరం జీఎస్టీ సంస్కరణలను అమలు చేయాలని ప్రణాళికలు రూపొందిస్తోంది. దీని ద్వారా జీఎస్టీ శ్లాబులను సరళీకృతం చేసి, కొన్ని వస్తువులపై పన్ను భారాన్ని తగ్గించనుంది.

ఈ నిర్ణయం ప్రధానంగా సామాన్య ప్రజలకు ఉపయోగపడే వాహనాల అమ్మకాలను పెంచడమే లక్ష్యంగా ఉంది. ప్రధాని నరేంద్ర మోడీ స్వాతంత్య్ర దినోత్సవ ప్రసంగంలో ఈ విషయాన్ని ప్రస్తావించడం ఈ వార్తకు మరింత ప్రాధాన్యతను ఇచ్చింది.

ప్రస్తుతం మన దేశంలో వస్తువులు, సేవలపై 5%, 12%, 18%, 28% చొప్పున పన్ను వసూలు చేస్తున్నారు. కొత్త సంస్కరణల్లో ఈ నాలుగు శ్లాబులను కేవలం రెండుగా మార్చే ఆలోచనలో ప్రభుత్వం ఉంది. అవి స్టాండర్డ్, మెరిట్. ఈ రెండింటి కింద 5 శాతం, 18 శాతం పన్ను శ్లాబులు ఉండనున్నాయి. దీని ప్రకారం ప్రస్తుతం 28 శాతం పన్ను శ్లాబులో ఉన్న కార్లు, టూ-వీలర్ల వంటి వాటిని 18 శాతం శ్లాబులోకి మార్చే అవకాశం ఉంది. ఒకవేళ ఇది నిజమైతే, కస్టమర్లకు వాహనాలపై 5-10 శాతం వరకు ధరలు తగ్గుతాయి.

ఈ మార్పు ప్రధానంగా మధ్య తరగతి వర్గాలకు, ముఖ్యంగా ఎంట్రీ లెవల్ టూ-వీలర్లు, రూ.10 లక్షల లోపు సబ్-కాంపాక్ట్ కార్ల అమ్మకాలను పెంచుతుంది. ధరలు తగ్గడం వల్ల ఎక్కువ మంది ప్రజలు కొత్త వాహనాలను కొనుగోలు చేయడానికి ఆసక్తి చూపుతారు. ఇది ఆటోమొబైల్ రంగానికి ఒక పెద్ద బూస్ట్ అవుతుంది.

అంతేకాకుండా, ఆటోమొబైల్ విడిభాగాలపై కూడా పన్ను తగ్గే అవకాశం ఉంది. దీనివల్ల వాహనాల తయారీ వ్యయం తగ్గుతుంది, ఇది చివరికి వినియోగదారులకు తక్కువ నిర్వహణ ఖర్చులకు దారితీస్తుంది. చాలా కాలంగా టూ-వీలర్ తయారీదారులు ఈ జీఎస్టీ తగ్గింపు కోసం డిమాండ్ చేస్తున్నారు.

ఎలక్ట్రిక్ వెహికల్స్ విషయానికొస్తే వాటిపై ప్రస్తుతం ఉన్న 5% పన్ను శ్లాబు కొనసాగే అవకాశం ఉంది. ప్రభుత్వం గ్రీన్ ఎనర్జీని ప్రోత్సహిస్తున్నందున, ఈ పన్నును పెంచే అవకాశం లేదు. అయితే, లగ్జరీ కార్ల విషయంలో మాత్రం పాత పన్ను శ్లాబునే కొనసాగించవచ్చని నివేదికలు సూచిస్తున్నాయి.

వీటితో పాటు, ప్యాసింజర్ వాహనాలపై ప్రస్తుతం వసూలు చేస్తున్న కాంపాన్సేషన్ సెస్ కూడా కొనసాగే అవకాశం ఉంది. అలాగే, లగ్జరీ వస్తువులు, పొగాకు వంటి సిన్ గూడ్స్ పై 40 శాతం పన్ను విధించాలని కూడా సిఫార్సు చేయబడింది.

ఈ జీఎస్టీ సంస్కరణల ప్రధాన లక్ష్యం కేవలం వాహనాల ధరలు తగ్గించడం మాత్రమే కాదు. ఇది వ్యాపారం చేయడం సులభతరం చేస్తుంది, ముఖ్యంగా సూక్ష్మ, చిన్న, మధ్య తరహా పరిశ్రమలకు చాలా ఉపయోగకరంగా ఉంటుంది. అమెరికా విధించిన అధిక టారిఫ్‎ల నేపథ్యంలో ఇది మన ఆర్థిక వ్యవస్థకు ఒక ఊతమిస్తుంది.

ఈ పన్ను తగ్గింపు వల్ల గృహోపకరణాలు, ఇతర ఎలక్ట్రానిక్ వస్తువుల ధరలు కూడా తగ్గుతాయి. దీని ద్వారా ప్రజల కొనుగోలు శక్తి పెరిగి, మొత్తం ఆర్థిక వ్యవస్థకు మంచి జరుగుతుందని భావిస్తున్నారు. జీఎస్టీ కౌన్సిల్ త్వరలో ఈ సిఫార్సులపై చర్చించనుంది. ఈ నిర్ణయాలు త్వరగా అమలులోకి వస్తాయని కేంద్ర ఆర్థిక మంత్రిత్వ శాఖ వెల్లడించింది.

"ఈ ఆర్థిక సంవత్సరం చివరి నాటికి దీని ప్రయోజనాలు ప్రజలకు అందేలా అన్ని ప్రయత్నాలు చేస్తాం" అని మంత్రిత్వ శాఖ తెలిపింది. అన్నీ అనుకున్నట్టు జరిగితే, ఈ దీపావళి నాటికి లేదా అక్టోబర్ చివరి వారం, నవంబర్ మొదటి వారంలో ఈ కొత్త నిబంధనలు అమలులోకి వచ్చే అవకాశం ఉంది.