రోడ్ టాక్స్ లేదు.. రిజిస్ట్రేషన్ ఫీజు లేదు.. ఈ కార్లకు ఇచ్చే సబ్సిడీల దెబ్బకు పెట్రోల్ బండ్లకు ప్యాకప్

భారత ఆటోమొబైల్ రంగంలో ఇప్పుడు ఒక నిశ్శబ్ద విప్లవం నడుస్తోంది. పెట్రోల్ కొట్టించాలంటే బంకుల దగ్గర క్యూ కట్టడం, పెరుగుతున్న ధరలతో జేబులు గుల్ల చేసుకోవడం ఇష్టం లేని సామాన్యుడు ఇప్పుడు ఎలక్ట్రిక్ వైపు అడుగులు వేస్తున్నాడు. కేవలం పర్యావరణం మీద ప్రేమతో మాత్రమే కాదు, రాష్ట్ర ప్రభుత్వాలు ఇస్తున్న అదిరిపోయే ఆఫర్లు, సబ్సిడీల దెబ్బకు ఈవీ (EV) మార్కెట్ ఊహించని వేగంతో దూసుకుపోతోంది. ఉత్తరప్రదేశ్ నుంచి కర్ణాటక వరకు, మహారాష్ట్ర నుంచి పశ్చిమ బెంగాల్ వరకు ఇప్పుడు ఎక్కడ చూసినా బ్యాటరీ వాహనాల సందడి కనిపిస్తోంది.

షోరూమ్‌లో మారిన సీన్ - ఒక చిన్న ఉదాహరణ
బెంగుళూరుకు చెందిన ఒక యంగ్ సాఫ్ట్ వేర్ ఇంజనీర్ కథ చూస్తే ఈ మార్పు ఎంత వేగంగా ఉందో అర్థమవుతుంది. అతను మొదట ఒక హైబ్రిడ్ కారు కొనాలని షోరూమ్‌కు వెళ్ళాడు. హైబ్రిడ్ అయితే సేఫ్ అని అతని నమ్మకం. కానీ, అక్కడ సేల్స్ పర్సన్ కర్ణాటక ప్రభుత్వ ఈవీ పాలసీ గురించి వివరించాడు.

రోడ్డు పన్ను మినహాయింపు, రిజిస్ట్రేషన్ ఫీజు మాఫీ వల్ల కారు ఆన్-రోడ్ ధర ఊహించిన దానికంటే చాలా తక్కువగా ఉంది. దీనికి తోడు పెట్రోల్ ఖర్చు ఉండదు. ఇంకేముంది.. హైబ్రిడ్ కారు కొనాలనుకున్న వ్యక్తి, ఆఖరి నిమిషంలో మహీంద్రా XEV 9e ఎలక్ట్రిక్ కారును బుక్ చేసుకుని బయటకు వచ్చాడు. ఇలాంటి ఆఖరి నిమిషం మార్పులే ఇప్పుడు దేశవ్యాప్తంగా ఈవీ అమ్మకాలను పెంచుతున్నాయి.

ఉత్తరప్రదేశ్ - ఈవీ అమ్మకాల్లో నెంబర్ వన్
భారతదేశంలోనే ఎలక్ట్రిక్ వాహనాల అమ్మకాల్లో ఉత్తరప్రదేశ్ అగ్రస్థానంలో నిలిచింది. 2026 ఆర్థిక సంవత్సరంలో ఇక్కడ సుమారు 6 లక్షల ఎలక్ట్రిక్ వాహనాలు అమ్ముడయ్యాయి. అయితే ఇక్కడ విశేషం ఏమిటంటే.. అమ్ముడైన వాటిలో అత్యధికం ఎలక్ట్రిక్ త్రీ-వీలర్స్ (ఆటోలు). యూపీలో ఈవీ అనేది కేవలం వాహనం మాత్రమే కాదు, ఒక ఉపాధి మార్గం. పెట్రోల్, డీజిల్ ఖర్చు లేకపోవడం వల్ల ఆటో డ్రైవర్ల రోజువారీ ఆదాయం గణనీయంగా పెరిగింది. అందుకే అక్కడ పేద, మధ్యతరగతి ప్రజలు ఈవీల వైపు మొగ్గు చూపుతున్నారు.

