ఎలక్ట్రిక్ విమానాల తయారీపై దృష్టి పెట్టిన నాసా.. త్వరలో గాలిలోకి ఎగరనున్న ఎక్స్-57 మ్యాక్స్‌వెల్!

ఈ పరీక్షల నాసా విజయం సాధిస్తే, ప్రపంచ యావియేషన్ పరిశ్రమలో ఇదొక కొత్త మైలురాయిగా నిలుస్తుంది. నాసా ఎక్స్-57 మాక్స్‌వెల్ టేకాఫ్ కోసం మొత్తం 14 ఎలక్ట్రిక్ మోటార్‌లను ఉపయోగిస్తుంది మరియు కొంత ఎత్తుకు చేరుకున్న తర్వాత క్రూయిజ్ సమయంలో బయట ఉండే రెండు పెద్ద మోటార్లు మాత్రమే ఉపయోగించబడతాయి. అసలు X-57 మాక్స్‌వెల్ అంటే ఏమిటి మరియు భవిష్యత్తులో మనం ప్రయాణించే విధానాన్ని ఇది ఎలా ప్రభావితం చేస్తుంది. ఈ స్వచ్ఛమైన ఎలక్ట్రిక్ ఎయిర్‌క్రాఫ్ట్‌ను మరింత లోతుగా పరిశీలిద్దాం రండి.

కొత్త ఎక్స్-57 'మాక్స్‌వెల్' అనేది నాసా నుండి వచ్చిన ప్రయోగాత్మక విమానాల శ్రేణిలో సరికొత్తది, ఇది ప్రజలు ప్రయాణించే విధానాన్ని, ముఖ్యంగా మిలిటరీ ప్రయాణ విధానాన్ని పూర్తిగా మార్చేయనుంది. ఈ లైనప్‌లోని మొదటి విమానం బెల్ ఎక్స్-1, ఇది బుల్లెట్ ఆకారంలో ఉండి, రాకెట్‌ ఇంజన్ తో నడిచేది విమానం. ఇది అక్టోబరు 14, 1947న చక్ యెగేర్‌ మొట్టమొదటిగా ఎగిరిన విమానం.

ఇదే ఎక్స్ ప్లేన్ లైనప్‌లో కొత్తగా వచ్చినది ఎక్స్-57 'మాక్స్‌వెల్', ఇది NASA యొక్క మొట్టమొదటి ఆల్-ఎలక్ట్రిక్, బ్యాటరీ పవర్డ్ విమానం. ఎక్స్-57 ప్రాజెక్ట్ 2016లో ప్రారంభమైంది మరియు విద్యుదయస్కాంత వికిరణం (electromagnetic radiation) యొక్క శాస్త్రీయ సిద్ధాంతాన్ని రూపొందించిన స్కాటిష్ భౌతిక శాస్త్రవేత్త జేమ్స్ క్లర్క్ మాక్స్‌వెల్ పేరు మీదగా ఈ విమానానికి నాసా ఎక్స్-57 మాక్స్‌వెల్ అనే పేరు పెట్టారు.

ఎక్స్-57 మాక్స్‌వెల్ పూర్తిగా కొత్త విమానం కాదు కానీ ప్రస్తుతం ఉన్న టెక్నామ్ పి2006టి (Tecnam P2006T)ఆధారంగా రూపొందించబడింది, ఇది పూర్తిగా మెటల్ తో తయారైన హై-వింగ్డ్, ఫోర్-సీటర్ ఎయిర్‌ప్లేన్. ఇది రెండు లిక్విడ్-కూల్డ్ రోటాక్స్ ఇంజన్‌ లను ఉపయోగించి ఏవిగ్యాస్‌ అలాగే సాధారణ 92-ఆక్టేన్ పెట్రోల్ ఇంధనం ద్వారా పనిచేస్తుంది. ఇప్పటికే ఉన్న ఈ ప్లాట్‌ఫారమ్‌ను ఉపయోగించడం ద్వారా, NASA లోని శాస్త్రవేత్తలు ఇందులో ఓ బేస్‌లైన్ మోడల్‌ను ఎలక్ట్రిక్ పవర్‌ట్రైన్ తో డిజైన్ చేశారు.

