Car Insurance మీ కారు వరదల్లో మునిగిపోతే వెంటనే ఇలా ఇన్సూరెన్స్‌ క్లెయిమ్ చేసుకోండి..

ఏపీ, తమిళనాడు రాష్ట్రాల్లో మిచాంగ్‌(Michaung) తుపాను కారణంగా వరదలు ముంచెత్తుతున్నాయి. ఈ క్రమంలో పలు కార్లు వరద నీటిలో మునిగిపోతున్నాయి. ఇందుకు సంబంధించిన వీడియోలు కూడా నెట్టింట్లో చక్కర్లు కొడుతున్నాయి. కాగా వరదల కారణంగా మీ కారు పాడైపోతే ఎలా క్లెయిమ్‌ చేసుకోవాలో తెలుసా..

కొత్త కారు కొనుగోలు చేసినప్పుడు బీమా తప్పనిసరి. థర్డ్ పార్టీ ఇన్సూరెన్స్ తప్పనిసరి అయితే చాలా మంది కార్ల కొనుగోలుదారులు సమగ్ర బీమాను ఇష్టపడతారు. ఈ క్రమంలో కారులో ఏదైనా పొరపాటు జరిగితే, బీమా ద్వారా ఖర్చును మొత్తం క్లెయిమ్‌ చేసుకోవచ్చు. ఈ క్రమంలో మీ కారు వరద నీటిలో చిక్కుకున్నట్లయితే వాహనాన్ని రిపేర్ చేయడానికి బీమా ఇమేజ్‌ను ఎలా క్లెయిమ్ చేసుకోవాలో ఈ కథనంలో అందిస్తున్నాం..

మీ కారు వరద నీటిలో(Car Insurance Claim In Flood Conditions) మునిగిపోయినా లేదంటే కొట్టుకుపోయినా మీరు చేయవలసిన మొదటి పని ఓపికగా ఉండాలి. అకస్మాత్తుగా కారు డోర్‌ తెరవడానికి యత్నించకండి. దీని ద్వారా వరద నీరు కారు లోపలికి పోయే అవకాశం ఉంటుంది. ఈ సమయంలో కారును స్టార్ట్‌ చేయడానికి ప్రయత్నించవద్దు.

వరద నీరు పోయే వరకు ఓపికగా వేచి ఉండాలి. తర్వాత కారును సమీపంలోని మెకానిక్ లేదా మీ కార్ షోరూమ్ సర్వీస్ సెంటర్‌కు తీసుకెళ్లడం బెటర్‌. దీనికి ముందుగా కారు వరదలో చిక్కుకున్నప్పుడు.. ముందుగా ఎంత లోతు వరదలో మునిగిపోయి ఉందో మీ సెల్‌ఫోన్‌లో ఫొటో తీసుకోండి. ఈ ఫొటో మీరు క్లెయిమ్ చేసుకోవడానికి ఉపయోగపడుతుంది.

వరద సమయంలో మీ కారుకు సంబంధించిన సర్టిఫికెట్లను మీ దగ్గర భద్రంగా ఉంచుకోవాలి. మీరు కారు లోపల ఉన్నప్పుడు వరదల ప్రభావం ఎక్కువగా ఉన్నట్లయితే వెంటనే వాటిని ఫొటో తీసి మీరు ఇన్సూరెన్స్‌ చేసుకున్న బీమా కంపెనీకి ఫోన్‌ ద్వారా లేదంటే మెయిల్‌ ద్వారా సంప్రదించి పంపించాలి.

ఆ తర్వాత, వరద తగ్గుముఖం పట్టిన తర్వాత వరద నీటితో మీ వాహనం పాడైపోయినట్లయితే, ముందుగా మీరు పోలీసులకు ఫిర్యాదు చేయాలి. దీని ప్రకారం పోలీసులు మీ ఫిర్యాదును స్వీకరించి మొదటి విచారణ నివేదికను నమోదు చేస్తారు. దీని ఆధారంగా, బీమా కంపెనీలు మీ కారుకు నష్టపరిహారం చెల్లిస్తాయి. వరదల్లో మీ కారు పూర్తిగా దెబ్బతిన్న సందర్భాల్లో మాత్రమే FIR అవసరం.

ఆ తర్వాత సంబంధిత పత్రాలు, ఆధారాలతో బీమా కంపెనీని సంప్రదించి, కారును స్టార్ట్ చేయకుండానే సర్వీస్ సెంటర్‌కు తీసుకెళ్లి, కారు ఏమైందో క్షుణ్ణంగా పరిశీలించాలి. దాని గురించి బీమా కంపెనీకి తెలియజేయాలి. దీని ద్వారా కారు నష్టాన్ని సరిచేయడానికి ఎంత ఖర్చవుతుందో అంచనా వేయడానికి బీమా కంపెనీలు ముందుకు వస్తాయి.

నష్టం ఎక్కువగా జరిగినట్లయితే కంపెనీ కారును పూర్తిగా స్క్రాప్ చేసి, మీకు పూర్తి బీమా డబ్బును ఇవ్వాలని నిర్ణయించుకునే అవకాశం ఉంటుంది. దీని కోసం, బీమా కంపెనీ ప్రతినిధి మీ వాహనాన్ని వ్యక్తిగతంగా సందర్శిస్తారు. దానికి జరిగిన నష్టం గురించిన మొత్తం సమాచారాన్ని సేకరించి.. వాహనానికి జరిగిన డ్యామేజ్‌ని పరిశీలిస్తారు.

తర్వాత బీమా కంపెనీ అందించే మొత్తంతో మీరు సంతృప్తి చెందకపోతే, ఎక్కువ మొత్తాన్ని పొందడానికి మీరు కంపెనీతో చర్చలు జరపవచ్చు. మీ చివరి అంగీకారం తర్వాత మాత్రమే డబ్బు మీకు అందివ్వబడుతుంది. కొన్ని కంపెనీలు మీకు మొత్తం మొత్తాన్ని ఒకేసారి చెల్లిస్తాయి. మరికొన్ని మీకు వాయిదాలలో చెల్లిస్తాయి. ఇది మీరు ఎంపిక చేసుకున్న బీమా కంపెనీపై ఆధారపడి ఉంటుంది.

లేదంటే కారు మరమ్మతులకు గురై వినియోగించుకోగలిగితే, ఈ బీమా సొమ్ము నేరుగా సేవా కేంద్రానికి పంపిస్తారు. వరదలు, భారీ వర్షాలు, తుపాను ప్రభావం కారణంగా చాలా ప్రాంతాల్లో కార్లు, లేదంటే ఇతర వాహనాలు మునిగిపోవడం చూస్తుంటాం. ఆ సమయంలో వారికి ఏం చేయాలో తెలియదు. ఇన్సూరెన్స్‌ ద్వారా వరద ప్రభావానికి గురైన కార్లకు మీరు పూర్తి స్థాయిలో మీరు పరిహారం పొందవచ్చు.