పోర్షే 911 కారుతో యాక్సిడెంట్ చేసిన లిండ్‌సే లోహన్

ప్రముఖ అమెరికన్ నటి 'లిండ్‌సే లోహన్' మరోసారి వార్తల్లోకెక్కింది. గతంలో ఫుల్లుగా పీకల దాకా మందుకొట్టి కారు నడిపిన కేసులో బుక్ అయిన ఈ ముద్దుగుమ్మ, ఇప్పుడు తాజాగా మరో సూపర్ కారును యాక్సిడెంట్ చేసి మీడియా కంట్లో పడింది. లిండ్‌సే లోహన్ నటిస్తున్న లేటెస్ట్ ఫిల్మ్ 'లిజ్ అండ్ డిక్' అనే సినిమా షూటింగ్‌లో పాల్గొనేందుకు తన పోర్షే 911 స్పోర్ట్స్ కారులో వెళ్తుండగా ఈ ప్రమాదం చోటు చేసుకుంది.

కాలిఫోర్నియాలోని శాంటా మోనికాలో ఉన్న పసిఫిక్ కోస్ట్ హైవేపై తన పోర్షే 911 కారులో వేగంగా డ్రైవ్ చేస్తూ, ముందు వైపు వెళ్తున్న భారీ ట్రక్కును ఢీకొట్టడంతో పోర్షే కారు పచ్చడైపోయింది. ఈ సంఘటన జరిగిన సమయంలో కారులో లిండ్‌సే లోహన్‌తో పాటుగా తన అసిస్టెంట్ కూడా ఉన్నాడు. అదృష్టవశాత్తు ఈ ప్రమాదంలో కారులోని లిండ్‌సే లోహన్‌, ఆమె అసిస్టెంట్‌కు అలాగే ట్రక్కు డ్రైవర్‌కు కూడా ఎలాంటి గాయాలు కాలేదు.

ఈ యాక్సిడెంట్ గురించి లిండ్‌సే వివరిస్తూ.. అసలు తప్పంతా ట్రక్కు డ్రైవర్‌దేనని, అతను ఎలాంటి సిగ్నల్స్ ఇవ్వకుండా లైన్‌లను అటూ ఇటూ మారుతుండటం వల్లనే ప్రమాదం జరిగిందని పేర్కొంది. ఈ సమయంలో కారును లిండ్‌సే లోగన్ డ్రైవ్ చేస్తుండగా, ఆమె అసిస్టెంట్ వెనుక సీట్లో కూర్చుని ఉన్నట్లు తెలిపారు.

అయితే, ఈ ప్రమాదంపై కొత్త కొత్త పుకార్లు షికార్లు చేస్తున్నాయి. తప్పు తనపై వేసుకోమని ట్రక్కు డ్రైవర్‌కు లిండ్‌సే లోహన్ లంచమివ్వజూపిందనే గుసగుసలు వినిపిస్తున్నాయి. ఎప్పుడూ మాంచి కిక్కు మీద ఉండే ఈ అమెరికన్ అమ్మడు, గతంలో ఇలాగే ఓసారి ఫుల్లుగా మందుకొట్టి యాక్సిడెంట్ చేసి నానా గందరగోళం సృష్టించింది.