కదులుతున్న మహీంద్రా థార్‌ బానెట్‌పై ఇన్‌స్టాగ్రామర్‌ రీల్స్.. పోలీసులు ఏం చేశారో తెలుసా..?

ప్రస్తుతం యువత వైరల్ అయ్యేందుకు వింత వింత పనులు చేస్తున్నారు. కొన్ని సార్లు ఇది శృతి మించిపోతుంది. ముఖ్యంగా రీల్స్ చేసేటప్పుడు ఎలాంటి జాగ్రత్తలు తీసుకోకుండా ప్రాణాల మీదకు తెచ్చుకుంటున్నారు. లైక్స్ కోసం లైన్ క్రాస్ చేస్తూ విచ్చలవిడిగా వ్యవహరిస్తున్నారు. తాజాగా ఓ యువతి చేసిన పనికి పోలీసులు తగిన శాస్తి చెప్పారు. ఆ వివరాలు మీకోసం..

ప్రస్తుతం ఈజీగా డబ్బు సంపాదించి ఫేమస్ అవ్వడానికి సోషల్ మీడియా గొప్ప వేదికగా ఉంది. కానీ అవి వైరల్ అవ్వడానికి చేసే పనులు ఒక్కోసారి జనాలకు చిరాకు తెప్పిస్తున్నాయి. కొన్నిసార్లు వీరు చేసే సాహసాలు ఇతరుల ప్రాణాలు కూడా తీస్తున్నాయి. తాజాగా ఓ యువతి చేసిన స్టంట్స్ కి పోలీసులు జరిమానా విధించారు.

ఇన్ స్టాగ్రామ్ లో పది లక్షలకు పైగా ఫాలోవర్స్ ఉన్న గౌరీ విర్ధి రోడ్డు నిబంధనలను ఉల్లంఘించినందుకు పోలీసులు ఆమెను అదుపులోకి తీసుకుని వార్నింగ్ ఇచ్చి ఇంటికి పంపించారు. పంజాబ్ లోని హోషియార్ పూర్ జిల్లాకు చెందిన గౌరీ విర్ది అనే ఇన్ స్టాగ్రామర్ ని పంజాబ్ పోలీసులు అదుపులోకి తీసుకుని హెచ్చరికలు జారీ చేశారు.

గౌరీ విర్ది మహీంద్రా థార్ బానెట్ పై కూర్చున్న వీడియో ఇంటర్నెట్ లో వైరల్ గా మారింది. ఈ ఫుటేజీలో ఆమె జాతీయ రహదారిపై వెళ్తున్న థార్ బానెట్ పై కూర్చొని కనిపించారు. ఈ వీడియో కొద్ది గంటల్లోనే వైరల్ అయ్యింది. దీనిని సుమోటోగా పరిగణలోకి తీసుకున్న హోషియార్ పూర్ లోని దసూయా పోలీసులు చర్యలు చేపట్టి చలాన్ జారీ చేశారు.

వాహనం రిజిస్ట్రేషన్ నంబర్, సీసీటీవీ ఫుటేజీల ద్వారా వాహన యజమానిని గుర్తించడం పోలీసులకు సులువైంది. మహిళతో పాటు మహీంద్రా థార్ డ్రైవర్ పై చట్టపరమైన చర్యలు తీసుకున్నట్లు దసూయా పోలీసులు తెలిపారు. ఘటన జరిగిన సమయంలో వాహనంలో పలువురు గౌరి స్నేహితులు ఉన్నట్లు పోలీసులు గుర్తించారు.

మరో వైరల్ వీడియోలో, పెళ్లికి సిద్ధంగా ఉన్న వధువు కదులుతున్న టాటా సఫారీ తుఫాను బానెట్ పై కూర్చొని బిట్టి షో ఇవ్వడం కెమెరామెన్ రికార్డ్ చేశాడు. కానీ ఇది పబ్లిక్ రోడ్డుపై ఇతర వాహనాల రాకపోకలకు అంతరాయం కలిగించింది.

ఈ దృశ్యాన్ని వీక్షించేందుకు వాహనదారులు వాహనాలను నిలిపివేయడంతో ట్రాఫిక్ రద్దీ మరింత పెరిగింది. ఈ వీడియో వైరల్ కావడంతో రంగంలోకి దిగిన పోలీసులు కారు యజమానికి రూ.15,500 జరిమానా విధించారు. అతనికి జరిమానా విధించడంతో పాటు వార్నింగ్ ఇచ్చారు. అయితే ఇలాంటి ఘటనలు మళ్లీ మళ్లీ పెరిగిపోతుండటం కలవరానికి గురిచేస్తుంది.

మరో ఘటనలో అయోధ్యకు చెందిన మరో మహిళ మారుతి సుజుకి డిజైర్ వన్ లేన్ హైవేపై వేగంగా వెళ్తుండగా కారు బానెట్ పై కూర్చొని ఉండగా అదే కారులో ఉన్న మరో యువతి కారు కిటికీలో నుంచి తొంగి చూస్తోంది. ఈ ఘటనకు పాల్పడిన వారిపై పోలీసులు రూ.18 వేల జరిమానా విధించారు.

ప్రస్తుతం సోషల్ మీడియాలో ఏదైనా కొత్తగా ట్రై చేస్తూ తమను తాము ఫేమస్ చేసుకోవడానికి ప్రయత్నిస్తున్నారు. ఈ ప్రయత్నంలో అనేక పరిణామాలను ఎదుర్కోంటున్నారు. నిబంధనల్ని ఉల్లఘించిన వారిపై పోలీసులు కూడా జరిమానాలు విధిస్తున్నారు. అయినా కానీ కొంతమందిలో ఎలాంటి మార్పు రావడం లేదు.

ఇప్పుడు చాలా నగరాల్లో సీసీటీవీ నెట్ వర్క్ పకడ్బందీగా ఉంది. దీంతో ఏ నేరం చేసినా క్షణాల్లో రికార్డ్ అవుతుంది. పోలీసులకు కేసులను చేధించడంలో ఈ సీసీ కెమెరాలు సహకరిస్తున్నాయి. నిబంధనల్ని ఉల్లంఘించి తప్పించుకునే వారి వాహన రిజిస్ట్రేషన్ నంబర్లను బంధించడం ద్వారా ట్రాఫిక్ ఉల్లంఘనలను గుర్తించడంలో ఈ కెమెరాలు కీలక పాత్ర పోషిస్తున్నాయి.