కారు తాళాలు చేతిలో ఉన్నా.. ప్రాణాలు కాపాడలేని పరిస్థితి.. నలుగురు చిన్నారుల మృతికి కారకులెవరు ?

చిన్నారి పిల్లల ఆటవిడుపు విషాదంగా మారింది. ఆంధ్రాప్రదేశ్‌లో జరిగిన ఈ హృదయ విదారక ఘటన అందరినీ కలచివేస్తోంది. ఆడుకుంటూ కారులోపల చిక్కుకున్న నలుగురు చిన్నారి పిల్లలు ఊపిరాడక చనిపోవడం అత్యంత బాధాకరం. ఈ దుర్ఘటనకు కారణాలేంటి? తల్లిదండ్రుల నిర్లక్ష్యం ఎంతవరకు ఉంది? వివరంగా తెలుసుకుందాం.

ఆంధ్రప్రదేశ్‌లో జరిగిన హృదయ విదారక ఘటన దేశవ్యాప్తంగా తీవ్ర విషాదాన్ని నింపింది. విజయనగరం జిల్లా ద్వారపూడి గ్రామంలో ఆడుకుంటూ కారులోపల చిక్కుకున్న నలుగురు చిన్నారి పిల్లలు ఊపిరాడక చనిపోయారు. ఉదయ్ (8), చారుమతి (8), కరిష్మా (6), మానస్వి (6) అనే ఈ నలుగురు పిల్లలు ఆదివారం ఉదయం నుండి కనిపించకుండా పోయారని తల్లిదండ్రులు పోలీసులకు ఫిర్యాదు చేశారు.

వెంటనే రంగంలోకి దిగిన పోలీసులు గ్రామస్థులతో కలిసి గాలింపు చర్యలు చేపట్టారు. ఇంటి దగ్గర పార్క్ చేసి ఉన్న హ్యుండాయ్ వెర్నా కారును అనుమానంతో తనిఖీ చేయగా.. అందులో నలుగురు పిల్లలు స్పృహలేని స్థితిలో కనిపించారు. అయితే కారు డోర్లు లాక్ అయి ఉండటంతో వారిని బయటకు తీయడం కష్టమైంది.

కారు తాళాలు లోపల పిల్లల చేతుల్లోనే ఉండడం మరింత విషాదకరం. చివరికి కారు అద్దాలు పగలగొట్టి పిల్లలను బయటకు తీసినప్పటికీ అప్పటికే వారి ప్రాణాలు పోయాయి. దగ్గరలోని ఆసుపత్రికి తరలించగా వైద్యులు వారు చనిపోయినట్లు నిర్ధారించారు.

ఈ దుర్ఘటనతో ద్వారపూడి గ్రామంలో విషాదఛాయలు అలుముకున్నాయి. మృతి చెందిన పిల్లల్లో చారుమతి, కరిష్మా అనే ఇద్దరు అక్కాచెల్లెళ్లు కారు యజమాని కుమార్తెలు కాగా, మిగిలిన ఇద్దరు వారి స్నేహితులు. ఆడుకుంటూ ఇంట్లో ఉన్న కారు తాళాలు తీసుకుని కారు డోర్లు తెరిచి లోపల ఆడుకుంటుండగా ప్రమాదవశాత్తు డోర్లు లాక్ అయిపోయాయి.

ఎండ తీవ్రత ఎక్కువగా ఉండటం, కారు కిటికీలు మూసి ఉండటం, ఫ్యాన్ తిరగకపోవడంతో ఊపిరాడక నలుగురు పిల్లలు మరణించారని పోలీసులు ప్రాథమికంగా నిర్ధారించారు. మూసి ఉన్న కారులో గాలి ప్రసరణ లేకపోవడం వల్ల ఆక్సిజన్ స్థాయి క్రమంగా తగ్గిపోతుంది. అదే సమయంలో మనం వదిలే కార్బన్ డయాక్సైడ్ శాతం పెరుగుతుంది.

మనిషి ప్రాణానికి అత్యంత అవసరమైన ఆక్సిజన్ అందకపోతే ప్రాణాలు కోల్పోతారు. పెద్దవాళ్లు కొంత సమయం వరకు తట్టుకోగలరు కానీ, పిల్లలు చాలా త్వరగా ప్రమాదంలో పడతారు. ఆక్సిజన్ పూర్తిగా నిలిచిపోయే సమయానికి మరణం సంభవిస్తుంది. అంతకుముందు తీవ్రమైన తలనొప్పి, వాంతులు వంటి లక్షణాలు కనిపిస్తాయి.

కాబట్టి, వీలైనంత వరకు పిల్లలకు అందుబాటులో లేని చోట కారు తాళాలు ఉంచడం చాలా ముఖ్యం. పిల్లలకు కారు తాళాలు ఎలా వాడాలో నేర్పకపోవడమే మంచిది. కారు పార్క్ చేసిన తర్వాత కవర్ తో పూర్తిగా కప్పి ఉంచడం మరింత సురక్షితం. అంతేకాకుండా, ఒకవేళ కారులో చిక్కుకుపోతే ఏమి జరుగుతుందో పిల్లలకు అర్థమయ్యేలా చెప్పడం కూడా ఒక రకమైన ముందు జాగ్రత్త చర్యే.

డ్రైవ్‌స్పార్క్ అభిప్రాయం: ఆంధ్రాలో జరిగిన ఈ విషాద ఘటనకు పిల్లల కంటే వారి తల్లిదండ్రులే బాధ్యత వహించాలి. పిల్లల చేతికి అందేంత దగ్గరగా కారు తాళాలు ఉంచడం పెద్ద తప్పు. ఒక్కరు కాదు నలుగురు పిల్లలు ఉదయం నుంచి కనిపించకపోతే, వారిని మరింత ముందుగానే వెతికి పట్టుకోవాల్సింది. కనీస జాగ్రత్తలు తీసుకుని ఉంటే ఈ నలుగురు ప్రాణాలు కాపాడి ఉండవచ్చు.