ఫాస్ట్‌ట్యాగ్ అంటే ఏమిటి?.. పాత బ్యాంక్ నుండి కొత్త బ్యాంక్‌కు ఫాస్ట్‌ట్యాగ్ అకౌంట్ ఇలా ఈజీగా మార్చుకోండి

ఫాస్ట్‌ట్యాగ్ మన టోల్ ట్యాక్స్ పేమెంట్స్ చాలా ఈజీ చేస్తుంది. నాలుగు చక్రాల వాహనాలకు ఇది చాలా అవసరం. గతంలో టోల్ గేట్ల దగ్గర క్యూలో నిలబడి గంటల తరబడి ఎదురుచూడాల్సి వచ్చేది. కానీ ఇప్పుడు టెక్నాలజీ పెరిగింది కాబట్టి ఫాస్ట్‌ట్యాగ్ ఉంటే కొన్ని సెకన్లలోనే టోల్ కట్టేయొచ్చు. ఒకవేళ మీరు మీ పాత బ్యాంక్ నుంచి వేరే కొత్త బ్యాంక్‌కు మీ ఫాస్ట్‌ట్యాగ్ అకౌంట్‌ను మార్చుకోవాలనుకుంటున్నారా? అయితే, దానిని ఎలా చేయాలో స్టెప్-బై-స్టెప్ ప్రాసెస్ ఇప్పుడు తెలుసుకుందాం.

అసలు ఫాస్ట్‌ట్యాగ్ అంటే ఏమిటి?
ఫాస్ట్‌ట్యాగ్ అనేది ఒక చిన్న స్టిక్కర్, దీనిలో ఆర్‌ఎఫ్‌ఐడి (Radio-Frequency Identification) అనే టెక్నాలజీ ఉంటుంది. ఈ టెక్నాలజీ వల్ల భారతీయ హైవేలపై టోల్ ప్లాజాల దగ్గర ఆటోమేటిక్‌గా, క్యాష్ లేకుండానే టోల్ చెల్లించడం సాధ్యమవుతుంది. మీరు తరచుగా హైవేలపై ప్రయాణిస్తుంటే, మీ కారుకు ఇప్పటికే ఫాస్ట్‌ట్యాగ్ అతికించి, ఏదో ఒక బ్యాంక్ ప్రీపెయిడ్ వాలెట్ ద్వారా దాన్ని వాడుతూ ఉండే ఉంటారు.

ఫాస్ట్‌ట్యాగ్ అకౌంట్‌ను ఎందుకు మార్చుకోవాలి?
మీ ఫాస్ట్‌ట్యాగ్ అకౌంట్‌ను ఒక బ్యాంక్ నుండి మరొక బ్యాంక్‌కు మార్చుకోవడానికి కొన్ని కారణాలు ఉండొచ్చు. ఉదాహరణకు, మీరు వాడుతున్న పాత బ్యాంక్ సేవలు అంతగా బాగాలేకపోవడం, లేదా కొత్త బ్యాంక్‌లో ఫాస్ట్‌ట్యాగ్‌పై మంచి ఆఫర్లు ఉండటం, లేదా మీ బ్యాంక్ మారినప్పుడు ఇలాంటి సందర్భాల్లో అకౌంట్ మార్చుకోవాల్సి వస్తుంది.

ఫాస్ట్‌ట్యాగ్ అకౌంట్‌ను ఆన్‌లైన్‌లో ఎలా మార్చుకోవాలి?
మీ ఫాస్ట్‌ట్యాగ్ అకౌంట్‌ను ఆన్‌లైన్‌లో బదిలీ చేయడానికి కింద చెప్పిన సులభమైన స్టెప్స్‌ను పాటించండి
పాత ఫాస్ట్‌ట్యాగ్‌ను క్లోజ్ చేయండి: మొదటగా, మీరు ప్రస్తుతం ఏ బ్యాంక్ ఫాస్ట్‌ట్యాగ్‌ను వాడుతున్నారో, ఆ బ్యాంక్ అధికారిక వెబ్‌సైట్‌కు వెళ్లండి. వెబ్‌సైట్‌లో మీకు 'Manage FASTag' లేదా 'Close FASTag' అని ఒక ఆప్షన్ కనిపిస్తుంది. దానిని ఎంచుకోండి.

తర్వాత, మీ ఫాస్ట్‌ట్యాగ్ అకౌంట్‌ను మూసివేయమని రిక్వెస్ట్ సమర్పించండి. మీ ఫాస్ట్‌ట్యాగ్ క్లోజ్ అయిన వెంటనే, అందులో మిగిలి ఉన్న బ్యాలెన్స్ డబ్బులు కొన్ని రోజుల్లోనే మీ బ్యాంక్ అకౌంట్‌కు తిరిగి వచ్చేస్తాయి.

కొత్త ఫాస్ట్‌ట్యాగ్‌ను కొనండి: ఇప్పుడు, మీరు ఏ కొత్త బ్యాంక్‌కు మీ ఫాస్ట్‌ట్యాగ్‌ను మార్చాలనుకుంటున్నారో, ఆ బ్యాంక్ వెబ్‌సైట్‌కు లేదా వారి మొబైల్ యాప్‌కు వెళ్లండి. అక్కడ మీకు కొత్త ఫాస్ట్‌ట్యాగ్‌ను కొనుగోలు చేసే ఆప్షన్ ఉంటుంది. దానిని సెలక్ట్ చేసుకోండి.

కొత్త ఫాస్ట్‌ట్యాగ్ కోసం మీరు మీ కారు ఆర్‌సీ (Registration Certificate), మీ ఐడీ ప్రూఫ్ (ID Proof), పాస్‌పోర్ట్-సైజ్ ఫోటోను అప్‌లోడ్ చేయాల్సి ఉంటుంది. పేమెంట్స్ పూర్తయ్యాక, కొత్త ఫాస్ట్‌ట్యాగ్ మీకు జారీ అవుతుంది.

కొత్త ఫాస్ట్‌ట్యాగ్‌ను యాక్టివేట్ చేయండి: కొత్తగా వచ్చిన ఫాస్ట్‌ట్యాగ్‌ను వాడటానికి, మీరు ఆ బ్యాంక్ యాప్‌కు లేదా వెబ్ పోర్టల్‌కు వెళ్లాలి. అక్కడ మీకు ట్యాగ్‌ను యాక్టివేట్ చేసే ఆప్షన్ కనిపిస్తుంది. దాన్ని ఉపయోగించి మీ ట్యాగ్‌ను యాక్టివేట్ చేయండి. ఆ తర్వాత, మీకు అవసరమైన బ్యాలెన్స్‌ను అందులో రీఛార్జ్ చేయండి. చివరిగా, కొత్త ఫాస్ట్‌ట్యాగ్‌ను మీ కారు విండ్‌స్క్రీన్‌పై సరిగ్గా అతికించండి.