ఎక్స్-57 మాక్స్‌వెల్ ఎలక్ట్రిక్ ప్లేన్ కోసం, నాసా తమ P2006T పెట్రోల్ పవర్డ్ ప్లేన్ యొక్క ఎత్తైన రెక్కలను తీసివేసి, వాటి స్థానంలో ప్రొపెల్లర్‌లను అనుసంధానించారు. ఇందులో మొత్తం 14 ఎలక్ట్రిక్ మోటార్లు అమర్చిన రెక్కల సెట్‌ ఉంటుంది. నాసా ఈ వ్యవస్థను శాస్త్రీయంగా లీడింగ్-ఎడ్జ్ అసింక్రోనస్ ప్రొపెల్లర్ టెక్నాలజీ లేదా LEAP అనే పేరుతో పిలుస్తుంది. మాక్స్‌వెల్‌లోని LEAP సిస్టమ్ 12 చిన్న హై-లిఫ్ట్ మోటార్‌లను కలిగి ఉంటుంది, ఇవి రెక్కల అంచున అమర్చబడి ఉంటాయి. అలాగే, మిగిలిన రెండు పెద్ద మోటార్లు రెక్కల చివర్లపై అమర్చబడి ఉంటాయి.

మరి నాసా ఎందుకు ఈ ఎలక్ట్రిక్ ఎయిర్‌క్రాఫ్ట్ అన్ని ప్రొపెల్లర్లను ఉపయోగిస్తోంది? దీని వెనుక ఓ పెద్ద సైన్స్ దాగి ఉంది. విమానపు రెక్కలలో పెద్ద సంఖ్యలో ప్రొపెల్లర్లను ఉపయోగించడం వలన ఎయిర్‌క్రాఫ్ట్ రెక్కలపై గాలిని మరింత వేగంగా నెట్టడంలో ఇవి సహాయపడతాయి, తద్వారా తక్కువ వేగంతో ఎక్కువ లిఫ్ట్‌ను ఉత్పత్తి చేయవచ్చు. ఈ హై-లిఫ్ట్ మోటార్‌లు ఫ్లెక్సిబుల్ ప్రొపెల్లర్‌లను కలిగి ఉంటాయి, ఇవి ఎక్స్-57 మాక్స్‌వెల్ క్రూజింగ్ వేగాన్ని చేరుకున్న తర్వాత వాటిని పట్టుకునే నాసెల్‌లలోకి ఆపి మడవగలిగే సామర్థ్యాన్ని కలిగి ఉంటాయి.

ఈ ఎలక్ట్రిక్ ఎయిర్‌క్రాఫ్ట్ క్రూజింగ్ వేగాన్ని చేరుకున్న తర్వాత, రెండు పెద్ద వింగ్‌టిప్ ప్రొపెల్లర్లు ఒక్కొక్కటి 60kW మోటారు ద్వారా శక్తిని పొందుతాయి మరియు ప్రయోగాత్మకంగా విమానం గరిష్టంగా 138 మైళ్లు (222 కెఎంపిహెచ్) వేగాన్ని చేరుకోవడంలో ఇవి రెండూ సహాయపడతాయి. ఈ ఎలక్ట్రిక్ మోటార్లకు శని అందించడానికి లిథియం-అయాన్ బ్యాటరీ ప్యాక్ లను ఉపయోగిస్తారు. నాసా ఇందుకోసం కాలిఫోర్నియా-ఆధారిత ఎలక్ట్రిక్ పవర్ సిస్టమ్స్‌తో కలిసి పనిచేసింది, ఇది ఎక్స్-57 కోసం పవర్ సిస్టమ్‌ను రూపొందించడానికి షెల్ఫ్ లిథియం-అయాన్ బ్యాటరీలను ఉపయోగించింది.

ఇందులోని ప్రతి బ్యాటరీ మాడ్యూల్ లో 320 సెల్‌లను ఉపయోగిస్తుంది మరియు ఈ విమానంలో 16 మాడ్యూల్స్‌తో కూడిన మొత్తం 5,120 సెల్‌లు ఉంటాయి. నాసా ఎక్స్-57 మాక్స్‌వెల్ యొక్క డిస్ట్రిబ్యూటెడ్ ఎలక్ట్రికల్ ప్రొపల్షన్ (DEP) సిస్టమ్ సాంప్రదాయ విమానాల కంటే క్లీనర్, గ్రీన్ మరియు చౌకైనది అని NASA పేర్కొంది. ఒక సంప్రదాయ విమానాన్ని నడపడానికి అయ్యే ఖర్చు గంటకు $200 (రూ. 15,541)తో పోలిస్తే DEP వ్యవస్థతో నడిచే విమానం కోసం గంటకు సగటు ఇంధనం కేవలం $35 (రూ. 2,720) మాత్రమే ఖర్చు అవుతుందని నాసా పేర్కొంది.

చిత్ర సౌజన్యం - NASA