బ్లడ్‌హౌండ్ ల్యాండ్ స్పీడ్ రికార్డుకు రోల్స్ రాయిస్ మద్దతు

By Ravi

Published: Tuesday, May 21, 2013, 17:15 [IST]

గంటకు 1600 కిలోమీటర్ల వేగంతో వెళ్లే కారు గురించి మీరు ఇదివరకే విని ఉంటారు. బ్రిటన్‌కు చెందిన పరిశోధకులు జెట్ ఇంజన్‌తో నడిచే ఓ సూపర్ కారును అభివృద్ధి చేస్తున్న సంగతి తెలిసినదే. అయితే, ఈ కారు ఇంకా పూర్తిస్థాయిలో సిద్ధం కాలేదు. బుల్లెట్ కంటే వేగంగా ప్రయాణించే ఈ సూపర్ కారు పేరు 'బ్లడ్‌హౌండ్' (Bloodhound). ఈ ప్రాజెక్టుకు రిచర్డ్ నోబెల్ సారధ్యం వహిస్తున్నారు. వాస్తవానికి ఈ కారు 2012లో నిజం రూపం దాల్చాల్సి ఉంది. అయితే, కొన్ని అనివార్య కారణాల వలన ఈ ప్రాజెక్ట్ నెమ్మదిగా సాగుతోంది.

ప్రస్తుతం ఈ బ్లడ్‌హౌండ్ ప్రాజెక్టుకు బ్రిటీష్ ఆటో దిగ్గజం రోల్స్ రాయిస్ తమ మద్దతు ప్రకటించింది. ఇందులో భాగంగా రోల్స్ రాయిస్ ఈ ప్రాజెక్టుకు కావల్సిన ఇంజన్, ఆర్థిక మరియు సాంకేతిక మద్ధతులను ఈ ప్రాజెక్టుకు అందించనుంది. బ్లడ్‌హౌండ్ వెహికల్‌లో రోల్స్ రాయిస్ ఈజె200 జెట్ ఇంజన్‌ను ఉపయోగించనున్నారు. ఇదే ఇంజన్‌ను యూరోఫైటర్ టైఫూన్ కోంబాట్ ఎయిర్‌క్రాఫ్ట్‌లో ఉపయోగించారు.

మరి గంటకు గరిష్టంగా 1600 కిలోమీటర్ల వేగంతో ప్రయాణించే ఈ కారును నడపాలంటే సాధారణ రోడ్లు పనికిరావు. అందుకే ఈ బ్లడ్‌హౌండ్ కారును దక్షిణాఫ్రికాలోని నార్తర్న్ కేప్ ప్రావిన్స్‌లో ఉన్న హాక్‌స్కీన్ పాన్ అనే ఎండిపోయిన సరస్సు లోపల మాత్రమే దీనిని నడుపుతారు. ఎండిపోయిన ఈ సరస్సు గర్భాన్ని రేస్‌ ట్రాక్‌గా మారుస్తున్నారు. ఇందుకోసం ఏర్పాట్లు కూడా జరుగుతున్నాయి. బ్లడ్‌హౌండ్ సూపర్‌కారు అంత గరిష్ట వేగంతో వెళ్తుంది కాబట్టి, కారుకు ఏ చిన్న రాయి తగిలినా చాలా పెద్ద ప్రమాదం జరిగే అవకాశం ఉంది.

అందుకే సుమారు 20 కిలోమీటర్ల పొడవు, 1.5 కిలోమీటర్ల వెడల్పు ఉండేలా ఈ సరస్సు గర్భాన్ని దాదాపు 300 మంది కార్యకర్తలు శుభ్రం చేస్తున్నారు. చిన్నచిన్న రాళ్లను ఏరిపారేస్తున్నారు. బ్లడ్‌హౌండ్ ప్రాజెక్టుకు సారథ్యం వహిస్తున్న రిచర్డ్ నోబెల్ ఈ తరహా కారు నిర్మించడం ఇదే మొదటిసారి కాదు. గతంలో ఆయన గరిష్టంగా గంటకు 1019 కిలోమీటర్ల వేగంతో నడిచే ‘థ్రస్ట్-2'ను విజయవంతంగా నడిపి చూపించారు. ఆ తరువాత ఈయన ఆధ్వర్యంలో రూపుదిద్దుకున్న థ్రస్ట్ సూపర్‌సోనిక్ కార్ 1997లోనే గంటకు 1228 కిలోమీటర్ల వేగంతో దూసుకెళ్లి సరికొత్త రికార్డులు సృష్టించింది. మరి ఈ బ్లడ్‌హౌండ్ సూపర్ కారుపై ఓ కన్నేద్దామా..?