రాంచీలో సూపర్‌బైక్ షోరూమ్‌ను ఓపెన్ చేయనున్న ధోనీ

By Ravi

Published: Tuesday, June 17, 2014, 11:07 [IST]

భారత క్రికెట్ జట్టు కెప్టెన్ మహేంద్ర సింగ్ ధోనీకి సూపర్‌బైక్‌లు అంటే చాలా ఇష్టమన్న సంగతి మనందరికీ తెలిసినదే. ధోనీ తన సూపర్‌బైక్ ప్యాషన్‌ను ఇప్పుడు కొత్త మార్గంలో చూపించనున్నాడు. అదేంటంటే, ఎమ్ఎస్ ధోనీ ఇప్పుడు తన స్వగ్రామం రాంచీలో ఓ సూపర్‌బైక్ షోరూమ్‌ను ప్రారంభించనున్నాడట.

అంతేకాకుండా, ఎమ్ఎస్ ధోనీ రాంచీలో ఓ షాపింగ్ మాల్‌ను ప్రారంభించేందుకు సన్నాహాలు చేస్తున్నాడు. ఇప్పటికే ఈ షాపింగ్ మాల్ కోసం ప్లాన్ కూడా సిద్ధమైంది, దీని అనుమతుల కోసం అతను మున్సిపల్ కార్పోరేషన్‌ను ఆశ్రయించినట్లు సమాచారం.

మున్సిపల్ కార్పోరేషన్ అధికారులు వెల్లడించిన సమాచారం ప్రకారం, ధోనీ ఓ షాపింగ్ కాంప్లెక్స్‌ను రిజిస్టర్ చేయించి, బోర్ వెల్ కోసం అనుమతి కోరారరని, అందుకు కావల్సిన అనుమతులను తాము మంజూరు చేశామని వారు తెలిపారు.

రాంచీలోని హైదల్ ప్రాంతంలో ఓ 10 అంతస్థుల షాపింగ్ కాంప్లెక్స్‌ను నిర్మించేందుకు ధోనీ ప్లాన్ చేస్తున్నారు. ఇదే కాంప్లెక్స్ లోనే ధోనీ ఓ సూపర్‍‌బైక్ షోరూమ్‌ను కూడా ప్రారంభించనున్నారు. ధోనీ వద్ద ఇప్పటికే దాదాపు 28కి పైగా సూపర్‌బైక్‌లు ఉన్నట్లు సమాచారం.