మనవడి కోసం ఎలక్ట్రిక్ లాంబోర్గినీ కారును తయారు చేసిన తాత

ఓల్డ్ గువో ఈ లాంబోర్గినీ స్టయిల్ ఎలక్ట్రిక్ కారును స్టెయిన్‌లెస్ స్టీల్‌తో తయారు చేశాడు. ఈ కారు విడిభాగాలన్నింటినీ యంత్రాల సాయం లేకుండానే కట్ చేసి, తన స్వంత వర్క్‌షాపులోనే స్వయంగా మోల్డ్ చేశాడు.

ఈ కారును తయారు చేయటానికి ఓల్డ్ గువో తాతకు దాదాపు ఆరు నెలల సమయం పట్టింది. ఈ చిన్న ఎలక్ట్రిక్ లాంబోర్గినీ రెప్లికా కోసం ఆయన సుమారు 5000 యువాన్‌లు (815 డాలర్లు) వెచ్చించాడట.

ఈ ఎలక్ట్రిక్ కారు 2 మీటర్ల పొడవును, 1 మీటర్ వెడల్పును కలిగి ఉంటుంది. ఇందులో 5 బ్యాటరీలు ఉంటాయి. వీటిని పూర్తి చార్జ్ చేసుకుంటే 60 కీలోమీటర్ల దూరం వరకు ప్రయాణించవచ్చు.

ఎలాంటి లాంబోర్గినీ రెప్లికా అయిన సిజర్ డోర్స్ లేకపోతే ఆ కారుకు అందమే ఉండదు. అందుకే, ఓల్డ్ గువో తయారు చేసిన ఈ లాంబోర్గినీ రెప్లికా ఎలక్ట్రిక్ కారులో కూడా సిజర్ డోర్స్‌ను డిజైన్ చేశారు.

ఈ ఎలక్ట్రిక్ కారు స్టీరింగ్ వీల్‌పై 3 బటన్లు ఉంటాయి. అందులో ఒకటి హారన్ కోసం, మరొకటి కారును ముందుకు నడపటానికి మరియు ఇంకొకటి కారును వెనక్కి నడపటానికి ఉపయోగపడుతుంది. ఇంటర్నెట్ నుంచి లాంబోర్గినీ లోగోను కొనుగోలు చేసి ఈ కారుపై అతికించారు. ఈ కారులో స్టీరియో సిస్టమ్ కూడా ఉంటుంది.

ఈ కారులో ఎలక్ట్రిక్ పవర్ విండోస్, ఆటోమేటిక్ రెయిన్ కానోపీ (రూఫ్) కూడా ఉన్నాయి. అంటే ఇదొక కన్వర్టిబల్ కారు అన్నమాట. చూడటానికి చిన్న కారులా ఉన్న, ఇది అన్ని సదుపాయాలు ఉన్న కారు.

ఓల్డ్ గువో దురదృష్టం ఏంటంటే, ఈ ఎలక్ట్రిక్ కారును మెయిన్ రోడ్లపై డ్రైవ్ చేసేందుకు అనుమతి లేదు. రోడ్డుకు పక్కన ఉండే వీధుల్లో మాత్రం దీనిని నడుపుకోవచ్చు. బహుశా.. ఓల్డ్ గువో తన మనవడిని ఈ కారులో రోజూ స్కూలుకు తీసుకువెళ్తుండొచ్చమో!