Sipani Dolphin మారుతికి పోటీగా వచ్చి నిలదొక్కుకోలేకపోయిన సూపర్ రేర్ కారు!!

ఆటోమొబైల్‌ రంగంలో ఎప్పటికప్పుడు తమ కొత్త, అధునాతన టెక్నాలజీ ప్రొడక్ట్‌లతో ఆయా కంపెనీలు పోటీపడుతుంటాయి. అందులో కొన్ని ఏళ్ల తరబడి అమ్మకాల్లో మొదటిస్థానంలో ఉంటే మరికొన్ని మార్కెట్‌లోకి వచ్చిన కొన్నేళ్లకే కనుమరుగైపోతాయి. అలా వచ్చిన కార్లలో ఈ కారు ఒకటి. తాజాగా కేరళలో రోడ్లపై ఆ కారు చక్కర్లు కొడుతూ ఓ యూట్యూబ్‌ ఛానల్‌ కంటపడింది. అందుకు సంబంధించిన వీడియోను పోస్ట్‌ చేస్తూ.. ఈ ఐకానిక్ చిన్న కారు పాత జ్ఞాపకాలను గుర్తుచేసినట్లు చెప్పుకొచ్చింది.

భారతదేశపు మొట్టమొదటి కాంపాక్ట్ హ్యాచ్‌బ్యాక్‌గా మారుతి 800 గురించి మనలో చాలా మందికి తెలుసు. అయితే, ఇది మారుతి 800 కాదు.. భారత్‌లో చిన్న ఎంట్రీ-లెవల్ హ్యాచ్‌బ్యాక్‌ల భావనకు మార్గదర్శకత్వం వహించిన మరొక కారు. దాని పేరు సిపానీ డాల్ఫిన్. ఇది మారుతి 800 కంటే ముందు వచ్చింది.. కానీ ఆ కారు విజయంతో డాల్ఫిన్ కనుమరుగైపోయింది. ఇప్పుడు ఆ కార్లు దేశంలో ఉన్నాయా అంటే గుర్తించడం చాలా కష్టం.

కేరళలో ఆ కారు యజమాని దీనిని అత్యంత శ్రద్ధగా చూసుకుంటున్నారు. అక్కడ వీల్స్‌ ఆన్‌ రోడ్‌ యూట్యూబ్‌ ఛానల్‌ వారి దృష్టిలో ఈ కారు పడటంతో సిపానీ డాల్ఫిన్‌ను వారు ప్రదర్శించారు. సిపానీ ఆటోమొబైల్స్‌ బెంగళూరులోని ఓ భారతీయ కార్ల కంపెనీ తయారీదారు. 1973 నుంచి ఈ సంస్థ కార్యకలాపాలు ప్రారంభించింది. ఆ సంస్థ నుంచి మొదటగా బాదల్‌ వచ్చినప్పటికీ.. డాల్ఫిన్‌ ఎక్కువ వాహనదారులకు చేరువైంది.

సిపానీ 1982లో డాల్ఫిన్‌ను పరిచయం చేసింది, ప్రధానంగా దాని తయారీ కేంద్రానికి సమీపంలో ఉన్న దక్షిణ భారత మార్కెట్‌లను లక్ష్యంగా చేసుకుంది. ముఖ్యంగా UK-ఆధారిత రిలయన్ట్ కిట్టెన్ యొక్క రీబ్యాడ్జ్ వెర్షన్, డాల్ఫిన్ చుట్టూ ఫైబర్ గ్లాస్‌ బాడీవర్క్ ఉంది. ఇది ఆ జనరేషన్‌లో చాలా ప్రత్యేకమైనది.

1983లో మారుతి 800 మార్కెట్‌లోకి వచ్చింది. దాని ప్రత్యేకతలు ఏంటంటే.. దాని విశ్వసనీయమైన జపనీస్ ఇంజినీరింగ్ మరియు మెటల్ బాడీవర్క్‌తో ప్రారంభించబడింది. దీంతో కొనుగోలుదారులు డాల్ఫిన్ యొక్క ఫైబర్‌గ్లాస్ బాడీ నాణ్యత మరియు మన్నికపై సందేహాలు వ్యక్తం చేశారు. ఈ క్రమంలో ఆ తర్వాత ఐదేళ్లలో దక్షిణ భారత రాష్ట్రాల్లో పరిమిత సంఖ్యలో డాల్ఫిన్‌ అమ్మకాలు జరిగాయి.

4 సిలిండర్‌ ఆధారిత ఇంజిన్ : ఇదిలా ఉండగా.. సిపానీ డాల్ఫిన్‌ శక్తివంతమైన మరియు ఆధారపడదగిన ఇంజన్. డాల్ఫిన్‌కు ప్రత్యక్ష పోటీదారు మారుతి 800 మూడు-సిలిండర్ల 796 సీసీ ఇంజిన్‌ను కలిగి ఉంటే.. డాల్ఫిన్ నాలుగు సిలిండర్ల 848 సీసీ పెట్రోల్ ఇంజిన్‌ను కలిగి ఉండటం దీని ప్రత్యేకత. ఇది సిపానీకి అనుకూలంగా మారింది.

అదనపు సిలిండర్‌తో ఎక్కువ శుద్ధీకరణ మరియు అధిక సామర్థ్యంతో ఎక్కువ శక్తిని పొందడంతోపాటు, డాల్ఫిన్ యొక్క 848cc ఇంజిన్ గరిష్టంగా 38 bhp శక్తిని ఉత్పత్తి చేస్తుంది. డాల్ఫిన్‌ బాడీ ఫైబర్‌గ్లాస్‌ను కలిగి ఉండటంతో.. తేలికగా ఉండటం దీని ప్రత్యేకత. దీని బరువు కేవలం 505 కిలోలు మాత్రమం. అప్పట్లో ఈ కారు ఎయిర్ కండీషనర్‌తో కూడా వచ్చింది. ఈ కారు ఆ రోజుల్లో విలాసవంతమైన వాహనంగా పరిగణించబడింది.

భారతీయ మార్కెట్‌లో డాల్ఫిన్‌ పనితీరు తేలిపోవడంతో.. ఈ కారు 1987లో నిలిపివేయబడింది. 1982 లో మార్కెట్‌లోకి వచ్చిన డాల్ఫిన్‌ కేవలం ఐదేళ్లు మాత్రమే నిలదొక్కుకోగలిగింది. అనంతరం ఆ తర్వాత వచ్చిన సిపానీ మోంటానా విజయం సాధించింది. కొత్త మోడల్‌గా పునఃరూపకల్పన చేయబడిన మోంటానాలో స్టేషన్ వ్యాగన్ డిజైన్‌ విస్తరించడంతో పాటు.. ఓవర్‌హాంగ్, మరింత కోణీయ రూపాన్ని కలిగి ఉంది.