నడిరోడ్డు మీద అడ్డంగా పరువు తీసిన రూ.10కోట్ల కారు.. దీనికంటే ఆల్టోనే నయం అంటున్న నెటిజన్లు

రూ. 10 కోట్లు పెట్టి కొన్న లగ్జరీ కారు వర్షపు నీటిలో ఆగిపోతే ఎలా ఉంటుంది? ప్రస్తుతం అదే జరిగింది. కోల్‌కతాలో కురిసిన భారీ వర్షాలకు రోడ్లపై వరద భారీగా నిలిచిపోగా.. అత్యంత ఖరీదైన రోల్స్ రాయిస్ ఘోస్ట్ సిరీస్ II కారు మధ్యలోనే బ్రేక్‌డౌన్ అయింది. పక్కనుంచి రూ.10 లక్షల టాటా కారు దూసుకుపోతుంటే, కోట్ల కారు మొరాయించడంతో ఈ వీడియో సోషల్ మీడియాలో వైరల్ అయ్యింది. ఈ ఘటనపై నెటిజన్లు ప్రభుత్వంపై ఆగ్రహం వ్యక్తం చేయడంతో పాటు, చిన్న కార్లే నయమని కామెంట్ చేస్తున్నారు.

వాస్తవానికి దేశంలోని చాలా ప్రాంతాల్లో రోడ్ల నాణ్యత దారుణంగా ఉంటుంది. ముఖ్యంగా వర్షాకాలం వచ్చిందంటే చాలు రోడ్లన్నీ పూర్తిగా నీట మునిగిపోతాయి. సరిపడా డ్రైనేజీ వ్యవస్థ లేకపోవడమే దీనికి ప్రధాన కారణం. రోడ్లపై భారీగా వర్షపు నీరు నిలిచిపోవడంతో వాహనదారులు తీవ్ర ఇబ్బందులు పడుతున్నారు. కొన్నిసార్లు అత్యంత ఖరీదైన వాహనాలు కూడా ఈ వరద నీటిలో చిక్కుకుని బ్రేక్‌డౌన్ అవుతాయి. గతేడాది ఢిల్లీలో ఇలాంటి ఘటనే ఒకటి చోటుచేసుకుంది. అప్పుడు రోల్స్ రాయిస్ ఘోస్ట్ సిరీస్ II కారు వర్షపు నీటిలో చిక్కుకుని ఆగిపోయింది.

ఇప్పుడు మరోసారి ఇలాంటి ఘటనే వెలుగులోకి వచ్చింది. ఈసారి పశ్చిమ బెంగాల్ రాజధాని కోల్‌కతాలో ప్రస్తుతం భారీ వర్షాలు కురుస్తున్నాయి. నగరంలోని చాలా ప్రాంతాలు నీట మునిగిపోయాయి. రోడ్లపై పెద్ద ఎత్తున వరద నీరు నిలిచి ఉంది. ఇలా వర్షపు నీరు నిండిన ఒక రోడ్డుపై వెళ్తున్న రోల్స్ రాయిస్ ఘోస్ట్ సిరీస్ II కారు అకస్మాత్తుగా బ్రేక్‌డౌన్ అయి మధ్యలోనే నిలిచిపోయింది.

ఈ ఘటనకు సంబంధించిన ఫోటోలు, వీడియోలు Car Crazy India అనే ఇన్‌స్టాగ్రామ్ పేజీలో షేర్ చేశారు. ప్రస్తుతం అందుకు సంబంధించిన వీడియో తెగ వైరల్ అవుతుంది. ఈ వీడియోలో టాటా కారులో ప్రయాణిస్తున్న ఒక వ్యక్తి, వరద నీటిలో చిక్కుకున్న రోల్స్ రాయిస్ ఘోస్ట్ కారును చూపిస్తూ.. "రూ. 10 కోట్లకు పైగా విలువైన లగ్జరీ కారు కంటే తన రూ. 10 లక్షల టాటా కారే నయం" అంటూ కామెంట్ చేశాడు. ఈ ఘటన దక్షిణ కోల్‌కతాలోని బాలిగంజ్ ప్రాంతంలో జరిగిందని తెలుస్తోంది.

భారత మార్కెట్‌లో రోల్స్ రాయిస్ ఘోస్ట్ సిరీస్ II కారు బేస్ వేరియంట్ ధర రూ. 8.95 కోట్లు కాగా, టాప్ వేరియంట్ ధర రూ. 10.52 కోట్లు (ఎక్స్-షోరూమ్ ధరలు) వరకు ఉంటుంది. ఇంతటి ఖరీదైన కారు వర్షపు నీటిలో బ్రేక్‌డౌన్ అయి నిలబడిపోవడం అందరినీ ఆశ్చర్యానికి గురిచేసింది.

అయితే, ఈ కారు ఏ మోడల్ దాని యజమాని ఎవరు అనే వివరాలు ఇంకా తెలియరాలేదు.డ్రైవ్‌స్పార్క్ అభిప్రాయం : వర్షపు నీరు ఎక్కువగా నిలిచిన రోడ్లపై కార్లను నడపకుండా ఉండడం చాలా మంచిది. భారీగా నీరు నిలిచి ఉన్న రోడ్డును చూసిన వెంటనే, కారును ఆపివేయాలి. కొద్ది దూరం ఎక్కువైనా సరే, వేరే మార్గంలో వెళ్లడం శ్రేయస్కరం. నీరు నిలిచిన రోడ్డులో కారును ముందుకు నడపకూడదు.

కొంతమంది తమ కారు గ్రౌండ్ క్లియరెన్స్ ఎక్కువ అని భావించి, వర్షపు నీటిలో ప్రయాణిస్తారు. ఇది చాలా తప్పు. ఎందుకంటే, రోడ్డుపై ఎంత లోతుగా నీరు నిలిచి ఉందో అంచనా వేయడం చాలా కష్టం. ఒకవేళ మీ కారు ఇంజిన్ నీటిలో మునిగితే, ఇంజిన్‌కు తీవ్ర నష్టం వాటిల్లవచ్చు. అంతేకాకుండా, కారులోని ఎలక్ట్రానిక్ భాగాలకు కూడా నష్టం జరిగే అవకాశం ఉంది. ఇలాంటి పరిస్థితి వస్తే, కారును రిపేర్ చేయడానికి భారీ మొత్తంలో ఖర్చు చేయాల్సి ఉంటుంది.

ఈ సంఘటనతో పాటు, నెటిజన్లు రోడ్ల దుస్థితిపై ప్రభుత్వంపై తీవ్ర విమర్శలు గుప్పిస్తున్నారు. రోడ్డు పన్ను, రిజిస్ట్రేషన్ ఫీజులు, ఆదాయ పన్ను మరియు ఇతర పన్నులు అన్నీ చెల్లించినప్పటికీ, ప్రభుత్వం మంచి రోడ్డు సౌకర్యాలను కల్పించలేకపోతోందని నెటిజన్లు ఆగ్రహం వ్యక్తం చేస్తున్నారు. ఈ ఆరోపణల్లో నిజం లేకపోలేదు.

అదే సమయంలో, మరికొంతమంది నెటిజన్లు, "ఈ రోల్స్ రాయిస్ కంటే మారుతి ఆల్టో కారే నయం" అని కామెంట్లు చేస్తున్నారు. ఇది అత్యంత ఖరీదైన వస్తువులు కూడా కొన్ని సందర్భాలలో పనికిరాకుండా పోతుంటాయని, సాధారణ వస్తువులే మేలనిపిస్తాయని రుజువు చేస్తుంది.