మహారాష్ట్ర, కర్ణాటక - ఐటీ హబ్‌ల జోరు
మహారాష్ట్రలో సుమారు 4 లక్షల ఈవీలు అమ్ముడయ్యాయి. ఇక్కడ మార్కెట్ చాలా వైవిధ్యంగా ఉంది. ముంబై, పూణే వంటి నగరాల్లో టూ-వీలర్స్‌తో పాటు ప్యాసింజర్ ఎలక్ట్రిక్ కార్లకు భారీ డిమాండ్ ఉంది. పాత వాహనాన్ని తుక్కు (Scrappage Policy) కింద ఇస్తే ప్రభుత్వం ఇచ్చే ప్రోత్సాహకాలు ఇక్కడ బాగా పనిచేస్తున్నాయి. ఇక కర్ణాటక విషయానికి వస్తే, బెంగళూరు కేంద్రంగా ఇక్కడ చార్జింగ్ మౌలిక సదుపాయాలు అద్భుతంగా ఉన్నాయి. కారు కొనేటప్పుడు అయ్యే ఖర్చు కంటే, కారు నడిపేటప్పుడు అయ్యే ఖర్చు (TCO) గురించి ఆలోచించే ఐటీ నిపుణులు ఇక్కడ ఎక్కువగా ఉండటమే ఈవీల విజయ రహస్యం.

తమిళనాడు, పశ్చిమ బెంగాళ్ - తయారీ, వినియోగం
తమిళనాడు ఒక అరుదైన రాష్ట్రం. ఇది ఈవీలను తయారు చేసే హబ్ (EV Manufacturing Hub), పెద్ద మార్కెట్ కూడా. ఇక్కడ సుమారు 1.52 లక్షల ఈవీలు అమ్ముడయ్యాయి. ఓలా, ఏథర్ వంటి కంపెనీల తయారీ కేంద్రాలు ఇక్కడే ఉండటం వల్ల సప్లై అండ్ డిమాండ్ బ్యాలెన్స్‌డ్‌గా ఉన్నాయి. ఇక పశ్చిమ బెంగాల్, మధ్యప్రదేశ్ రాష్ట్రాల్లో కూడా ఒక్కో రాష్ట్రంలో సగటున 1.5 లక్షల యూనిట్ల అమ్మకాలు జరిగాయి. ఈ రాష్ట్రాల్లో ముఖ్యంగా చిన్న వ్యాపారులు, డెలివరీ బాయ్స్ టూ-వీలర్ ఈవీలను తమ ఆదాయ వనరుగా మార్చుకుంటున్నారు. తెలంగాణ, ఏపీల్లో కూడా విపరీతంగా ఈవీలు అమ్ముడవుతున్నాయి.

ఎందుకు కొంటున్నారు?
ఫెడరేషన్ ఆఫ్ ఆటోమొబైల్ డీలర్స్ అసోసియేషన్ (FADA) ఉపాధ్యక్షుడు సాయి గిరిధర్ అభిప్రాయం ప్రకారం.. రాష్ట్ర ప్రభుత్వాలు ఇచ్చే ఇన్సెంటివ్‌లు స్పష్టంగా ఉండటం వల్లే కస్టమర్లు ముందుకు వస్తున్నారు. గతంలో ఈవీ అంటే రేంజ్ సరిపోదు, చార్జింగ్ ఎక్కడ పెట్టుకోవాలి అనే భయాలు ఉండేవి. కానీ ఇప్పుడు రాష్ట్రాల పాలసీలు ఆ భయాలను పోగొట్టాయి. ఆటోనెక్స్ట్ ఆటోమేషన్ వ్యవస్థాపకుడు కౌస్తుభ్ ధోండే మాట్లాడుతూ.. "ఇది కేవలం ప్రభుత్వ ప్రోత్సాహం వల్ల మాత్రమే జరగడం లేదు, ఆర్థికంగా ఈవీలు కొంటేనే లాభం అని ప్రజలు గ్రహిస్తున్నారు" అని తెలిపారు.

సవాళ్లు, భవిష్యత్తు
అమ్మకాలు పెరుగుతున్నా, దేశవ్యాప్తంగా చార్జింగ్ స్టేషన్ల సంఖ్య ఇంకా పెరగాల్సి ఉంది. గల్లీ గల్లీలో పెట్రోల్ బంకులు ఉన్నట్టుగా, ప్రతి ఏరియాలో చార్జింగ్ పాయింట్లు అందుబాటులోకి వస్తే భారత్ పూర్తిస్థాయి ఈవీ దేశంగా మారుతుంది. ఏదేమైనా 2026 ఆర్థిక సంవత్సరంలో జరిగిన 25-27 లక్షల యూనిట్ల అమ్మకాలు చూస్తుంటే, రాబోయే ఐదేళ్లలో రోడ్ల మీద పెట్రోల్ వాహనాల కంటే బ్యాటరీ వాహనాలే ఎక్కువగా కనిపిస్తాయని అర్థమవుతోంది.