పెద్ద కంపెనీలు సైతం అవాక్కయ్యే ఫీచర్లు..ఇంట్లోనే ఎలక్ట్రిక్ బైక్ తయారు చేసిన 21 ఏళ్ల కుర్రాడు

ఎలక్ట్రిక్ వాహనాలపై రోజురోజుకు క్రేజ్ పెరుగుతుంది. దీంతో చాలా మంది యువకులు సొంతంగా వాహనాలను తయారు చేయడానికి ఆసక్తి చూపిస్తున్నారు. కేరళకు చెందిన 21 ఏళ్ల యువకుడు అతుల్ వినోద్ కూడా అలాంటి సాహసం చేసి, లక్ష రూపాయల ఖర్చుతో ఇంట్లోనే ఒక అద్భుతమైన ఎలక్ట్రిక్ బైక్‌ను తయారు చేశాడు. ఈ బైక్ ఫీచర్లు, తయారీ వివరాలు తెలుసుకుందాం.

ఈ కుర్రాడి తెలివికి హ్యాట్సాఫ్!
ఎలక్ట్రిక్ వాహనాలపై పెరుగుతున్న ఆసక్తికి నిదర్శనంగా, కేరళకు చెందిన యువకుడు అతుల్ వినోద్ ఒక గొప్ప ప్రయత్నం చేశాడు. కొచ్చిలోని పరమ్‌పడప్పు ప్రాంతానికి చెందిన అతుల్, కేవలం రూ. లక్ష ఖర్చుతో తన సొంత ఎలక్ట్రిక్ బైక్‌ను తయారు చేసి అందరినీ ఆశ్చర్యపరిచాడు. ఈ బైక్‌కు సంబంధించిన వీడియో మాతృభూమి యూట్యూబ్ ఛానెల్‌లో తెగ వైరల్ అవుతోంది.

బైక్ తయారీకి ప్రేరణ
అతుల్‌కు చిన్నప్పటి నుంచే సొంతంగా ఒక బైక్ తయారు చేయాలనే కోరిక ఉండేది. పదో తరగతి చదువుతున్నప్పుడే బైక్ డిజైన్‌లు గీయడం మొదలుపెట్టాడు. ఆ తర్వాత ఆటోమొబైల్ గురించి మరింత తెలుసుకోవడానికి పాలిటెక్నిక్‌లో చేరాడు. బైక్ తయారు చేసేందుకు కావాల్సిన సమాచారాన్ని యూట్యూబ్, గూగుల్ ద్వారా నేర్చుకున్నాడు.

బ్యాటరీ, పర్ఫామెన్స్
మొదట ఎలక్ట్రిక్ రిక్షాలోని మోటార్‌ను ఉపయోగించి చైన్ డ్రైవ్ సిస్టంతో బైక్‌ను తయారు చేయాలని ప్రయత్నించాడు. కానీ మోటార్ ఎక్కువ వేడెక్కడంతో ఆ ప్రయత్నాన్ని విరమించుకున్నాడు. ప్రస్తుతం అతడు హబ్ మోటార్‌ను ఉపయోగించాడు. ఇది ఇప్పుడు అడ్వాన్సుడ్ ఎలక్ట్రిక్ వెహికల్స్‎లో ఉపయోగిస్తున్నారు.

దీనికి పవర్ ఇచ్చేందుకు 48V LFP బ్యాటరీని తయారు చేసుకున్నాడు. ఈ బైక్ ఒక్కసారి ఛార్జ్ చేస్తే 70 కిలోమీటర్లు ప్రయాణిస్తుంది. పూర్తి ఛార్జ్ అవ్వడానికి 3.5 నుంచి 4 గంటల సమయం పడుతుంది. ఛార్జింగ్ పాయింట్‌ను పెట్రోల్ ట్యాంక్ ఉన్న చోట ఏర్పాటు చేయడం విశేషం.

డిజైన్, ఫీచర్లు
ఈ బైక్ సస్పెన్షన్ విషయానికి వస్తే, ముందు భాగంలో హీరో స్ప్లెండర్ బైక్‌లోని ఫోర్క్‌ను, వెనుక భాగంలో యమహా ఎఫ్‌జెడ్ బైక్‌లోని మోనోషాక్ సస్పెన్షన్‌ను అమర్చాడు. బైక్‌లోని చాలా భాగాలు అతడు సొంతంగా తయారు చేసుకున్నవే.

బైక్ ఫ్రేమ్‌ను జీఐ పైపుతో తయారు చేసి, ఎరుపు రంగులో పెయింట్ చేశాడు. బైక్ డిజైన్ అల్ట్రానియానిక్ బైక్‌ను పోలి ఉంది. హెడ్‌లైట్ కవాసకి నెక్డ్ బైక్ లాగా కనిపిస్తుంది. ముందు మడ్‌గార్డ్‌ను స్క్రాప్‌యార్డ్ నుంచి తెచ్చుకున్నాడు.

అడ్వాన్సుడ్ ఫీచర్లు
ఈ బైక్‌లో చిన్న స్టోరేజ్ బాక్స్, డిజిటల్ ఇన్‌స్ట్రుమెంట్ క్లస్టర్, యాంటీ-థెఫ్ట్ అలారం, రిమోట్ స్టార్ట్/స్టాప్, రివర్స్ అసిస్టెన్స్ వంటి ఫీచర్లు ఉన్నాయి. దీనికి సెంట్రల్ లాకింగ్ సిస్టమ్ కూడా అమర్చాలని అతుల్ ఆలోచిస్తున్నాడు.

ఫ్యామిలీ సపోర్టు
అతుల్ ఈ ప్రాజెక్ట్‌కు అతని ఫ్యామిలీ సభ్యులు పూర్తి మద్దతు ఇచ్చారు. అతడికి కావాల్సిన ఆర్థిక సహాయం అందించారు. బైక్ తయారు చేయడానికి కావాల్సిన డబ్బు కోసం అతుల్ టీచర్ పని, డ్రోన్‌లు, ఇంక్యుబేటర్లు తయారు చేయడం వంటి పనులు చేశాడు. భవిష్యత్తులో ఈ బైక్‌ను మరింత మెరుగుపరచాలని అతుల్ ప్రణాళికలు వేస్తున్నాడు.