తాళం చెవి పోయిందా..? అయితే ఈ యాప్‌తో ప్రింట్ చేసుకోండి..!

మీ కారు, బైక్ లేదా ఇంటి తాళం ఏదేనా సరే పోగొట్టుకున్నారా.. అయితే కంగారు పడకండి. మీ వాహనాలు, ఇళ్లకు సంబంధించిన తాళం చెవులను అచ్చుగుద్దినట్లు అలానే, కేవలం ఒక్క నిమిషంలో ప్రింట్ చేసిచ్చేందుకు ఓ సరికొత్త అప్లికేషన్ పుట్టుకొచ్చింది.

న్యూయార్క్‌కి చెందిన కీమి (KeyMe) అప్లికేషన్ సాయంతో ఇది సాధ్యమవుతుంది. ఇందుకు మీరు చేయాల్సిందల్లా మీ వాహనాలు, ఇళ్లకు సంబంధించిన తాళం చెవులను ముందుగా ఫొటో తీసుకొని, ఈ అప్లికేషన్‌లో స్టోర్ చేసుకోవటమే.

ఈ అప్లికేషన్ సదరు ఫొటోలను కంపెనీ సిస్టమ్‌లోకి అప్‌లోడ్ చేస్తుంది. న్యూయార్క్ సిటీ వ్యాప్తంగా దాదాపు రెండు డజన్లకు పైగా కీమి ఆటోమేటెడ్ లొకేషన్లు అందుబాటులో ఉన్నాయి. వీటి ద్వారా యూజర్లు, తాళం చెవులను ప్రింట్ చేయించుకోవచ్చు. బాగుంది కదూ ఈ కొత్త టెక్నాలజీ..!