4.8 సెకన్లలో 100 స్పీడ్.. రూ.2.7 కోట్ల పోర్షే కొన్న నరేష్.. టాలీవుడ్‌లో ఈ కారు ఫస్ట్ ఓనర్ ఆయనే

టాలీవుడ్ సీనియర్ నటుడు, క్యారెక్టర్ ఆర్టిస్ట్ నరేష్ విజయకృష్ణ మరోసారి వార్తల్లో నిలిచారు. ఈసారి తన అద్భుతమైన నటనతోనో లేదా వ్యక్తిగత విషయాలతోనో కాకుండా, తన గ్యారేజీలోకి చేరిన ఒక లగ్జరీ స్పోర్ట్స్ కారుతో అందరి దృష్టిని ఆకర్షించారు. ఖరీదైన కార్లు, లగ్జరీ లైఫ్‎స్టైల్‎కు కేరాఫ్ అడ్రస్‌గా నిలిచే నరేష్, తాజాగా ప్రపంచ ప్రఖ్యాత బ్రాండ్ అయిన పోర్షే (Porsche) నుంచి పనామెరా టర్బో జీ 3 మోడల్ కారును సొంతం చేసుకున్నారు. ఈ కారు ధర, దాని ఫీచర్లు చూస్తుంటే ఎవరైనా ముక్కున వేలేసుకోవాల్సిందే.

టీనేజ్ కల నెరవేరింది..
నరేష్ కొనుగోలు చేసిన ఈ సరికొత్త పోర్షే పనామెరా జీ3 కారు లుకానో బ్లూ రంగులో మెరిసిపోతోంది. ఈ కారుకు సంబంధించిన వీడియోను ఆయన తన సోషల్ మీడియా వేదికగా పంచుకుంటూ భావోద్వేగానికి లోనయ్యారు. పోర్షే కారును సొంతం చేసుకోవాలన్నది తన టీనేజ్ నాటి కల అని, అది ఇన్నాళ్లకు నెరవేరినందుకు చాలా సంతోషంగా ఉందని ఆయన పేర్కొన్నారు.

కేవలం నాలుగు గోడల మధ్య దాచుకునే వస్తువు కాకుండా, తన కష్టార్జితంతో కొనుక్కున్న ఈ లగ్జరీ వాహనం తనకెంతో ప్రత్యేకమని నరేష్ వివరించారు. టాలీవుడ్‌లో ఈ వెర్షన్ కారును కలిగి ఉన్న మొదటి వ్యక్తిగా నరేష్ నిలిచినట్లు సమాచారం.

రూ.2.7 కోట్ల విలువ..
ఈ విలాసవంతమైన స్పోర్ట్స్ కారు విలువ మార్కెట్‌లో సుమారు రూ.2.70 కోట్లకు పైగానే ఉంటుందని తెలుస్తోంది. కేవలం ధర మాత్రమే కాదు, దీని వేగం కూడా అద్భుతంగా ఉంటుంది. ఈ కారు కేవలం 4.8 సెకన్లలోనే సున్నా నుంచి వంద కిలోమీటర్ల వేగాన్ని అందుకోగలదు. అంటే రెప్పపాటు కాలంలోనే ఇది గాలి వేగంతో దూసుకుపోతుంది.

అత్యాధునిక ఇంటీరియర్, స్పోర్ట్స్ మోడ్ డ్రైవింగ్, ప్రీమియం మ్యూజిక్ సిస్టమ్ వంటి మరెన్నో ప్రత్యేకతలు ఈ పనామెరా టర్బో జీ 3 మోడల్‌లో ఉన్నాయి. ఇప్పటికే నరేష్ వద్ద మెర్సిడెస్ బెంచ్, రేంజ్ రోవర్ వంటి అంతర్జాతీయ బ్రాండ్ల కార్లు ఉన్నప్పటికీ, ఈ కొత్త కారు ఆయన కలెక్షన్‌లో స్పెషల్ అట్రాక్షన్‌గా నిలిచింది.

టాలీవుడ్ కుబేరులలో ఒకరు
నరేష్ కేవలం నటుడిగానే కాకుండా, ఇండస్ట్రీలో అత్యంత సంపన్నమైన వ్యక్తులలో ఒకరిగా పేరుగాంచారు. ఒక ఇంటర్వ్యూలో ఆయన మాట్లాడుతూ తన ఆస్తుల విలువ దాదాపు వెయ్యి కోట్ల రూపాయల పైమాటే అని చెప్పడం అప్పట్లో పెను సంచలనం సృష్టించింది.

తన పూర్వీకుల నుంచి వచ్చిన ఆస్తులతో పాటు, నటుడిగా సంపాదిస్తున్న ఆదాయంతో ఆయన అత్యంత విలాసవంతమైన జీవితాన్ని గడుపుతున్నారు. షూటింగ్స్ కోసం ఆయన వాడుతున్న కారావాన్ విలువ కూడా సుమారు రూ.5 కోట్లు ఉంటుందని సమాచారం. దీనిని ఆయన తన అభిరుచులకు అనుగుణంగా ప్రత్యేకంగా డిజైన్ చేయించుకున్నారు.

వరుస సినిమాలతో ఫుల్ బిజీ
నటుడిగా సెకండ్ ఇన్నింగ్స్‌లో నరేష్ సూపర్ స్పీడ్‌తో దూసుకుపోతున్నారు. గతంలో హీరోగా అలరించిన ఆయన, ప్రస్తుతం క్యారెక్టర్ ఆర్టిస్ట్‌గా, కమెడియన్‌గా తనదైన ముద్ర వేస్తున్నారు. ముఖ్యంగా సామజవరగమన వంటి చిత్రాల్లో ఆయన పండించిన కామెడీ థియేటర్లలో నవ్వుల పూయించింది.

ఈ 2026 సంవత్సరంలో కూడా బ్యూటీ, హే బలవంత్ వంటి చిత్రాలతో ప్రేక్షకులను పలకరించారు. హీరోలకు తండ్రి పాత్ర అయినా, విలక్షణమైన క్యారెక్టర్ అయినా నరేష్ ఉంటే ఆ సినిమాకు ఒక ప్రత్యేక కళ వస్తుంది. ఒకవైపు కెరీర్ పరంగా విజయాలు అందుకుంటూనే, మరోవైపు తన వ్యక్తిగత కలలను ఇలా ఖరీదైన కార్లతో నెరవేర్చుకుంటున్నారు.