మరో కొత్త బుల్లెట్‌ ప్రూఫ్‌ కారులో సల్మాన్‌ ఖాన్.. దబాంగ్ కాస్ట్యూమ్‌లో హల్‌చల్‌..

బాలీవుడ్ కండల వీరుడు సల్మాన్ ఖాన్‌కు మరే ఇతర సెలబ్రిటీలకు లేనంత కార్ క్రేజ్ ఉంది. సల్మాన్ ఖాన్ గ్యారేజీలో అనేక లగ్జరీ కార్లు ఉన్నాయి. అయితే ఈ మధ్య కాలంలో ఈ ఓల్డ్‌ బ్యాచ్‌లర్‌కు బెదిరింపు కాల్స్‌ రావడంతో ప్రాణహాని కారణంగా బుల్లెట్ ప్రూఫ్ వాహనాలపై ఆసక్తి కనబరుస్తున్నారు.

సల్మాన్ ఖాన్‌కు గత కొన్ని నెలల క్రితం నేరగాళ్ల నుంచి హత్య బెదిరింపు కాల్స్‌ వచ్చాయి. ఈ నేపథ్యంలో సల్మాన్‌ మరింత భద్రత కోసం తరచుగా బుల్లెట్ ప్రూఫ్ కార్లలో ప్రయాణిస్తున్నారు. అయితే తాజాగా సల్మాన్ ఖాన్ బుల్లెట్ ప్రూఫ్ టయోటా ల్యాండ్ క్రూయిజర్(Land Cruiser) LC200లో ప్రత్యక్షమయ్యాడు. పూర్తి సమాచారం ఈ కథనంలో చదవండి.

ఇటీవల, సల్మాన్ తన సోదరుడి పుట్టినరోజు సందర్భంగా.. తన గన్‌మెన్‌లు, ఇతర భద్రతా సిబ్బందితో కలిసి వైట్‌కలర్‌ ఆర్మర్డ్ SUVలో అర్బాజ్ ఖాన్ ఇంటికి బయలుదేరారు. ఈ వీడియో ఆన్‌లైన్‌లో వైరల్‌గా మారింది. సల్మాన్ తన సోదరుడు అర్బాజ్‌ ఖాన్‌ పుట్టినరోజు సందర్భంగా అతని ఇంటికి వెళ్లినట్లు తెలుస్తోంది.

పుట్టినరోజు వేడుకలు ముగియగానే, సల్మాన్ తన సెక్యూరిటీ గార్డులు, ఉద్యోగులతో కలిసి తన బుల్లెట్‌ప్రూఫ్ ల్యాండ్ క్రూయిజర్ LC200 కారు ఎక్కారు. కండల వీరుడు సల్మాన్ ఖాన్ దబాంగ్ సినిమాలో ధరించిన హాట్ పింక్ ప్యాంట్లో సందడి చేసిన ఈ తాజా వీడియో ఇంటర్నెట్‌లో అభిమానుల దృష్టిని ఆకర్షించింది.

సల్మాన్ ఖాన్ ప్రయాణించిన బుల్లెట్ ప్రూఫ్ ల్యాండ్ క్రూయిజర్ LC200 గురించి చెప్పాలంటే.. ఇది ప్రముఖ టయోటా SUVకి అప్‌డేటెడ్‌ వెర్షన్. టయోటా OEM ఆర్మ్‌డ్‌ వాహనాలను తయారు చేయనప్పటికీ, ప్రత్యేకమైన ఆఫ్టర్‌మార్కెట్ గ్యారేజీలు ఈ హార్డ్‌ SUVని అగ్రశ్రేణి బాలిస్టిక్ రక్షణతో అమర్చాయి.

ఈ SUV బుల్లెట్‌ప్రూఫ్‌నెస్ గురించి నిర్దిష్ట వివరాలు వెల్లడి కానప్పటికీ, ఈ కారు అనేక అంతర్జాతీయ రక్షణ ప్రమాణాలకు అనుగుణంగా ఉంటుంది. ఇది VR9 లేదా VR10 రేట్ చేయబడే అవకాశం ఉంది. ఈ స్థాయి రక్షణ సల్మాన్ మరియు అతని కుటుంబానికి వారి ప్రయాణాల్లో ఏ ఆటంకం కలగకుండా రక్షణగా నిలుస్తుంది.

అంతేకాకుండా ఇటీవల సల్మాన్ ఖాన్ కొత్త బుల్లెట్ ప్రూఫ్ నిస్సాన్ పెట్రోల్ ఎస్‌యూవీని సైతం కొనుగోలు చేశారు. నిస్సాన్ బ్రాండ్ దేశంలో విపరీతమైన ప్రజాదరణ పొందుతోంది. అయితే, చాలా మందికి డిమాండ్ ఉన్న ఈ పెట్రోల్ SUV గురించి పూర్తిగా తెలియదు.

నిస్సాన్‌ పెట్రోల్‌ బుల్లెట్ ప్రూఫ్ కారు.. మిడిల్ ఈస్ట్ మరియు సౌత్ ఈస్ట్ దేశాల్లో విపరీతమైన ప్రజాదరణ పొందింది. ఈ SUVని దేశీయ మార్కెట్‌లో విక్రయించడం లేదు. సల్మాన్, అంతర్జాతీయ మార్కెట్‌లో ఈ కారును కొనుగోలు చేసి దేశంలోకి దిగుమతి చేసుకున్నట్లు సమాచారం.

నిస్సాన్ పెట్రోల్ SUV ఇంజిన్ పనితీరు గురించి మాట్లాడితే, ఇందులో 5.6 లీటర్ V8 పెట్రోల్ ఇంజిన్ ఉంది. ఇది 405 హెచ్‌పీ పవర్ వద్ద 560 ఎన్ఎమ్ గరిష్ఠ టార్క్‌ను ఉత్పత్తి చేస్తుంది. 7-స్పీడ్ ఆటోమేటిక్ గేర్‌బాక్స్‌తో జతచేయబడి ఉంటుంది. ఇది ఫోర్ వీల్ డ్రైవ్ టెక్నాలజీని కూడా కలిగి ఉండటం మరో ప్రత్యేకత.

ఈ కారు ధర దాదాపు రూ. 80 లక్షల నుంచి రూ.1 కోటి వరకు ఉంటుంది. నిస్సాన్ పెట్రోల్ మోడల్ 1951లో అంతర్జాతీయ మార్కెట్‌లో విడుదలైంది. విడుదలైనప్పటి నుంచి అత్యంత ప్రజాదరణ పొందడంతో పాటు దాని 6వ తరం వెర్షన్ ప్రస్తుతం కొనుగోలుకు అందుబాటులో ఉంది.

సల్మాన్ ఖాన్‌ విలాసవంతమైన లగ్జరీ కార్ల జాబితాలో ల్యాండ్ రోవర్ రేంజ్ రోవర్‌తో పాటు ఆడి RS7, మెర్సిడెస్‌ GL, మెర్సిడెస్‌ AMG-GLE 43 వంటి ప్రముఖ కార్లను కలిగి ఉన్నాడు. ఆడి RS7 శక్తివంతమైన 4.0-లీటర్ ట్విన్-టర్బో V8 పెట్రోల్ ఇంజిన్‌తో నడిచే ఈ సొగసైన సెడాన్ ప్రత్యేక ఆకర్షణగా నిలిచింది.