దేశంలోనే అత్యంత ఖరీదైన ప్రమాదం.. ఒక్కో కారు ధర వింటే ఫ్యూజ్‌లు అవుట్‌ అవుతాయి!

దేశంలో రెండు సూపర్ కార్లు ఢీకొట్టిన దృశ్యాలు సోషల్ మీడియాలో వైరల్‌గా మారాయి. ప్రమాదానికి గురైన రెండు కార్ల ఖరీదు కూడా కోట్లలో ఉండటం గమనార్హం. అందుకే ఈ యాక్సిడెంట్ ఘటన దేశంలో సంచలనంగా మారింది. ఇంత ప్రమాదం ఎలా జరిగింది? ఇది ఎక్కడ జరిగింది? ప్రమాదానికి కారణమేంటి? ఈ కార్ మోడళ్లు ఎలా ప్రమాదాలకు గురవుతాయి? భారత్‌లో వీటి విలువ ఎంత? మరి వారి స్పెషాలిటీస్ ఏంటో కూడా ఈ స్టోరీలో చూడబోతున్నాం.

ప్రమాదంలో ధ్వంసమైన రెండు కార్లు బెంజ్ యొక్క సూపర్ లగ్జరీ కార్ మోడళ్లు. ఇవి హై పవర్‌ని విడుదల చేయగలవు. మెర్సిడెస్ బెంజ్ AMG GT 63 SE, మెర్సిడెస్ బెంజ్ AMG SL 55 రోడ్‌స్టర్‌ ఒకదానికొకటి ఢీకొన్నాయి. భారత్‌లో అందుబాటులో ఉన్న అత్యంత ఖరీదైన కార్ మోడళ్లలో ఇవి కూడా ఉన్నాయి.

మెర్సిడెస్ బెంజ్ AMG GT 63 SE, మెర్సిడెస్ బెంజ్ AMG SL 55 రోడ్‌స్టర్‌ ధరలు వరుసగా రూ.2.44 కోట్లు, 3.30 కోట్లుగా ఉన్నాయి. ఈ రెండు ఖరీదైన కార్లు ప్రమాదాల్లో నుజ్జునుజ్జయ్యాయి. అయితే రెండు కార్లను టెస్ట్ డ్రైవ్ చేస్తుండగా ప్రమాదానికి గురైనట్లు సమాచారం. ఈ ఘటన కేరళలోని కొచ్చిలో చోటుచేసుకుంది. రెండు కార్లు అదుపు తప్పి అతివేగంతో ఢీకొన్నాయి.

ఈ ప్రమాదంలో రెండు కార్లు ముందు భాగంలో పూర్తిగా ధ్వంసం అయ్యాయి. భారీ ప్రమాద తీవ్రతతో రెండు కార్లు నిరుపయోగంగా మారిపోయాయి. జీటీ63 ఎస్‌ఈ డ్రైవర్ ఈ ప్రమాదానికి కారణమని ప్రత్యక్ష సాక్షులు చెబుతున్నారు. కారులో డ్రైవర్‌ సీట్‌లో ఉన్న మహిళా దీనిని నియంత్రించడానికి చాలా కష్టపడినట్లు సమాచారం. ఓ దశలో కారు రోడ్డు పక్కన నుంచి పాత రైల్వే ట్రాక్‌ని ఢీకొట్టి SL 55 రోడ్‌స్టర్‌ని ఢీకొట్టినట్లు తెలిసింది.

ప్రమాదం జరిగిన సమయంలో కార్లు గంటకు 60 కిలోమీటర్లు లేదా అంతకంటే ఎక్కువ వేగంతో ప్రయాణిస్తున్నట్లు భావిస్తున్నారు. ఈ ఘోర ప్రమాదంతో రెండు కార్లు ఒక వైపు పూర్తిగా ధ్వంసమైంది. డోర్, వన్ సైడ్ హెడ్ ల్యాంప్, గ్రిల్, ఫెండర్, వీల్ వంటి ఒక వైపు ఉన్న చాలా భాగాలు 100 శాతం నష్టపోయాయి. ఈ ప్రమాదంలో కార్లు ధ్వంసమవగా, జీటీ63 ఏఎంజీ నడుపుతున్న మహిళకు తీవ్ర గాయాలయ్యాయి.

ప్రస్తుతం ఆమె పరిస్థితి విషమంగా ఉంది. కొత్త కారు కొనుక్కోవడానికి వెళ్లినప్పుడు కారు టెస్ట్ డ్రైవ్‌ చేయడం సాధారణమే. అయితే అనుభవం లేకుండా అతివేగంతో కారు నడపడం ఎంత ప్రమాదకరమో ఈ యాక్సిడెంట్ సంఘటనను చూస్తే మీకే తగిన పాఠం నేర్పుతుంది. ఈ మధ్య టెస్ట్‌డ్రైవ్స్‌ సమయంలో కార్ల ప్రమాదాలు ఎక్కువగా జరుగుతున్నాయి. కాబట్టి టెస్ట్ డ్రైవ్‌కి వెళ్లే వారు కాస్త జాగ్రత్తగా ఉండాలి.

ఇక GT 63 AMGలో 4.0-లీటర్ ట్విన్-టర్బో వి8 పెట్రోల్ ఇంజిన్ కలదు. ఈ ఇంజిన్ గరిష్టంగా 630bhp పవర్‌ 900nm టార్క్‌ని ప్రొడ్యూస్ చేస్తుంది. ఈ ఇంజిన్ 9-స్పీడ్ ఆటోమేటిక్ గేర్‌బాక్స్‌తో జతచేయబడి ఉంటుంది. దీని గరిష్ట వేగం గంటకు 317 కిలోమీటర్లుగా ఉంది.

ఇక SL55 రోడ్‌స్టర్‌ హై పవర్‌ని ఉత్పత్తి చేయగలదు. ఇందులోని 4.0-లీటర్ వి8 బై-టర్బో పెట్రోల్ ఇంజిన్ 469bhp పవర్ 700nm గరిష్ట టార్క్‌ని ప్రొడ్యూస్ చేస్తుంది. దీని గరిష్ట వేగం గంటకు 295 కిలోమీటర్లుగా ఉంది. ఇలాంటి హైస్పీడ్ కార్ మోడళ్లు టెస్ట్‌డ్రైవ్స్‌ సమయంలో నియంత్రణ కోల్పోయి ప్రమాదాలకు గురవుతున్నాయి. అందువల్ల కార్ల డీలర్లు రాబోయే రోజుల్లో టెస్ట్‌డ్రైవ్‌కి సంబంధించి కొత్త నియమాలను అమలు చేయాలని భావిస్తున్నారు.