కరోనా రోగుల కోసం కార్లనే మొబైల్ హాస్పిటల్స్‌గా మార్చిన యువకులు

కరోనా సోకిన ప్రజల సంఖ్య ఎక్కువవుతున్న తరుణంలో హాస్పిటల్స్ లో బెడ్ల కొరతతోపాటు ఆక్సిజన్ కొరత కూడా ఎక్కువగా ఉంది. ఈ ఆక్సిజన్ కొరత కారణంగా ఎంతోమంది ప్రజలు ప్రాణాలు కోల్పోయిన సంఘటనలో చాలా వెలుగులోకి వచ్చాయి. ఆక్సిజన్ కొరత ఏ స్థాయిలో ఉందొ దాదాపు అందరికీ తెలుసు.

కరోనా రోగులకు కనీస సదుపాయాలు కూడా లేని సమయంలో చాలామంది ఉదారంగా సేవలందించడానికి ముందుకు వస్తున్నారు. ఇటీవల కాలంలో రాజస్థాన్‌కు చెందిన ఆరుగురు స్నేహితులు తమ 4 కార్లను మొబైల్ హాస్పిటల్స్ గా మార్చారు. హాస్పిటల్స్ లో బెడ్ దొరకడానికి ఇబ్బంది పడుతున్న కరోనా పేషంట్లకు సహాయం చేస్తున్నారు.

ఈ యువకులు తమ కార్లను ప్రజలకు ఉచితంగా సర్వీస్ చేయడానికి తమ కార్లను హాస్పిటల్ వెలుపల పార్క్ చేసి మొబైల్ హాస్పిటల్స్ గా మార్చారు. హాస్పిటల్ లో అత్యవసర సమయంలో బెడ్ దొరకని రోగులు వీటిని ఉపయోగించుకోవచ్చు. ఈ కార్లలో రోగికి కావలసిన అన్ని సదుపాయాలు అందుబాటులో ఉన్నాయి.

ఈ కార్లలో ఆక్సిజన్ సరఫరా ఉంది, అంతే కాకుండా ఇందులో ఎసి వంటివి కూడా అందుబాటులో ఉన్నాయి. మొబైల్ హాస్పిటల్స్ గా మార్చిన ఈ నాలుగు కార్లలో ఫోర్డ్ ఎకోస్పోర్ట్ మరియు వోక్స్‌వ్యాగన్ పోలో ఉన్నాయి. అయితే మిగిలిన కార్ బ్రాండ్ల గురించి ఖచ్చితమైన సమాచారం అందుబాటులో లేదు.

ఈ యువకులు గత కొన్ని వారాలుగా కరోనా వైరస్ సంక్రమణకు గురైన ప్రజలకు నిరాడంబరంగా సర్వీస్ చేస్తున్నారు. ఈ యువకులు ప్రతి రోజూ కనీసం 5 నుండి 6 మందికి సహాయం చేస్తున్నారు. వీరు రాజస్థాన్‌లోని కోటా ప్రాంతంలో సర్వీస్ చేస్తున్నారు. వారు కోటాలోని వివిధ ప్రాంతాల నుండి ఆక్సిజన్ పొందుతున్నారు.

ప్రస్తుతం దేశంలో ఆక్సిజన్ కొరత ఎక్కువగా ఉన్న కారణంగా ఆ యువకులు ఆక్సిజన్ పొందడానికి చాలా కాలం వేచి ఉండవలసి వచ్చిందని తెలిపారు. కరోనా సోకినవారికి సహాయం చేయడానికి ఈ యువకులు తమ సొంత డబ్బును ఉపయోగిస్తున్నారు. వారు ఇతరుల నుంచి ఎటువంటి సహాయం పొందలేదు. రాబోయే రోజుల్లో అంబులెన్స్ కొనాలని కూడా ఆలోచిస్తున్నట్లు తెలిపారు.

ఈ యువకులు ఇంకా చాలా ఎక్కువమందికి సహాయం చేయాలని నిర్ణయించుకున్నారు. భారతదేశంలో ప్రతిరోజూ 3 లక్షలకు పైగా కొత్త కేసులు నమోదవుతున్నాయి. దీంతో ఆస్పత్రుల్లో ఆక్సిజన్ కొరత ఏర్పడింది. ఆక్సిజన్ కొరతను పరిష్కరించడానికి కేంద్ర, రాష్ట్ర ప్రభుత్వాలు అనేక చర్యలు తీసుకుంటున్నాయి.

కోవిడ్ 19 సమస్య నుండి ప్రపంచం త్వరలో కోలుకోవాలని అందరూ ఆశిస్తున్నారు. ఈ సమయంలోనే మనసున్న నిజమైన హీరోలు ప్రజలకు సేవ చేయడానికి ముందుకు వస్తున్నారు. రాజస్థాన్ లోని కోటాలో కరోనా వైరస్ సోకిన ప్రజలకు సహాయం చేయడం ద్వారా ఈ ఆరుగురు యువకులు నిజమైన హీరోలుగా ప్రశంసించబడుతున్నారు. ఏది ఏమైనా ఇంత నిరాడంబరంగా సర్వీస్ చేస్తున్న యువకులు నిజంగా అభినందనీయులు.

Image Courtesy: Hindustan Times